അങ്ങനെ ബി​ഗ് ബോസ് സീസൺ 4ഉം അവസാനിച്ചിരിക്കുകയാണ്. വിജയിയെയും പ്രഖ്യാപിച്ചു. സോഷ്യൽ മീഡിയയിലടക്കം ഇതുമായി ബന്ധപ്പെട്ടുള്ള ചർച്ചകൾ നല്ല രീതിയിൽ മുന്നോട്ട് പോകുന്നുണ്ട്. എന്നാൽ മത്സരാർഥികൾ എല്ലാം അവരവരുടെ ജീവിതത്തിലേക്ക് തിരികെ മടങ്ങി കഴിഞ്ഞു. ഒത്തുകൂടലും ആഘോഷവുമൊക്കെയായി അവരെല്ലാം തന്നെ അടിച്ചു പൊളിക്കുന്നതിന്റെ ചിത്രങ്ങളും വീഡിയോകളും സോഷ്യൽ മീഡിയയിൽ വൈറലാണ്. ബിഗ്‌ബോസ് വീടിനകത്ത് ഗ്രൂപ്പായി തന്നെ കൂട്ടുകെട്ടുകൾ ഉണ്ടായിരുന്നു. സുചിത്ര, അഖിൽ, സൂരജ് എന്നിവരായിരുന്നു കൂട്ട്. സുചിത്രയുടെയും അഖിലിൻ്റെയും കൂട്ട് കെട്ടിനെ സുഖിലെന്നാണ് ബി​ഗ് ബോസ് പ്രേക്ഷകർ വിളിച്ചിരുന്നത്. ഇരുവരും തമ്മിൽ പ്രണയമാണെന്നും ഇവരുടെ മകനാണ് സൂരജ് എന്നും പ്രേക്ഷകർ കഥകൾ മെനഞ്ഞു. പക്ഷെ ഇവർക്കൊന്നും താരങ്ങൾ കൃത്യമായി മറുപടി നൽകിയിരുന്നില്ല. ഇപ്പോഴിതാ ഏഷ്യാനെറ്റിലെ സ്റ്റാർട്ട് മ്യൂസിക്കിൽ അതിഥികളായി എത്തിയത് റിയാസ്, അഖിൽ, ധന്യ, ബ്ലെസ്ലി, അശ്വിൻ, സൂരജ്, ലക്ഷ്മി പ്രിയ, ദിൽഷ എന്നിവരാണ്. ആരാദ്യം പാടും എന്ന റൗണ്ടിൽ സ്ഫടികത്തിലെ ഏഴിമല പൂഞ്ചോല എന്ന ​ഗാനമായിരുന്നു ഇവർക്ക് ലഭിച്ചത്. റിയാസ് വളരെ വേ​ഗത്തിൽ തന്നെ ഉത്തരം പറഞ്ഞു. എന്നാൽ ആ പാട്ടിൽ ഡാൻസ് ചെയ്യാൻ അവസരം കൊടുത്തത് എൽപിക്കും കുട്ടി അഖിലിനുമാണ്. ആ സമയത്ത് കുട്ടി അഖിൽ ലക്ഷ്മി പ്രിയയോട് പറഞ്ഞ കാര്യങ്ങളാണ് ഇപ്പോൾ സമൂഹ മാധ്യമങ്ങളിൽ ശ്രദ്ധ നേടുന്നത്. കുട്ടി അഖിൽ ലക്ഷ്മി പ്രിയയോട് പറഞ്ഞതിങ്ങനെയായിരുന്നു.. 'ചേച്ചി ബി​ഗ് ബോസ് ഹൗസിൽ മത്സരത്തിൻ്റെ ഭാ​ഗമായി ദേഷ്യപ്പെട്ടൊക്കെ സംസാരിച്ചിട്ടുണ്ടാകും, എന്നാൽ അതൊക്കെ ​ഗെയിമിൻ്റെ ഭാ​ഗം മാത്രമായിരുന്നു. ചേച്ചി അതൊന്നും മനസ്സിൽ വെച്ചുകൊണ്ട് ഈ ഡാൻസ് കളിക്കരുത്', അഖിൽ പറഞ്ഞു. ബി​ഗ് ബോസ് വീട്ടിലെ കാര്യങ്ങളൊക്കെ കഴി‍ഞ്ഞില്ലേ അതൊന്നും ഞാൻ മനസ്സിൽവെച്ചിട്ടില്ലെന്ന് ലക്ഷ്മി പ്രിയ പറഞ്ഞു. ഏഴുമല പൂഞ്ചോല ആയത് കൊണ്ട് പിറക് വശത്ത് ചവിട്ടുന്ന രം​ഗം വരുമ്പോൾ ചേച്ചി ചവിട്ടരുത് , അവിടെയാണ് നാഡി ഞരമ്പുകൾ ഉള്ളത്. ഞാൻ ഇതുവരെ കല്യാണം പോലും കഴിച്ചില്ലെന്ന് അഖിൽ തമാശയിൽ പറയുന്നുണ്ട്. സംഭവമെന്തായാലും ഏറ്റെടുത്തിരിക്കുകയാണ് ആരാധകർ.