നടി അന്സിബ ഹസനെതിരെ കാരണം കാണിക്കല് നോട്ടീസ് നല്കി താരസംഘടനയായ 'അമ്മ'
സോഷ്യല്മീഡിയയിലൂടെയും മാദ്ധ്യമങ്ങളിലൂടെയും സംഘടനയ്ക്കെതിരെ നിരന്തരം പരസ്യ പ്രസ്താവനകള് നടത്തി 'അമ്മ'യെ തകര്ക്കാന് ശ്രമിച്ചെന്ന് കാട്ടിയാണ് നടി അന്സിബ ഹസനെതിരെ കാരണം കാണിക്കല് നോട്ടീസ്. സംഘടനയ്ക്കുള്ളില് രമ്യമായി പരിഹരിക്കാമായിരുന്ന പ്രശ്നങ്ങളെ തെരുവിലേക്ക് വലിച്ചിഴച്ച് സംഘടനയ്ക്ക് കളങ്കമുണ്ടാക്കിയെന്നാണ് ഭാരവാഹികളുടെ വിലയിരുത്തല്.
ബൈലോയ്ക്ക് വിരുദ്ധമായി അച്ചടക്കലംഘനം നടത്തിയ നടിക്കെതിരെ നടപടി സ്വീകരിക്കാതിരിക്കാനുള്ള കാരണം വ്യക്തമാക്കിക്കൊണ്ട് 17ാം തീയതിക്ക് മുമ്പ് മറുപടി നല്കണമെന്നാണ് നിര്ദേശം. മറുപടി തൃപ്തികരമല്ലെങ്കില് സസ്പെന്ഷന് ഉള്പ്പെടെയുള്ള ശക്തമായ നടപടികളിലേക്ക് സംഘടന കടക്കുമെന്നാണ് വിവരം.
നടി ലക്ഷ്മിപ്രിയയ്ക്കും തൃപ്പൂണിത്തുറ വനിതാ സ്റ്റേഷനിലെ എസ്ഐക്കുമെതിരെ അന്സിബ നല്കിയ പരാതിയില് കഴമ്പില്ലെന്ന പൊലീസ് റിപ്പോര്ട്ട് വന്നതിന് പിന്നാലെയാണ് താരസംഘടനയില് നിന്നും നടിക്ക് തിരിച്ചടി നേരിടേണ്ടിവന്നിരിക്കുന്നത്. വര്ഗീയ പരാമര്ശങ്ങളും ജാതി അധിക്ഷേപങ്ങളും നടത്തിയെന്ന് കാട്ടി നടന് ടിനി ടോമിനെതിരെയും അന്സിബ പരാതി നല്കിയിരുന്നു. കടവന്ത്ര പൊലീസില് നല്കിയ പരാതിയുമായി നടി മുന്നോട്ടുപോവുകയാണ്.
https://www.facebook.com/Malayalivartha
