സിനിമകൾക്ക് വേണ്ടിയും കഥാപാത്രങ്ങളുടെ പൂർണതയ്ക്ക് വേണ്ടിയുമൊക്കെ മേക്കോവർ നടത്തി അമ്പരപ്പിച്ച താരമാണ് നടൻ ചിമ്പു. കരിയർ പോലെ തന്നെ ചിമ്പുവിന്റെ വ്യക്തി ജീവിതവും എപ്പോഴും വാർത്തകളിൽ നിറഞ്ഞിരുന്നു. നടിമാരായ നയൻതാര, ഹൻസിക തുടങ്ങിയവരുമായുള്ള പ്രണയം, ബ്രേക്ക് അപ്പ് തുടങ്ങിയവ ചിമ്പുവിനെ ​ഗോസിപ്പ് കോളങ്ങളിൽ നിറച്ചിരുന്നു.

രണ്ട് നടിമാരുമായും നല്ല സൗഹൃദം ഇപ്പോഴും ചിമ്പുവിനുണ്ട്. വിവാഹ നിശ്ചയം ഉടൻ ഉണ്ടാകുമെന്ന് പ്രഖ്യാപിച്ച് കുറച്ച് നാളുകൾക്ക് ‌ശേഷമാണ് സിമ്പുവും ഹൻസികയും പിരിഞ്ഞത്. പിന്നീട് പ്രണയങ്ങളൊന്നും സിമ്പുവിന്റെ ജീവിതത്തിൽ സംഭവിച്ചിട്ടില്ല.

മുപ്പത്തിയൊമ്പതാം വയസിലും അവിവാഹിതനായി തുടരുന്ന ചിമ്പുവിന് വിവാഹ ജീവിതം ഭയമാണെന്ന് തുറന്ന് പറഞ്ഞിരുന്നു. 'ഒപ്പം അഭിനയിക്കുന്ന നടിയുമായി ഞാൻ പ്രണയത്തിലാണെന്ന് വരെ ​ഗോസിപ്പുകൾ പരന്നിട്ടുണ്ട്. ഇത്തരം ചോദ്യങ്ങൾ എന്റെ 19ാം വയസ്സ് മുതൽ കേൾക്കുന്നതാണ്. എല്ലാ മാതാപിതാക്കൾക്കും തങ്ങളുടെ മക്കൾ വിവാഹം കഴിച്ച് കാണണമെന്നുണ്ട്. എന്റെ അച്ഛനും അമ്മയ്ക്കും അങ്ങനെ തന്നെയാണ്'

'എന്നാൽ എനിക്ക് കല്യാണം കഴിക്കാൻ കുറച്ച് പേടിയുണ്ട്., തിടുക്കത്തിൽ കല്യാണം കഴിച്ച് പിന്നീട് അഭിപ്രായ വ്യത്യാസങ്ങളും വഴക്കുകളും വിവാഹ മോചനവും ഉണ്ടാവുമോ എന്ന ഭയം മൂലം വിവാഹം മാറ്റി വെക്കുകയാണ്. ശരിയായ പങ്കാളി വരുന്നത് വരെ കാത്തിരിക്കാൻ ഞാൻ‌ തീരുമാനിച്ചു,' ചിമ്പു പറയുന്നു.

സിമ്പുവിന്റെ വിവാഹം ആരാധകർ ഏറെ പ്രതീക്ഷയോടെ കാത്തിരിക്കുന്ന ഒന്നാണ്. അവനൊരു നല്ല ഭാര്യയെ കിട്ടാൻ അറിയാവുന്ന എല്ലാ ദൈവങ്ങളോടും പ്രാർഥിക്കുന്നുണ്ടെന്നായിരുന്നു അദ്ദേഹത്തിന്റെ പിതാവും സംവിധായകനുമായ ടി.രാജേന്ദർ മാധ്യമങ്ങളോട് പറഞ്ഞിരുന്നത്. സിമ്പു ഉടൻ വിവാഹിതനാകും എന്നും അദ്ദേഹം പറഞ്ഞിരുന്നു.

ജനിച്ച് ഒമ്പത് മാസം പ്രായമുള്ള കൈക്കുഞ്ഞായിരിക്കുമ്പോൾ മുതൽ സിനിമകളിൽ അഭിനയിച്ച് തുടങ്ങിയതാണ് തമിഴകത്തെ മുൻനിര താരമായ നടൻ സിലംബരസൻ എന്ന സിമ്പു. നടൻ എന്നതി‌ലുപരി സംവിധായകൻ, ​ഗാനരചയിതാവ്, ​ഗായകൻ തുടങ്ങി വിവി‌ധ മേഖലകളിലും സിമ്പു തിളങ്ങിയിട്ടുണ്ട്.