ആരാധകരുടെ കാത്തിരിപ്പിന് വിരാമമിട്ട് ലൂസിഫറിന്റെ രണ്ടാം ഭാഗമായ എമ്പുരാന്റെ പുതിയ വിവരങ്ങൾ പുറത്ത്. മുരളീ ഗോപിയുടെ തിരക്കഥയിൽ പൃഥ്വിരാജ് ആദ്യമായി സംവിധാനം ചെയ്ത ചിത്രമായ ലൂസിഫറിന്റെ രണ്ടാം ഭാഗമാണ് എമ്പുരാൻ. പൃഥ്വിരാജും ചിത്രത്തിന്റെ നിർമാതാവുമായ ആന്റണി പെരുമ്പാവൂരുമാണ് ഇത് സംബന്ധിച്ച് സൂചന നൽകിയിരിക്കുന്നത്. ആന്റണി പെരുമ്പാവൂർ, മോഹൻലാൽ, പൃഥ്വിരാജ്, മുരളീ ഗോപി എന്നിവർ ഉൾപ്പെടുന്ന ചിത്രം എൽ2ഇ ടീം എന്ന അടിക്കുറിപ്പോടെ പൃഥ്വിരാജ് സമൂഹമാദ്ധ്യമത്തിൽ പങ്കുവച്ചു.

ആന്റണി പെരുമ്പാവൂരും ഇതേ ചിത്രം പോസ്റ്റ് ചെയ്തുകൊണ്ട് കാത്തിരിക്കുക എന്ന് കുറിച്ചിട്ടുമുണ്ട്. ഇതോടെ ഇന്ന് വൈകിട്ട് നടക്കാനിരിക്കുന്ന പ്രഖ്യപനത്തിന്റെ ആവേശത്തിലാണ് പ്രേക്ഷകർ. ഇന്ന് പുതിയ ചിത്രത്തിന്റെ പ്രഖ്യാപനം ഉണ്ടാകുമെന്നാണ് കഴിഞ്ഞ ദിവസം ആന്റണി പെരുമ്പാവൂർ തൻ്റെ ട്വിറ്ററിലൂടെ അറിയിച്ചത്. ആശീർവാദ് സിനിമാസിന്റെ യൂട്യൂബ് ലിങ്ക് കാത്തിരിക്കൂ എന്ന അടിക്കുറിപ്പോടെയാണ് ആന്റണി പെരുമ്പാവൂരും പങ്കുവച്ചിരിക്കുന്നു. ഇന്ന് വൈകിട്ട് നാല് മണിയ്ക്ക് സിനിമയെ സംബന്ധിച്ച പുതിയ വിവരം പുറത്തുവരും. ചിത്രത്തിന്റെ തിരക്കഥ മേയിൽ പൂർത്തിയായിരുന്നു.

ചില അഭിമുഖങ്ങളിലും മറ്റും പൃഥ്വിരാജ് ലാലേട്ടനെ കാണാന്‍ പോകുകയാണ് എന്ന് പറഞ്ഞതിനെ മുന്‍ നിര്‍ത്തി നിരവധി ട്രോളുകളാണ് പുറത്തിറങ്ങിയത്. എന്നാല്‍ പൃഥ്വിരാജ് മോഹന്‍ലാലിനെ കാണാൻ പോയത് വെറുതെ അല്ല എന്ന് തെളിയുന്ന ചിത്രമാണ് ഇപ്പോൾ സോഷ്യൽ മീഡിയയിൽ എത്തിയിരിക്കുന്നത്. പ്രിഥ്വിരാജ്, മോഹൻലാൽ, ആന്റണി പെരുമ്പാവൂർ, മുരളി ​ഗോപി എന്നിവർ നിൽക്കുന്ന ചിത്രം 'എൽ2ഇ ടീം' എന്ന ഹാഷ് ടാ​ഗോടെ പ്രിഥ്വിരാജ് പോസ്റ്റ് ചെയ്തതിന് പിന്നാലെ നിരവധി പ്രതികരണങ്ങളാണ് എത്തുന്നത്.

മലയാളത്തിൽ ആദ്യമായി 200 കോടി ക്ളബിലെത്തിയ ചിത്രമാണ് ലൂസിഫർ. ലൂസിഫറിന് മൂന്ന് ഭാഗങ്ങൾ ഉണ്ടാകുമെന്ന് സംവിധായകനായ പൃഥ്വിരാജ് വെളിപ്പെടുത്തിയിരുന്നു. ഇതിനെ 'പിസിയു അഥവാ പൃഥ്വിരാജ് സിനിമാറ്റിക് യൂണിവേഴ്‌സ്' എന്ന് വിളിക്കാമെന്നാണ് താരം പറഞ്ഞത്. ഈ ലൂസിഫറി'ന്റെ രണ്ടാം ഭാഗമായിട്ടാണ് 'എമ്പുരാന്‍' വരുന്നത്. ചിത്രം യൂണിവേഴ്‌സൽ ആയ ഒരു വിഷയത്തെക്കുറിച്ചായിരിക്കും സംസാരിക്കുക എന്ന് തിരക്കഥാകൃത്ത് മുരളി ഗോപി നേരത്തെ ഒരു അഭിമുഖത്തിൽ പറഞ്ഞിരുന്നു. 2019ൽ പുറത്തിറങ്ങിയ ലൂസിഫർ 200 കോടിക്ക് മുകളിൽ കളക്ഷൻ നേടുകയും ആ വർഷത്തെ ഏറ്റവും വലിയ പണം വാരി ചിത്രമായി മാറുകയും ചെയ്തു. മോഹൻലാൽ സ്റ്റീഫൻ നെടുമ്പള്ളി എന്ന രാഷ്ട്രീയ നേതാവായി എത്തുന്ന സിനിമയിൽ മഞ്ജു വാര്യർ, വിവേക് ഒബ്‌റോയി, പൃഥ്വിരാജ്, ഇന്ദ്രജിത്ത്, ടൊവിനോ തോമസ്, കലാഭവൻ ഷാജോൺ, സായ് കുമാർ, സച്ചിൻ ഖെദേകർ, ബൈജു തുടങ്ങിയവരായിരുന്നു ചിത്രത്തിലെ പ്രധാന താരങ്ങൾ. സംവിധായകൻ ഫാസിൽ തുടങ്ങിയവർ പ്രധാന കഥാപാത്രങ്ങളെ അവതരിപ്പിച്ചു.