ബോളിവുഡ് പ്രേക്ഷകര്‍ ഏറെ ആകാംക്ഷയോടെ കാത്തിരിക്കുന്ന ഒരു ബിഗ് ബജറ്റ് ചിത്രമാണ് രൺബീർ കപൂറിന്റെ ബ്രഹ്മാസ്ത്ര. സെപ്റ്റംബര്‍ ഒമ്പതിനാണു 'ബ്രഹ്‍മാസ്‍ത്ര പാര്‍ട്ട് വണ്‍ : ശിവ' തിയറ്ററുകളില്‍ റിലീസിനെത്തുക. അയൻ മുഖർജി ഒരുക്കുന്ന ഈ ബ്രഹ്മാണ്ഡ ചിത്രം മൂന്ന് ഭാഗങ്ങളായിട്ടാണ് പുറത്തിറങ്ങുന്നത്.രൺബീർ കപൂർ, അമിതാഭ് ബച്ചൻ, ആലിയ ഭട്ട്, നാഗാർജുന എന്നിവർ പ്രധാന കഥാപാത്രങ്ങളെ അവതരിപ്പിക്കുന്ന ചിത്രം ഇന്ത്യൻ സിനിമയെ മറ്റൊരു തലത്തിലേക്ക് ഉയർത്താൻ കെൽപ്പുള്ള സിനിമ എന്നാണ് വിലയിരുത്തൽ. 'ഇഷ' എന്ന കഥാപാത്രമായി ആലിയ ഭട്ട് ആണ് രൺബീറിനൊപ്പം നായികയായി അഭിനയിക്കുന്നത്. വിവാഹശേഷം ഇരുവരും ഒന്നിച്ച് അഭിനയിച്ച്‌ പുറത്തുവരുന്ന ചിത്രമാണിത്. ചിത്രത്തിന്റെ ഛായാഗ്രാഹണം നിര്‍വഹിക്കുന്നത് പങ്കജ് കുമാറാണ് . 'ബ്രഹ്‍മാസ്‍ത്ര'യുടെ തെലുങ്ക് ട്രെയിലറിന് ശബ്‍ദം നല്‍കിയത് ചിരഞ്‍ജീവിയാണ്. ഹിന്ദി, തമിഴ്, തെലുങ്ക്, കന്നഡ, മലയാളം എന്നിങ്ങനെ പാൻ ഇന്ത്യൻ റിലീസാണ് ബ്രഹ്‍മാസ്‍ത്രക്കുള്ളത് . ചിത്രത്തിന്റെ ദക്ഷിണേന്ത്യൻ വിതരണാവകാശം സ്വന്തമാക്കിയിരിക്കുന്നത് സംവിധായകൻ എസ്.എസ്.രാജമൗലിയാണ്. തമിഴ്, തെലുങ്ക്, കന്നഡ, മലയാളം എന്നീ ഭാഷകളിൽ രാജമൗലി ഈ ചിത്രം തിയറ്ററുകളിലെത്തിക്കും.കരൺ ജോഹറിന്റെ ധർമ്മ പ്രൊഡക്‌ഷൻസ്, ഫോക്സ് സ്റ്റാർ സ്റ്റുഡിയോസ്, പ്രൈം ഫോക്കസ്, സ്റ്റാർലൈറ്റ് പിക്‌ചേഴ്‌സ് എന്നിവർ ചേർന്നാണ് ചിത്രം നിർമ്മിക്കുന്നത്. തന്റെ പുതിയ ചിത്രമായ
ബ്രഹ്മാസ്ത്രയുടെ പ്രചരണാർത്ഥം ചെന്നൈയിലാണ് രൺബീർ ഇപ്പോൾ.

ഇവിടെ നടന്ന പത്രസമ്മേളനത്തിലാണ് ആലിയയെ കളിയാക്കി പറഞ്ഞ കമന്റിന് രൺബീർ മാപ്പ് പറഞ്ഞത്. തന്റെ അഭിപ്രായം കേട്ട് വിഷമം തോന്നിയവരോട് ക്ഷമ ചോദിക്കിക്കുന്നതായി രൺബീർ പറഞ്ഞു. "ആദ്യമായി,ഞാൻ എന്റെ ഭാര്യയെ ഒരുപാട് സ്നേഹിക്കുന്നു. തമാശയായി മാറാതെ പോയ ഒരു തമാശയായിരുന്നു അത്. എന്റെ ഉദ്ദേശം കളിയാക്കൽ ആയിരുന്നില്ല.ഞാൻ പിന്നീട് ആലിയയോട് അതിനെക്കുറിച്ച് സംസാരിച്ചു, അവൾ അത് ചിരിച്ചു തള്ളി. എന്റെ വാക്കുകളിൽ വിഷമിച്ചവരോട് ഞാൻ ക്ഷമ ചോദിക്കുന്നു" രൺബീർ പറഞ്ഞു. അടുത്തിടെ രൺബീർ കപൂറും ആലിയ ഭട്ടും ബ്രഹ്മാസ്ത്ര സംവിധായകൻ അയാൻ മുഖർജിയും ഒരു യൂട്യൂബ് ലൈവിൽ ഒന്നിച്ചു പങ്കെടുത്തിരുന്നു. സെഷനിൽ, ആലിയ പ്രമോഷനുകളെക്കുറിച്ചും മറ്റും സംസാരിച്ചിരുന്നു. ഇതിനിടയിലാണ് രൺബീർ ആലിയയുടെ നിറ വയർ ചൂണ്ടി കളിയാക്കി പറഞ്ഞത്. ഇതാണ് ഒരു വിഭാഗം ആളുകളെ ചൊടിപ്പിച്ചത്. ഒരു തമാശ പറഞ്ഞതാണെന്ന് അപ്പോൾ തന്നെ രൺബീർ പറഞ്ഞിരുന്നു.