ശ്രീജാ രവിയുടെ മകളും നടിയുമായ രവീണാ രവി വിവാഹിതയായി
ഡബ്ബിങ് ആര്ട്ടിസ്റ്റും നടിയുമായ ശ്രീജാ രവിയുടെ മകളും തെന്നിന്ത്യന് നടിയും ഡബ്ബിങ് ആര്ട്ടിസ്റ്റുമായ രവീണാ രവി വിവാഹിതയായി. 'വാലാട്ടി' എന്ന ചിത്രത്തിന്റെ സംവിധായകന് ദേവന് ജയകുമാറിനെയാണ് രവീണ വിവാഹം ചെയ്തത്. വിവാഹത്തിന്റെ ചിത്രങ്ങള് ശ്രീജാ രവി തന്നെയാണ് സാമൂഹികമാധ്യമങ്ങളിലൂടെ പങ്കുവെച്ചത്.
ശ്രീജയുടെ ഭര്ത്താവ് രവീന്ദ്രനാഥ് 2021 ഓഗസ്റ്റിലാണ് അന്തരിച്ചത്. അദ്ദേഹത്തിന്റെ വിയോഗം കാരണമാണ് ആഘോഷങ്ങള് ഒഴിവാക്കി വിവാഹം ലളിതമായി നടത്തിയത്. മകള് രവീണ ജീവിതത്തിലെ മനോഹരമായൊരു അധ്യായം ആരംഭിക്കുകയാണ് എന്ന് ശ്രീജാ രവി സാമൂഹികമാധ്യമ പോസ്റ്റില് പറഞ്ഞു. അടുത്ത കുടുംബാംഗങ്ങളുടേയും ചുരുക്കം സുഹൃത്തുക്കളുടേയും സാന്നിധ്യത്തില് തീര്ത്തും സ്വകാര്യമായാണ് വിവാഹം നടത്തിയത്.
50 വര്ഷത്തെ സിനിമാ യാത്രയില് ജീവിതത്തിന്റെ ഭാഗമായ എല്ലാ സിനിമാ പ്രവര്ത്തകര്ക്കുമൊപ്പം ആഘോഷമായി വിവാഹം നടത്തണമെന്നതായിരുന്നു സ്വപ്നം. എന്നാല് രവിയേട്ടന് (ശ്രീജാ രവിയുടെ ഭര്ത്താവ്) ഇല്ലാതെ ഈ ചടങ്ങ് ആഘോഷിക്കാന് കഴിയുമായിരുന്നില്ല. വലിയ ആഘോഷം നടത്താനുള്ള ശാരീരികമോ മാനസികമോ ആയ അവസ്ഥയിലായിരുന്നില്ല താനെന്നും ശ്രീജാ രവി പറയുന്നു.
ദേവനെ പോലെ സ്നേഹനിധിയായ മകനേയും അവനിലൂടെ ഒരു കുടുംബത്തേയും ലഭിച്ചതില് ഏറെ സന്തോഷവതിയാണെന്ന് പറഞ്ഞ ശ്രീജ ഒപ്പം നിന്ന എല്ലാവര്ക്കും പേരെടുത്ത് പറഞ്ഞ് നന്ദി പറഞ്ഞു. ദേവന്റെ പിതാവ് ജയന് മുളങ്കാട് നിര്മാതാവെന്ന നിലയിലും സംവിധായകനെന്ന നിലയിലും മലയാള സിനിമയ്ക്ക് ഒട്ടേറെ സംഭാവനകള് നല്കിയിട്ടുണ്ട്. അമ്മ കലാ ജയന് ആലപ്പുഴ എസ്ഡി കോളേജിലെ പ്രൊഫസറായിരുന്നു. സഹോദരി ദേവി ജയന് ഷിക്കാഗോ യൂണിവേഴ്സിറ്റിയിലെ സൈക്കോളജിസ്റ്റാണ്. അവര് കുടുംബസമേതം യുഎസ്സില് താമസമാണ്. വിവാഹം അറിയിക്കാനോ ക്ഷണിക്കാനോ കഴിയാതിരുന്നതില് ക്ഷമ ചോദിക്കുന്നുവെന്ന് പറഞ്ഞ ശ്രീജാ രവി എല്ലാവരുടേയും അനുഗ്രഹമുണ്ടാകണമെന്നും അഭ്യര്ഥിച്ചു.
വാനപ്രസ്ഥം എന്ന മോഹന്ലാല് ചിത്രത്തില് ഡബ്ബ് ചെയ്തുകൊണ്ടാണ് കുട്ടിയായിരിക്കെ രവീണാ രവി സിനിമാ ലോകത്തേക്ക് കടന്നുവരുന്നത്. എഫ്ഐആര്, ദുബായ് എന്നീ ചിത്രങ്ങള് ഉള്പ്പെടെ നിരവധി മലയാള ചിത്രങ്ങളിലും ദക്ഷിണേന്ത്യയിലെ മറ്റ് ഭാഷകളിലെ ചിത്രങ്ങളിലും രവീണ ശബ്ദസാന്നിധ്യമായി. വാലാട്ടി എന്ന ചിത്രത്തിലും താരം ഡബ് ചെയ്തിട്ടുണ്ട്. നിത്യഹരിതനായകന്, ആസാദി എന്നീ മലയാള ചിത്രങ്ങളിലും മാമന്നന് ഉള്പ്പെടെയുള്ള തമിഴ് ചിത്രങ്ങളിലും രവീണ തന്റെ അഭിനയപാടവവും പ്രകടമാക്കി. വിവാഹശേഷവും അഭിനയവും ഡബ്ബിങ്ങും തുടരാനാണ് രവീണയുടെ തീരുമാനം.
https://www.facebook.com/Malayalivartha
