ഏഷ്യാനെറ്റിന്റെ സിനിമാ അവാര്‍ഡില്‍ പൃഥ്വിരാജിനെ പൂര്‍ണമായി തഴഞ്ഞതായി സോഷ്യല്‍ മീഡിയയും. സൂപ്പര്‍ താരങ്ങളെ എന്നും വാനോളം പുകഴ്ത്തുന്ന ഏഷ്യാനെറ്റ് മാനേജ്‌മെന്റ് യുവ താരങ്ങളെ തഴയുന്നതിനെതിരെ മുമ്പും പരാതികള്‍ ലഭിച്ചിട്ടുണ്ട്. ഇത്തവണയും ഏഷ്യാനെറ്റിന്റെ അവാര്‍ഡ് നിശയെ ചൊല്ലി വിവാദമുണ്ടായി. പൃഥ്വീരാജിന്റെ ആരാധകര്‍ വിവാദം കത്തിക്കുകയാണ്.
ഏഷ്യാനെറ്റ് ഫിലിം അവാര്‍ഡില്‍ പൃഥ്വിരാജിന് ബെസ്റ്റ് ആക്ടറിനുള്ള അവാര്‍ഡായിരുന്നു പൃഥ്വിരാജിന് ലഭിച്ചത്. എന്നാല്‍, മികച്ച നടനുള്ള പുരസ്‌ക്കാരം നല്‍കിയിട്ടും താരത്തെ അവഹേളിച്ചു എന്നതാണ് ആരാധകരുടെ പരാതി. അവാര്‍ഡ് പ്രഖ്യാപിച്ച ശേഷം സ്‌ക്രീനില്‍ പൃഥ്വിരാജിനെ കുറിച്ചുള്ള പ്രൊഫൈല്‍ വേണ്ട വിധത്തില്‍ കാണിച്ചില്ലെന്നതാണ് ആക്ഷേപത്തിന്റെ അടിസ്ഥാനം. പൃഥ്വിരാജിനെ തികച്ചും തരം താഴ്തിയും വില കുറച്ചും ആണ് ഏഷ്യാനെറ്റ് അവതാരകര്‍ സ്വാഗതം ചെയ്തതെന്നും ആരാധകര്‍ പരിതപിക്കുന്നു.
മറ്റ് എല്ലാ അവാര്‍ഡുകള്‍ക്കും അവാര്‍ഡ് ജേതാക്കള്‍ക്കെല്ലാം പ്രൊഫൈല്‍ കാണിച്ച ശേഷമാണ് പുരസ്‌കാരം നല്‍കിയതെന്നും എന്നാല്‍ പൃഥ്വിരാജിന്റെ മാത്രം പ്രൊഫൈല്‍ കാണിച്ചില്ല എന്നതുമാണ് കാരണമായിപ്പറയുന്നത്. ഫിലിം അവാര്‍ഡിലെ ഏറ്റവും വലിയ അവാര്‍ഡില്‍ ഒന്നാണ് പൃഥ്വി നേടിയത്. പുരസ്‌കാരം സമ്മാനിക്കാനായി തമിഴ് നടന്‍ വിക്രം പൃഥ്വിരാജിന്റെ പേര് പ്രഖ്യാപിച്ച ശേഷം, സ്‌ക്രീനില്‍ പ്രൊഫൈല്‍ വരുമെന്ന് പ്രതീക്ഷിച്ച് പൃഥ്വിരാജും ഇരുന്നു. എന്നാല്‍ പ്രൊഫൈല്‍ കാണിച്ചില്ല.
ഇത് കൂടാതെ ബെസ്റ്റ് ആക്ടര്‍ അവാര്‍ഡ് നോമിനേഷന്‍ ലിസ്റ്റില്‍ ബാക്കി അഭിനേതാക്കളുടെ എല്ലാം ഒന്നില്‍ കൂടുതല്‍ ചിത്രങ്ങള്‍ പ്രദര്‍ശിപ്പിച്ചപ്പോള്‍, 2015 ല്‍ തൊട്ടതെല്ലാം പൊന്നാക്കിയ പൃഥ്വിരാജിന്റെ ഒരു പടം മാത്രമേ കാണിച്ചുള്ളൂ എന്നതും ആക്ഷേപിക്കുന്നതിന് തുല്യമാണെന്ന് ആരാധകര്‍ പറയുന്നു. ഇതൊക്കെ കൂടിയായപ്പോള്‍ പൃഥ്വി ആരാധകര്‍ക്ക് കടുത്ത നിരാശയിലാണ്. ചാനലിനോട് പകരം ചോദിക്കണമെന്ന് പറഞ്ഞു കൊണ്ട് അദ്ദേഹത്തിന്റെ ആരാധകര്‍ ഫേസ്ബുക്കില്‍ ഇപ്പോള്‍ നിരന്തരമായി പോസ്റ്റുകളിടുന്നുണ്ട്. പൃഥ്വിരാജിന്റെ ഫേസ്ബുക്ക് പോസ്റ്റില്‍ തന്നെ കമന്റുകളായി ഇക്കാര്യം കാണിക്കുന്നുണ്ട്.
സംഗതി ഏഷ്യാനെറ്റായതു കൊണ്ട് പൃഥ്വി പരിഭവം പുറത്തു പറയുന്നില്ലെന്നേയുള്ളൂ. ഉള്ളില്‍ നന്നായി വേദനയുണ്ട്. ഏറ്റവും മികച്ച നടന്റെ അഭിനയ മുഹൂര്‍ത്തങ്ങള്‍ ജനങ്ങളുടെ മുമ്പില്‍ കാണിക്കാത്തത് വലിയ നഷ്ടമായിപ്പോയി. പരിപാടി നടക്കുന്ന സമയത്ത് പ്രൊഫൈല്‍ കാണിക്കാന്‍ എന്തെങ്കിലും സാങ്കേതിക തടസം ഉണ്ടായിരുന്നെങ്കില്‍ പിന്നീട് പരിപാടി ടെലികാസ്റ്റ് ചെയ്യാനായി എഡിറ്റ് ചെയ്ത് കാണിക്കാമായിരുന്നല്ലോ എന്നാണ് അടുത്ത സുഹൃത്തുക്കള്‍ ചോദിക്കുന്നത്. അതിനാലാണ് ഇത് മനപൂര്‍വമായ അവഹേളനമായി കരുതുന്നതും.
മാത്രമല്ല മഹാനടന്‍ മോഹന്‍ലാലിന് മണിക്കൂറുകളാണ് നല്‍കിയത്. ഈ പരിപാടി മോഹന്‍ലാലിന് ലാലിസത്തില്‍ നിന്നുള്ള കേടുപാട് തീര്‍ക്കാനായെന്ന് ഏഷ്യാനെറ്റ് ചെയര്‍മാന്‍ പോലും പറഞ്ഞു. മോഹന്‍ലാലിന്റെ പ്രകടനത്തിന് തികഞ്ഞ കൈയ്യടിയും ലഭിച്ചു. അതിന് ശേഷമാണ് ഒരു ചടങ്ങ് പോലെ പൃഥ്വിരാജിന് മികച്ച നടനുള്ള അവാര്‍ഡ് നല്‍കിയത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha