പ്രേമലു എന്ന ചിത്രത്തിലൂടെ മലയാളികള്‍ക്ക് പ്രിയപ്പെട്ട നടനാണ് നസ്ലെന്‍. മലയാളത്തിലെ ഏറ്റവും കൂടുതല്‍ കളക്ഷന്‍ നേടിയ ചിത്രമായ ലോകയിലും പ്രധാന വേഷമായിരുന്നു നസ്ലെന്‍ ചെയ്തിരുന്നത്. അഭിനവ് സുന്ദര്‍ നായക് സംവിധാനം ചെയ്യുന്ന മോളിവുഡ് ടൈംസ് ആണ് നസ്ലെന്റെ ഏറ്റവും പുതിയ ചിത്രം. ജൂണ്‍ അഞ്ചിനാണ് ചിത്രം തിയേറ്ററുകളില്‍ എത്തുന്നത്. ഇത് കൂടാതെ മമ്മൂട്ടിയുടെ കൂടെ ഖാലിദ് റഹ്മാന്‍ സംവിധാനം ചെയ്യുന്ന മട്ടാഞ്ചേരി മാഫിയ, ജിത്തു മാധവന്‍ സൂര്യ ചിത്രം, തരുണ്‍ മൂര്‍ത്തി ഫഹദ് ഫാസില്‍ ചിത്രം, ആസിഫ് അലിയെ നായകനാക്കി രോഹിത് വിഎസ് ഒരുക്കുന്ന ടിക്കി ടാക്ക തുടങ്ങിയവയിലെല്ലാം നസ്ലെന്‍ പ്രധാന വേഷത്തിലെത്തുന്നുണ്ട്.

അതില്‍ തന്നെ ഏറ്റവും പ്രതീക്ഷയുള്ള ചിത്രങ്ങളില്‍ ഒന്നാണ് ഖാലിദ് റഹ്മാന്‍ മമ്മൂട്ടി ചിത്രമായ മട്ടാഞ്ചേരി മാഫിയ. നേരത്തെ മമ്മൂട്ടിയുമായി ഒരുമിച്ച് അഭിനയിക്കാന്‍ അവസരമുണ്ടായിരുന്നുവെന്നാണ് നസ്ലെന്‍ പറയുന്നത്. സത്യന്‍ അന്തിക്കാട് ജയറാമിനെ നായകനാക്കി ഒരുക്കിയ മകള്‍ എന്ന ചിത്രത്തില്‍ ആദ്യം പ്ലാന്‍ ചെയ്തിരുന്നത് മമ്മൂട്ടിയെ ആയിരുന്നുവെന്നും പിന്നീടാണ് ജയറാം കാസ്റ്റ് ചെയ്യപ്പെട്ടതെന്നും നസ്ലെന്‍ പറയുന്നു. ചിത്രത്തില്‍ ശ്രദ്ധേയമായ വേഷത്തില്‍ നസ്ലെനും എത്തിയിരുന്നു.

'ഇതിന് മുമ്പ് മമ്മൂക്കയ്‌ക്കൊപ്പം അഭിനയിക്കാന്‍ അവസരം ലഭിച്ച രണ്ട് പ്രൊജക്ടുകളുണ്ടായിരുന്നു. പക്ഷേ അത് നടന്നില്ല. മകള്‍ എന്ന ചിത്രത്തില്‍ ആദ്യം മമ്മൂക്കയായിരുന്നു നായകനാകേണ്ടിയിരുന്നത്. പക്ഷേ പിന്നീടത് ഡേറ്റിന്റെ പ്രശ്‌നവും മറ്റ് പരിപാടികളും കാരണം മാറിപ്പോയി. എനിക്ക് തോന്നുന്നത് ഇതായിരിക്കും ചിലപ്പോള്‍ അതിന്റ കറക്ട് ടൈം.' നസ്ലെന്‍ പറയുന്നു. പുതിയ സിനിമയുമായി ബന്ധപ്പെട്ട പ്രൊമോഷന്‍ അഭിമുഖത്തിനിടെയായിരുന്നു നസ്ലെന്റെ പ്രതികരണം.

അതേസമയം ആഷിക് ഉസ്മാന്‍ പ്രൊഡക്ഷന്‍സിന്റെ ബാനറില്‍ ആഷിക് ഉസ്മാന്‍ തന്നെ നിര്‍മ്മിക്കുന്ന മോളിവുഡ് ടൈംസ് ഇതിനകം തന്നെ വലിയ പ്രതീക്ഷകള്‍ നല്‍കുന്ന ചിത്രമാണ്. 'മുകുന്ദന്‍ ഉണ്ണി അസോസിയേറ്റ്‌സ്' എന്ന ചിത്രത്തിന് ശേഷം അഭിനവ് സുന്ദര്‍ നായക് സംവിധാനം ചെയ്യുന്ന ഈ ചിത്രത്തിന്റെ തിരക്കഥ രചിക്കുന്നത് രാമു സുനിലാണ്. സംഗീത് പ്രതാപ്, ഷറഫുദ്ദീന്‍ എന്നിവരും ചിത്രത്തില്‍ എത്തുന്നുണ്ട്.