പ്രിയ താരത്തിന്റെ സിനിമ എത്തുമ്പോൾ ആദ്യ ദിനം തിയറ്ററിന് മുന്നിലും അകത്തും ആരാധകരുടെ ആഘോഷം പതിവാണ്. കഴിഞ്ഞ ദിവസം എത്തിയ ധനുഷ് ചിത്രം 'തിരുച്ചിത്രമ്പലം' വലിയ ആരവത്തോടെയാണ് അദ്ദേഹത്തിന്റെ ആരാധകർ വരവേറ്റത്. തീയറ്ററുകളില്‍ പ്രദര്‍ശനം തുടരുകയാണ്. ഒരു വര്‍ഷത്തിന് ശേഷം തിയറ്ററുകളില്‍ എത്തിയ ധനുഷ് ചിത്രം ആഘോഷമാക്കുകയാണ് ആരാധകര്‍. ഹൗസ്ഫുള്ളായി നിറഞ്ഞോടുന്നത് തിയറ്ററുടമകള്‍ക്ക് ആശ്വാസം പകരുമ്പോള്‍ ചെന്നൈയിലെ രോഹിണി തീയറ്ററില്‍ സംഭവിച്ചത് വലിയ നഷ്ടം. ധനുഷിനെ സ്‌ക്രീനില്‍ കണ്ടതും ചില ആരാധകരുടെ ആവേശം അതിരുകടന്നു. ആര്‍പ്പു വിളികള്‍ക്കും നൃത്തവുമായി സീറ്റില്‍ നിന്ന് എഴുന്നേറ്റ ആരാധകരില്‍ ചിലര്‍ തീയറ്റര്‍ സ്‌ക്രീന്‍ വലിച്ചുകീറി. ഷോ മുടങ്ങിയപ്പോഴാണ് ആവേശത്തില്‍ തങ്ങള്‍ക്ക് പിണഞ്ഞ അമളി അവര്‍ക്ക് മനസിലായത്. ഇത് സംഘര്‍ഷത്തില്‍ കലാശിക്കുകയും ചെയ്തു. പരിധികടന്ന ഈ പ്രവൃത്തി തീയറ്റര്‍ ഉടമയ്ക്ക് കനത്ത സാമ്പത്തിക നഷ്ടമാണ് ഉണ്ടാക്കിയിരിക്കുന്നത്.

ചിത്രത്തിൽ ധനുഷിനെ പോലും കടത്തി വെട്ടുന്ന അഭിനയമാണ് നിത്യാ മേനോൻ കാഴ്ചവയ്ക്കുന്നത്. ശോഭന എന്ന കഥാപാത്രം തിയറ്റർ വിട്ട് നമുക്കൊപ്പം പോരും വിധം ഭംഗിയാക്കി നിത്യ. കളിക്കൂട്ടുകാരനെ അവന്റെ വീഴ്ചയിൽ എപ്പോഴും താങ്ങുന്ന, അവന്റെ എല്ലാ പ്രണയങ്ങൾക്കും കൗതുകങ്ങൾക്കും കൂട്ടുനിൽക്കുന്ന, പിണക്കവും ഇണക്കങ്ങളും കണ്ണിൽ പ്രകടിപ്പിക്കുന്ന ശോഭന നിത്യയുടെ കരിയർ ബെസ്റ്റ് പ്രകടനങ്ങളിൽ ഒന്നാണ്. അങ്ങനെ ഒരു കൂട്ടുകാരി ഒപ്പമുണ്ടെങ്കിൽ എന്ന് കഥ കാണുന്നവന് തോന്നുന്നിടത്ത് നിത്യ വിജയിക്കുന്നു. പ്രകാശ് രാജ്, ധനുഷ് അച്ഛൻ മകൻ മുഹൂർത്തങ്ങളും ഭാരതി രാജയുടെ മുത്തച്ഛൻ വേഷവും നമ്മുടെ വീട്ടിലേക്കും ചേർത്തുവയ്ക്കാവുന്നതാണ്. സ്വന്തം നിലമറന്നുള്ള വൺവേ പ്രണയങ്ങളും കണ്ടുകൂട്ടുന്ന സ്വപ്നങ്ങളും ഒടുവിലത്തെ നിരാശയും അനുഭവിക്കുമ്പോഴും ‘തിരുച്ചിത്രമ്പലം’ ഈ തിരിച്ചടികളിലൊന്നും പഠിക്കുന്നില്ല. വീണ്ടും ചരിത്രം ആവർത്തിച്ചുെകാണ്ടേയിരിക്കും. മുറ്റത്തെ മുല്ലയെ കാണാതെ ഓടികൊണ്ടേയിരിക്കുന്നു. അങ്ങനെ പോകുന്ന കഥയിൽ ചിരിക്കുള്ള വഴിയും തുറന്നുകിട്ടുന്നുണ്ട്. കഥയിൽ വലിയ പുതുമയില്ലെങ്കിലും മേക്കിങ്ങിന്റെ മികവിൽ തിയറ്ററിൽ കയ്യടി നേടുന്നു ഈ ധനുഷ് ചിത്രവും. റാഷി ഖന്ന, പ്രിയ ഭവാനി ശങ്കര്‍, നിത്യ മേനോന്‍, പ്രകാശ് രാജ് എന്നിവരാണ് സിനിമയിലെ മറ്റു പ്രധാന താരങ്ങള്‍.