നടി അമല പോള്‍ വീണ്ടും വിവാഹിതയായി. ഏറെക്കാലമായി പ്രണയത്തിലായിരുന്ന സംരംഭകനും കണ്‍സള്‍ട്ടന്റുമായ ജഗത് ദേശായിയാണ് വരന്‍. കൊച്ചി ബോള്‍ഗാട്ടി പാലസില്‍ നിന്നുള്ള ചിത്രങ്ങള്‍ പങ്കുവച്ച് താരം തന്നെയാണ് ഇക്കാര്യം വെളിപ്പെടുത്തിയത്. അടുത്തിടെ ഇരുവരുടെയും വിവാഹ നിശ്ചയത്തിന്റെ ചിത്രങ്ങളും താരം പങ്കുവച്ചിരുന്നു. 'മൈ ജിപ്‌സി ക്വീന്‍ യെസ് പറഞ്ഞു' എന്ന അടിക്കുറിപ്പോടെ അമലയെ പ്രപ്പോസ് ചെയ്യുന്നതിന്റെ വീഡിയോ ജഗതും ഇന്‍സ്റ്റഗ്രാമില്‍ പങ്കുവച്ചിരുന്നു.

സംവിധായകന്‍ എ.എല്‍ വിജയിയായിരുന്നു അമലയുടെ ആദ്യ ഭര്‍ത്താവ്. 2011ല്‍ വിജയ് സംവിധാനം ചെയ്ത് അമല പോള്‍ അഭിനയിച്ച ദൈവ തിരുമകള്‍ എന്ന സിനിമയുടെ ലൊക്കേഷനില്‍ വച്ചായിരുന്നു ഇരുവരും അടുപ്പത്തിലായത്. അത് പിന്നീട് പ്രണയത്തിലേക്ക് എത്തി. 2014 ല്‍ അമലയും വിജയും വിവാഹതിരായി. ഹിന്ദു - ക്രിസ്ത്യന്‍ ആചാരപ്രകാരമായിരുന്നു വിവാഹം. രണ്ട് വര്‍ഷം മാത്രം മുന്നോട്ട് പോയ ഇരുവരും 2016ല്‍ വേര്‍പിരിയല്‍ പ്രഖ്യാപിച്ചു. 2017ലാണ് നിയമപരമായി ബന്ധം അവസാനിപ്പിച്ചത്.