മലയാള സിനിമയിലെ യുവതാരങ്ങളിൽ‌ ഒരാളാണ് സാനിയ ഇയ്യപ്പൻ. സിനിമയിൽ എത്തി ചുരുങ്ങിയ കാലം കൊണ്ടുതന്നെ ഏറെ ശ്രദ്ധനേടാൻ താരത്തിന് സാധിച്ചിരുന്നു. സമൂഹമാധ്യമങ്ങളിൽ സജീവമായ സാനിയ പങ്കുവയ്ക്കുന്ന ചിത്രങ്ങളും വീഡിയോകളും ശ്രദ്ധനേടാറുണ്ട്. ​ഗ്ലാമറസ് വേഷങ്ങളിൽ സമൂഹമാധ്യമങ്ങളിൽ പ്രത്യക്ഷപ്പെടുന്ന സാനിയയ്ക്ക് പലപ്പോഴും വിമർശനങ്ങൾ നേരിടേണ്ടിവന്നിട്ടുണ്ട്. സാനിയയുടെ ഏറ്റവും അടുത്ത സുഹൃത്തുക്കളിൽ ഒരാളാണ് സെലിബ്രിറ്റി മേക്കപ്പ് ആർട്ടിസ്റ്റായ സാംസൺ ലെയ്. സാംസൺ ലെയ്ക്കൊപ്പമുള്ള ചിത്രങ്ങൾ പങ്കുവെക്കുമ്പോൾ പലരും ഇവരുടെ ബന്ധത്തെ കുറിച്ച് ചോദ്യങ്ങളുമായി എത്തിയിരുന്നു.

ഇപ്പോൾ അതിനെല്ലാമുള്ള മറുപടിയുമായി എത്തിയിരിക്കുകയാണ് സാനിയ ഇയ്യപ്പൻ. സാംസൺ ലെയുടെ പുതിയ സംരംഭത്തിന്റെ ഉദ്ഘാടനം നിർവഹിച്ച് സംസാരിക്കവെയായിരുന്നു സാനിയയുടെ വെളിപ്പെടുത്തൽ. 'എന്റേയും സാമിന്റേയും റിലേഷനെ കുറിച്ച് അറിയാത്തവർക്ക് വേണ്ടി പറയുകയാണ്.' 'ഞാൻ റിയാലിറ്റി ഷോയിൽ നിന്നാണ് വന്നതെന്നത് എല്ലാവ​ർക്കും അറിയാവുന്ന കാര്യമാണ്. റിയാലിറ്റിഷോയ്ക്ക് ശേഷം ഖത്തറി‌ൽ ഒരു പരിപാടിക്ക് പോവുമ്പോൾ എയർപോർ‌ട്ടിൽ വെച്ചാണ് ആദ്യം സാമിനെ ആദ്യം കാണുന്നത്. അന്ന് ഞാൻ ഓടിപ്പോയി സംസാരിക്കുകയും ഫോട്ടോ എടുക്കുകയുമെല്ലാം ചെയ്തിരുന്നു.' 'അന്ന് വലിയ വലിയ സെലിബ്രിറ്റികളുടെ മേക്കപ്പ് ആർട്ടിസ്റ്റായിരുന്നു സാം. അന്ന് ഞാൻ വെറുതെയൊരു ആ​ഗ്രഹം പറഞ്ഞിരുന്നു എന്നെങ്കിലും നമുക്ക് ഒരുമിച്ച് പ്രവർത്തിക്കാൻ കഴിയട്ടെയെന്ന്. ശേഷം ഞാൻ ക്വീൻ സിനിമ ചെയ്തു.' 'അന്ന് മികച്ച പുതുമുഖ നടിക്കുള്ള അവാർഡ് വാങ്ങാൻ പോകാനായി ഞാൻ മേക്കപ്പ് ചെയ്യാൻ ആദ്യം വിളിച്ചത് സാമിനെയാണ്. അന്ന് മുതലുള്ള സൗഹൃദമാണ്. അന്ന് മുതൽ സാമിനെ എനിക്ക് അടുത്തറിയാം അഞ്ച് വർഷത്തെ പരിചയമാണ്' വികാരഭരിതയായി തന്നെ സാനിയ പറഞ്ഞു.