നടിയും അവതാരകയുമായ ആര്യയും കൊറിയോഗ്രാഫറും ഡിജെയുമായ സിബിന്‍ ബെഞ്ചമിനും അടുത്തിടെയാണ് വിവാഹിതരായത്. ഇപ്പോഴിതാ ഇരുവരുടേയും സംഗീത് പരിപാടിക്കിടെയുള്ള ഒരു വീഡിയോ സോഷ്യല്‍ മീഡിയയില്‍ ശ്രദ്ധ നേടുകയാണ്. വികാരാധീനയായാണ് വീഡിയോയില്‍ ആര്യ സംസാരിച്ചത്. സോഷ്യല്‍ മീഡിയയില്‍ തങ്ങളെ ചീത്ത വിളിക്കുന്ന ഒരുപാടു പേരുണ്ടെന്നും എന്നാല്‍ ആര് എന്തു പറഞ്ഞാലും തനിക്കൊരു പ്രശ്‌നവും ഇല്ലെന്നും ആര്യ പറയുന്നു.

''എനിക്ക് പറയാന്‍ വാക്കുകളില്ല. കുറേപ്പേര്‍ എന്നോട് ചോദിച്ചു, എന്തുകൊണ്ടാണ് സിബിനെ തിരഞ്ഞെടുത്തത് എന്ന്. സോഷ്യല്‍ മീഡിയയില്‍ ഞങ്ങളെ ചീത്ത വിളിക്കുന്ന ഒരുപാടു പേരുണ്ട്. ഞങ്ങളുടെ വീഡിയോകള്‍ക്കും ഫോട്ടോകള്‍ക്കുമൊക്കെ താഴെ, ഇവന് ഭ്രാന്താണ്, ഇവള്‍ ഉഡായിപ്പാണ് എന്നൊക്കെ പറയുന്നവരാണ് കൂടുതലും. അങ്ങനെ പറയുന്നവരോട് എനിക്ക് പറയാനുള്ളത് ഇതാണ്: ഇതാണ് ഞാന്‍ വിവാഹം കഴിച്ചയാള്‍, ഇതാണ് എന്റെ നല്ല പാതി, ഇതാണ് എന്റെ ഭര്‍ത്താവ്.

എന്റെ ജീവിതത്തില്‍ എന്റെ അച്ഛന്‍ കഴിഞ്ഞാല്‍ എന്നെ ഇത്രയധികം കെയര്‍ ചെയ്ത്, എന്നെ കൈപിടിച്ച് ഉയര്‍ത്തിയ മറ്റൊരാളില്ല. അവന് അവനല്ല പ്രധാനം, ഞാനാണ് പ്രധാനം. എന്റെയും ഖുഷിയുടെയും നല്ലതിനു വേണ്ടി അവന്‍ ഏതറ്റം വരെയും പോകും. ഇനിയെനിക്ക് ജീവിതത്തില്‍ ഒന്നും വേണ്ട. എനിക്ക് ജീവിതത്തില്‍ കിട്ടാവുന്ന ഏറ്റവും വലിയ സമ്മാനമാണ് ഇത്. ഇവിടെ ഇരിക്കുന്ന ഓരോരുത്തരും എനിക്ക് പ്രിയപ്പെട്ടവരാണ്.

ഇതിനപ്പുറത്തേക്ക് സത്യമായും എനിക്ക് ഒന്നും വേണ്ട. സോഷ്യല്‍ മീഡിയയില്‍ എന്നെ ആരു ചീത്ത വിളിച്ചാലും എനിക്കൊരു തേങ്ങയുമില്ല. ഇതാണ് ഞങ്ങള്‍. ഞങ്ങളെ സ്‌നേഹിക്കുന്ന ഒരു പറ്റം ആളുകളാണ് ഇവിടെ ഉള്ളത്. ഞങ്ങളുടെ ഈ യാത്രയുടെ ഭാഗമായതിന് നന്ദി'', ആര്യ പറഞ്ഞു.