തിയറ്ററുകൾ ആഘോഷമാക്കുകയാണ് ടൊവിനോ തോമസിന്റെ തല്ലുമാല. ആഗസ്റ്റ് 12ന് റിലീസ് ചെയ്ത ചിത്രം മികച്ച പ്രേക്ഷക സ്വീകാര്യത നേടി മുന്നേറുകയാണ്. ഇപ്പോഴിതാ 31കോടി കളക്ഷൻ നേടിയിരിക്കുകയാണ് ചിത്രം. നടന്റെ കരിയറിലെ ഏറ്റവും വലിയ ഹിറ്റിലേക്കാണ് തല്ലുമാല കുതിക്കുന്നത്. ഖാലീദ് റഹ്മാൻ സംവിധാനം ചെയ്ത ചിത്രം ഒന്നാന്തരം തല്ലിലൂടെയാണ് പ്രേക്ഷകരുടെ മനസിൽ ഇടം നേടിയത്.

ഇതുവരെയുളളതിൽ നിന്നും ഏറെ വ്യത്യസ്തമായ ലുക്കിൽ എത്തിയ ടൊവിനോയും ഫ്രീക്കത്തിയായ കല്യാണി പ്രിയദർശനും ഏറെ വേഗത്തിലാണ് പ്രേക്ഷകരുടെ മനസ്സിൽ ഇടം പിടിച്ചത്. ഇത്തരം ചിത്രങ്ങളിൽ നേരത്തെയും വേഷമിട്ട ആന്റണി വർഗീസിനെ എന്തുകൊണ്ട് തല്ലുമാലയിൽ ഉൾപ്പെടുത്തിയില്ല എന്ന ചോദ്യവും അതോടൊപ്പം ഉയരുന്നുണ്ട്. എന്നാൽ ഇപ്പോഴിതാ തല്ലുമാലയുടെ സന്തോഷം പങ്കുവെച്ചുകൊണ്ടുള്ള ആന്റണി വർഗീസിന്റെ ഫേസ്ബുക്ക് പോസ്റ്റാണ് ശ്രദ്ധ നേടുന്നത്. ”തല്ലുകൂടി ഹിറ്റടിച്ച്. എതിരെ ഇടിക്കാൻ നിക്കുന്നവന്റെ ഉള്ളൊന്നു അറിഞ്ഞാൽ തീരാവുന്ന പ്രശ്‌നം ഒളളൂട്ടോ ടോവി ബ്രോ , അതോണ്ട് അല്ലേ ഇടിക്കാൻ നിന്നവന്റെ കൂടെ നിക്കുന്നവനെ ഞാൻ ആദ്യം ഇടിച്ചത്” എന്നാണ് ആന്റണി വർഗീസിന്റെ പോസ്റ്റ്. അങ്കമാലി ഡയറീസ് എന്ന ചിത്രത്തിലെ സീനാണ് ആന്റണി വർഗീസ് പരാമർശിച്ചത്. ”തലൈവാ നീങ്കളാ” എന്ന് ടൊവിമോ തോമസും കമന്റ് ചെയ്തിട്ടുണ്ട്.

മണവാളൻ വസീമായി ടൊവിനോ എത്തിയപ്പോൾ ബീപാത്തുവായത് കല്യാണി പ്രിയദർശനാണ്. ഇരുവരും ആദ്യമായി ഒന്നിച്ച ചിത്രം കൂടിയാണിത്. ടൊവിനോക്കും കല്യാണിക്കും പുറമെ ഷൈൻ ടോം ചാക്കോ, ലുക്മാൻ അവറാൻ, ചെമ്പൻ വിനോദ് ജോസ് എന്നിവരാണ് മറ്റു പ്രധാന കഥാപാത്രങ്ങളെ അവതരിപ്പിച്ചത്. മുഹ്സിന്‍ പരാരി, അഷ്റഫ് ഹംസ എന്നിവരാണ് തല്ലുമാലയുടെ തിരക്കഥ ഒരുക്കിയിരിക്കുന്നത്.