കഴിവും സൗന്ദര്യവും ഉണ്ടായിട്ടും സിനിമയിൽ വിജയിക്കാൻ കഴിയാതെ പോയ നടിയാണ് ചാർമിള. ഹിറ്റ് ചിത്രങ്ങൾ ഉണ്ടായിട്ടും എവിടെയൊക്കെയോ ഈ നടിയ്ക്കു താളപ്പിഴകളുണ്ടായി. വിവാഹങ്ങളും വിവാഹമോചനങ്ങളും ചാർമിളയുടെ കരിയറിനെ ബാധിച്ചു. തിരിച്ചു വരാൻ പല തവണ ശ്രമിച്ചെങ്കിലും സിനിമകളുടെ തുടർച്ചയായ പരാജയം താരത്തിനു തിരിച്ചടിയായി. മലയാള സിനിമയിൽ തന്നെ ഏറെ ചർച്ച ചെയ്യപ്പെട്ട ഒരു പ്രണയ ജോഡിയായിരുന്നു ബാബു ആന്റണിയും ചാർമിളയും.

എന്നാൽ ആ ബന്ധം പാതിയിൽ അവസാനിച്ചു. ബാബു ആന്റണിയുമായുണ്ടായിരുന്ന പ്രണയത്തെക്കുറിച്ചും വേര്‍പിരിയലിനെക്കുറിച്ചുമൊക്കെ ചാർമിള ഇതിനു മുൻപ് തുറന്നു പറഞ്ഞിട്ടുണ്ട്. അത്തരത്തിൽ മുൻപൊരിക്കൽ പറഞ്ഞ ചാർമിളയുടെ വാക്കുകളാണ് സോഷ്യൽ മീഡിയയിൽ വീണ്ടും ചർച്ചയാകുന്നത്. 'കടൽ എന്ന ചിത്രത്തിലാണ് ആദ്യം കണ്ടത്. രാജധാനിയിലാണ് പ്രണയത്തിലായത്. തുടർന്ന് ആറ് ചിത്രങ്ങൾ ഒന്നിച്ച് ചെയ്തു. ഞങ്ങൾ നാല് വര്‍ഷം നീണ്ട പ്രണയത്തിലായിരുന്നു. ഒരുമിച്ച് ജീവിക്കുകയും ചെയ്തിരുന്നു. അച്ഛനും അമ്മയും പറയുന്നത് കേൾക്കാതിരുന്നാൽ ഇതാണ് സംഭവിക്കുന്നത്. അച്ഛന് ബാബുവിനെ ഇഷ്ടമല്ലായിരുന്നു, പ്രായം ഒരു വിഷയം ആയിരുന്നു. പ്രണയത്തിൽ ബാബുവിന്റെ സഹോദരന്‍ ഒരു പ്രശ്നമായിരുന്നു. എനിക്ക് തോന്നുന്നത് സഹോദരനുമായി ബന്ധപ്പെട്ട എന്തോ പ്രശ്നമായിരിക്കാം ഉണ്ടായത്. യുഎസ്എയില്‍ പോയി. പോയ ആൾ തിരിച്ചു വന്നില്ല. സുഹൃത്തുക്കളെ കാണാനായാണ് അന്ന് പോയത്. പോകുമ്പോള്‍ തന്നെ സഹോദരനെ കാണാന്‍ പോകരുതെന്ന് ഞാന്‍ പറഞ്ഞിരുന്നു. പക്ഷെ പോയി. ചതിക്കുന്ന ഒരാളായിരുന്നില്ല അദ്ദേഹം പക്ഷെ എന്തോ സംഭവിച്ചിട്ടുണ്ടെന്നും ചാർമിള പറയുന്നു.