നേപ്പാളിന്റെ തലസ്ഥാനമായ കാഠ്മണ്ഡുവിലാണ് മനീഷ കൊയ്‌രാള ജനിച്ചത്. 1991-ൽ സൗദാഗർ എന്ന ചിത്രത്തിലൂടെ ഹിന്ദിയിൽ അരങ്ങേറ്റം കുറിച്ച മനീഷ '1942: എ ലവ് സ്റ്റോറി', 'അകേലെ ഹം അകേലെ തും', 'ബോംബെ, ഖാമോഷി: ദി മ്യൂസിക്കൽ', 'ദിൽ സേ' തുടങ്ങിയ സിനിമകളിലൂടെ ശ്രദ്ധേയയായി. ബോംബൈ, ഖാമോഷി , ദി മ്യൂസിക്കൽ ,കമ്പനി എന്നീ ചിത്രങ്ങളിലെ അഭിനയത്തിന് ഫിലിം ഫെയർ അവാർഡുകളും നേടിയിട്ടുണ്ട്. 2012 ലാണ് മനീഷയ്ക്ക് അണ്ഡാശയ കാൻസർ ഉണ്ടെന്നു കണ്ടെത്തിയത്. എന്നാൽ പതറാതെ അവർ രോഗത്തെ നേരിട്ടു. ഒരു വർഷത്തോളം നീണ്ട കാൻസർ പോരാട്ടത്തിനൊടുവിൽ താരം ജീവിതത്തിലേക്ക് തിരിച്ചെത്തി. കാൻസർ പഠിപ്പിച്ച പാഠങ്ങളെക്കുറിച്ച് എഴുതിയ അനുഭവക്കുറിപ്പുകളുടെ സമാഹാരമായ 'ഹീൽഡ്: ഹൗ കാൻസർ ഗേവ് മീ എ ന്യൂ ലൈഫ്' എന്ന പുസ്തകം ശ്രദ്ധേയമായിരുന്നു. അഞ്ചുവർഷത്തെ ക്യാൻസർ ചികിത്സയ്ക്ക് ശേഷം മനീഷ സിനിമയിലേക്ക് മടങ്ങിയെത്തി. 'ഡിയർ മായ', 'ലസ്റ്റ് സ്റ്റോറീസ്', 'സഞ്ജു' എന്നീ ചിത്രങ്ങളും വിജയമായിരുന്നു. നേപ്പാളിലെ രാജകുടുംബത്തിൽ നിന്നുവന്ന് മോഡലിങ്ങിലൂടെ സിനിമയിലേക്ക് ചേക്കേറിയ മനീഷ കൊയ്‌രാള. തൊണ്ണൂറുകളിലെ ബോളിവുഡിന്റെ സ്വപ്ന നായികയായി മാറിയ മനീഷ ഇന്ന് ഇപ്പോൾ 52-ന്റെ നിറവിലാണ്. സിനിമ ജീവിത്തിന്റെ മൂന്ന് പതിറ്റാണ്ടികൾ പിന്നിടുമ്പോൾ താരത്തിന്റെ മറക്കാനാകത്ത കഥാപാത്രങ്ങളിൽ ഒന്ന് മണിരത്നത്തിന്റെ 'ബോംബെ' എന്ന ചിത്രത്തിലെ ഷൈലാ ബാനുവാണ്.

അരവിന്ദ് സ്വാമിയുമായുള്ള ഓൺസ്ക്രീൻ കെമിസ്റ്രി പ്രേക്ഷകർ ഏറ്റെടുക്കുകയും ചെയ്തിരുന്നു. എന്നാൽ 'ബോംബെ'യിൽ നായികയായകുന്നതിൽ നിന്ന് തന്നെ പലരും പിന്തിരിപ്പിക്കാൻ ശ്രമിച്ചിരുന്നുവെന്ന് എന്ന് മനീഷ ഒരിക്കൽ പിടിഐയ്ക്ക് നൽകിയ അഭിമുഖത്തിൽ പറയുകയുണ്ടായി. 20 വയസ് മാത്രം പ്രായമുള്ള താൻ ഒരമ്മയായി അഭിനയിക്കണം എന്ന കാരണം കൊണ്ട് മണിരത്നം ചിത്രത്തിൽ നിന്ന് പിന്മാറാൻ നിരവധിപേർ ആവശ്യപ്പെട്ടു എന്നണ് താരം പറഞ്ഞത്. എന്റെ ഇരുപതുകളിൽ ഞാൻ അമ്മയായി അഭിനയിച്ചാൽ അടുത്ത പത്ത് വർഷത്തിനുള്ളിൽ എനിക്ക് മുത്തശ്ശി റോൾ അഭിനയിക്കേണ്ടി വരും എന്നാണ് എല്ലാവരും എന്നോട് പറഞ്ഞത്. എന്നാൽ മറ്റുചിലർ പറഞ്ഞത് അങ്ങനെ ചിന്തിക്കുന്നത് അബദ്ധമാണ് എന്നാണ്. മണി രത്നത്തിന്റെ ചിത്രം വേണ്ടെന്ന് വെക്കുന്നത് മണ്ടത്തരമാണ്. ആ വാക്കുകൾ എന്നെ ഏറെ സഹായിച്ചു.' താരം പറ‍ഞ്ഞു. 1995-ലാണ് 'ബോംബെ' റിലീസ് ചെയ്യുന്നത്. 1992 ഡിസംബറിലും 1993 ജനുവരിയിലുമായി ബോംബെയിൽ നടന്ന കലാപം പ്രമേയമാക്കിക്കൊണ്ടാണ് ചിത്രം നിർമ്മിച്ചത്.