നടന്‍ വിജയ് ദേവരകൊണ്ട സഞ്ചരിച്ച കാര്‍ അപകടത്തില്‍ പെട്ടു
തെലുങ്ക് താരം വിജയ് ദേവരകൊണ്ട സഞ്ചരിച്ച കാര്‍ അപകടത്തില്‍ പെട്ടു. അപകടത്തില്‍ നിന്ന് വിജയ് ദേവരകൊണ്ട അദ്ഭുതകരമായി രക്ഷപ്പെട്ടു. ആന്ധ്രപ്രദേശിലെ പുട്ടപര്‍ത്തിയില്‍ നിന്ന് ഹൈദരാബാദിലേക്ക് യാത്ര ചെയ്യുകയായിരുന്ന നടന്റെ വാഹനത്തില്‍ മറ്റൊരു കാര്‍ പിന്നില്‍ നിന്ന് ഇടിക്കുകയായിരുന്നു. തെലങ്കാനയിലെ ജോഗുലാം ഗദ്വാള്‍ ജില്ലയില്‍ ഹൈദരാബാദ് ബംഗളുരു ഹൈവേയില്‍ തിങ്കളാഴ്ച രാവിലെയാണ് സംഭവം.
അപകടത്തില്‍ താരത്തിന്റെ ലെക്‌സസ് എല്‍.എം 350 എച്ച് കാറിന് കേടുപാടുകള്‍ സംഭവിച്ചിട്ടുണ്ട്. സംഭവത്തില്‍ ആര്‍ക്കും പരിക്കേറ്റിട്ടില്ല. ഇടിച്ച കാര്‍ നിറുത്താതെ ഹൈദരാബാദ് ഭാഗത്തേക്ക് പോയതാണ് വിവരം. വിജയ് ദേവരകൊണ്ടയുടെ ഡ്രൈവര്‍ നല്‍കിയ പരാതിയില്‍ പൊലീസ് കേസെടുത്ത് അന്വേഷണം ആരംഭിച്ചു.
ഒക്ടോബര്‍ മൂന്നിനായിരുന്നു വിജയ് ദേവരകൊണ്ടയുടെയും നടി രശ്മിക മന്ദാനയുടെയും വിവാഹ നിശ്ചയം. ഇരുവരുടെയും കുടുംബാംഗങ്ങളും അടുത്ത സുഹൃത്തുക്കളും മാത്രമാണ് ചടങ്ങില്‍ പങ്കെടുത്തത്. വിവാഹ നിശ്ചയത്തിന് ശേഷം വിജയ് കുടുംബത്തോടൊപ്പം പുട്ടപര്‍ത്തിയിലെ ശ്രീസത്യസായി ബാബയുടെ പ്രശാന്തി നിലയം സന്ദര്‍ശിച്ചിരുന്നു. അവിടെ നിന്ന് ഹൈദരാബാദിലേക്ക് മടങ്ങിവരുന്ന വഴിയിലാണ് അപകടമുണ്ടായത്.
https://www.facebook.com/Malayalivartha
