സംസ്ഥാന സര്‍ക്കാരിനെതിരെ പ്രതിഷേധിച്ച് ഭാവന. ഓരോ സംഭവം ഉണ്ടാകുമ്പോഴും എല്ലാവരും പ്രതികരിക്കും ചിലര്‍ ഫേസ്ബുക്കില്‍ പോസ്റ്റ് ചെയ്യും. അതുകൊണ്ടായില്ല, ഇതിനൊക്കെ നിയമപരമായി ഉടന്‍ ആക്ഷന്‍ എടുക്കണം അല്ലെങ്കില്‍ കൃത്യമായ നിയമനിര്‍മ്മാണം വേണം. അല്ലാതെ പ്രതികരിച്ചിട്ട് കാര്യമില്ല. എല്ലാവര്‍ക്കും കുറച്ച് കാലത്തേക്ക് വിഷമവും സങ്കടവും ഉണ്ടാകുന്നു. പിന്നീട് അത് മറക്കുന്നു.
പുതിയ ചിത്രമായ വിളക്കുമരത്തിന്റെ പ്രഖ്യാപന ചടങ്ങിനിടെ സംഘടിപ്പിച്ച വാര്‍ത്ത സമ്മേളനത്തിലാണ് നടി തന്റെ അഭിപ്രായം തുറന്നടിച്ചത്. തനിക്ക് രാഷ്ട്രീയം ഇല്ലെന്നു വ്യക്തമാക്കിയ ഭാവന സ്ത്രീകളോടുള്ള അതിക്രമങ്ങള്‍ തടയുന്നതില്‍ സംസ്ഥാന സര്‍ക്കാര്‍ വന്‍ പരാജയമാണെന്നും പറഞ്ഞു. ഒരു രാഷ്ട്രീയപാര്‍ട്ടിയും ഭാഗല്ലെന്നും വാഗ്ദാനങ്ങള്‍ മാത്രമല്ലാതെ പ്രവര്‍ത്തിയിലൂടെ ഇവര്‍ ഇതൊക്കെ കാണിച്ചുതരണമെന്നും ഭാവന കൂട്ടിച്ചേര്‍ത്തു.
പീഡനം ഭയന്ന് പെണ്‍കുട്ടികള്‍ വീട്ടിലിരിക്കണം, ഈ സമയത്ത് ഇറങ്ങിപ്പോകരുത് എന്നു പറയാന്‍ പഴയ കാലമൊന്നുമല്ലല്ലോ? സ്വന്തമായി ജോലിചെയ്യുന്ന, കുറച്ച് താമസിച്ച് വീട്ടില്‍ വരുന്ന പെണ്‍കുട്ടികളാണ് ഭൂരിഭാഗവും ഉള്ളത്. ഇവരോടൊക്കെ വീട്ടിലിരിക്കാന്‍ പറയാന്‍ പറ്റില്ലല്ലോ? സിനിമയൊന്നും ഒരിക്കലും ഇത്തരം കാര്യങ്ങള്‍ക്ക് പ്രചോദനമാകുന്നില്ല. സിനിമയില്‍ ഹീറോ ഒരു പെണ്‍കുട്ടിയെ ബഹുമാനിക്കുകയും സംരക്ഷിക്കുകയും വില്ലന്മാരുടെ അടുത്തുനിന്ന് രക്ഷപ്പെടുത്തുകയും ചെയ്യുന്നു. ഇതൊന്നും ഇവിടാരും ചെയ്യുന്നില്ല. സിനിമ ഒരിക്കലും ഇതിന് പ്രചോദനമല്ല. ഭാവന പറഞ്ഞു. കഠിന നിയമങ്ങള്‍ നിലവിലുള്ള രാജ്യങ്ങളിലെ സ്ഥിതി നമുക്ക് അറിവുള്ളതാണ്. അവിടെ ഇത്തരം സംഭവങ്ങള്‍ കുറവാണെന്നും വ്യക്തമാക്കി.
ജിഷയുടെ കൊലപാതക സംഭവത്തെക്കുറിച്ചുള്ള മാദ്ധ്യമ പ്രവര്‍ത്തകരുടെ ചോദ്യങ്ങള്‍ക്കാണ് ഭാവന വ്യക്തവും ശക്തവുമായ മറുപടി പറഞ്ഞത്. സ്ത്രീകള്‍ക്ക് സുരക്ഷ ഉറപ്പാക്കുന്ന കാര്യത്തില്‍ ചില വീഴ്ചകളുണ്ട് . ഇതുകൊണ്ടാണ് സംസ്ഥാനത്ത് ജിഷാവധം പോലെയുള്ള സംഭവങ്ങള്‍ ഉണ്ടാകുന്നത്. കുറ്റവാളികള്‍ക്കെതിരെ ഗവണ്‍മെന്റ് കൃത്യമായും ശക്തമായും നടപടികളെടുത്താല്‍ ഇത്തരം സംഭവങ്ങള്‍ ആവര്‍ത്തിക്കപ്പെടാതിരിക്കും. കേരളം, ഗുജറാത്ത്, ഡല്‍ഹി ഉള്‍പ്പെടെ ഇന്ത്യയില്‍ സ്ത്രീകള്‍ക്ക് സുരക്ഷിതമായി ജീവിക്കാനുള്ള സാഹചര്യമില്ല. ജിഷാ വധത്തില്‍ സമൂഹ മാദ്ധ്യമങ്ങളുള്‍പ്പെടെ നന്നായി പ്രതികരിച്ചതുകൊണ്ടു മാത്രം ഒന്നുമാകുന്നില്ല. സര്‍ക്കാരിന്റെ ഭാഗത്തുനിന്ന് ശക്തമായ നടപടികളും ഉണ്ടാവണം.
സോഷ്യല്‍ മീഡിയയില്‍ പതിവായി പ്രതികരിക്കുന്ന ആളല്ല താന്‍. സ്ത്രീകളുടെ സമീപനമോ പെരുമാറ്റമോ അല്ല ഇത്തരം സംഭവങ്ങളിലേക്കു നയിക്കുന്നത്. പുതിയ തലമുറയിലെ പെണ്‍കുട്ടികളോട് വീട്ടില്‍ ഇരിക്കാന്‍ പറയാന്‍ കഴിയുമോ. രാത്രി വൈകിയൊക്കെ വീട്ടിലെത്തുന്നവരാണ് പലരും. ബിക്കിനി ധരിക്കുകയും ജീന്‍സ് ധരിക്കകുയും ചെയ്യുന്ന പെണ്‍കുട്ടികള്‍ മാത്രമല്ല ആക്രമിക്കപ്പെടുന്നത്. മാറേണ്ടത് പുരുഷന്റെ ചിന്തയും ചിന്താഗതികളുമാണ്. ഏത് മാനസികാവസ്ഥയിലാണ് പുരുഷന്മാര്‍ ഇത്തരം അവസ്ഥയിലെത്തുന്നതെന്ന് തനിക്കറിയില്ല. ലൈംഗിക നൈരാശ്യം പോലുള്ള മാനസികാവസ്ഥയും കാരണമാവാമെന്നും ഭാവന കൂട്ടിച്ചേര്‍ത്തു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha