ബോളിവുഡിലെ മുന്‍നിര നായികമാരിലൊരാളാണ് വിദ്യ ബാലന്‍. ബോഡി ഷെയ്മിംഗിനെതിരെ നിരന്തരം സംസാരിക്കുന്ന നടിയാണ് വിദ്യ ബാലന്‍. തടി കൂടുതലാണെന്ന് പറഞ്ഞ് തനിക്ക് നേരിടേണ്ടി വന്ന പ്രശ്‌നങ്ങള്‍ നടി തുറന്നു സംസാരിക്കാറുണ്ട്. കരിയറില്‍ ശരീര ഭാരം പ്രധാന വിഷയമായി പലരും ചൂണ്ടിക്കാണിച്ചിട്ടുണ്ടെന്നും ഇത് തനിക്ക് വലിയ അപകര്‍ഷകതാ ബോധം ഒരു കാലത്ത് ഉണ്ടാക്കിയിരുന്നെന്നും വിദ്യ പറഞ്ഞിരുന്നു.

ഇപ്പോഴിതാ ഒരു ആരാധിക തന്നിലുണ്ടാക്കിയ ചിന്തകളെ പറ്റി സംസാരിച്ചിരിക്കുകയാണ് വിദ്യ. ഇന്‍സ്റ്റഗ്രാം പോസ്റ്റിലിട്ട കുറിപ്പിലൂടെയാണ് നടി ഇക്കാര്യം പറഞ്ഞത്. 'അടുത്തിടെ ഒരു ചടങ്ങില്‍ പങ്കെടുക്കവെ ഒരു പെണ്‍കുട്ടി എന്റെയടുത്ത് വന്ന് ഫോട്ടോ ചോദിച്ചു. വലിയ ആള്‍ക്കൂട്ടം അവിടെ ഉണ്ടായിരുന്നു. പറ്റാവുന്ന ഫോട്ടോകള്‍ക്ക് ഞാന്‍ നില്‍ക്കുന്നുണ്ടായിരുന്നു. ഇതിനിടെയാണ് ഒരുവട്ടം ഫോട്ടോ എടുത്ത കുട്ടി വീണ്ടും ഒരു ഫോട്ടോയ്ക്ക് വരുന്നത്'

'ഒരുവട്ടം ഫോട്ടോ എടുത്തതല്ലേ ഇനി പറ്റില്ലെന്ന് എന്റെ മാനേജര്‍ പറഞ്ഞു. എന്റെ മോശം വശത്ത് നിന്നുള്ള ഫോട്ടോയാണ് എടുത്തത് ഇത് പോസ്റ്റ് ചെയ്യാന്‍ പറ്റില്ലെന്നാണ് ആ പെണ്‍കുട്ടി പറഞ്ഞത്. ആ കുട്ടി പിന്‍വാങ്ങിയില്ല. എന്റെ കാറിനടുത്തോളം വന്നു. ജീവിതം ആ ഫോട്ടോയില്‍ ആശ്രയിച്ചാണെന്ന തരത്തിലായിരുന്നു. ഞാന്‍ അനുസരിച്ചു. പിന്നീട് കാറിനകത്തിരുന്ന് ഞാന്‍ ചിന്തിച്ചു'

'എനിക്ക് എന്റെ വലത് വശത്തേക്കാള്‍ ഇടത് വശത്തുള്ള ഫോട്ടോകളായിരുന്നു ഇഷ്ടം. പക്ഷെ പിന്നീട് ഞാനെന്നെ തന്നെ സ്വയം അംഗീകരിക്കാന്‍ തുടങ്ങിയപ്പോള്‍ ഒരു ഭാഗം മാത്രം ഇഷ്ടപ്പെടുന്നത് മറ്റൊരു ഭാഗത്തെ ഒഴിവാക്കുന്നത് പോലെയാണെന്ന് മനസ്സിലാക്കി. ഫോട്ടോഗ്രാഫര്‍മാരോട് എന്റെ ഇടത് വശത്ത് നിന്ന് ഫോട്ടോ എടുക്കരുതെന്ന് പറയുമായിരുന്നു. കാരണം ആ വശത്ത് നിന്ന് എന്നെ കാണാന്‍ ഭംഗിയില്ലെന്ന് ഞാന്‍ കരുതി'

'ഇതാരെങ്കിലും കണ്ടുപിടിക്കുമോ എന്ന പേടിയും ഉണ്ടായിരുന്നു. പക്ഷെ ഇന്ന് അതെല്ലാം മാറി. എന്റെ എല്ലാ ശരീര ഭാഗങ്ങളെയും ഇഷ്ടപ്പെടുന്നു. ഏത് സൈഡില്‍ നിന്നാണ് എന്റെ ഫോട്ടോ എടുക്കുന്നതെന്ന് ഞാന്‍ ശ്രദ്ധിക്കുന്നില്ല. അത് എന്നെ വലത് വശത്ത് കൂടെ കാണുന്നതില്‍ മാറ്റം വന്നത് കൊണ്ടല്ല. അതൊരിക്കലും മാറില്ലെന്ന് ഞാന്‍ തിരിച്ചറിഞ്ഞു. എന്നെ സ്വയം കാണുന്ന രീതിയില്‍ മാറ്റം വന്നത് കൊണ്ടാണെന്നും' വിദ്യ ഇന്‍സ്റ്റഗ്രാമില്‍ കുറിച്ചു.