മുതിർന്ന തെലുങ്ക് നടനും സംവിധായകനും നിർമാതാവുമായ ഗിരി ബാബു(80 ) അന്തരിച്ചു. വാർധക്യസഹജമായ ആരോഗ്യപ്രശ്നങ്ങളെത്തുടർന്ന് ഹൈദരാബാദ് കൊണ്ടാപൂരിലെ സ്വകാര്യ ആശുപത്രിയിൽ ചികിത്സയിലിരിക്കെയാണ് അന്ത്യം സംഭവിച്ചത്. ആന്ധ്രാ പ്രദേശ് മുഖ്യമന്ത്രി ചന്ദ്രബാബു നായിഡു, പവൻ കല്യാൺ, നടൻ ചിരഞ്ജീവി, സംവിധായകൻ അനിൽ രവിപുഡി, ആന്ധ്രാപ്രദേശ് മുൻ മുഖ്യമന്ത്രി വൈ.എസ്. ജഗൻ മോഹൻ റെഡ്ഡി തുടങ്ങിയവർ അനുശോചനം രേഖപ്പെടുത്തുകയും ചെയ്തു.

അഞ്ച് പതിറ്റാണ്ടിലേറെ നീണ്ട സിനിമാ ജീവിതത്തിൽ 600-ലധികം ചിത്രങ്ങളിൽ ഗിരി ബാബു അഭിനയിച്ചിട്ടുണ്ട്. വില്ലനായും ഹാസ്യതാരമായും സഹനടനായുമെല്ലാം സ്‌ക്രീനിൽ തന്റേതായ വ്യക്തിമുദ്ര പതിപ്പിക്കാനായി അദ്ദേഹത്തിന് കഴിഞ്ഞു. അഭിനയത്തിന് പുറമെ സംവിധായകൻ, നിർമ്മാതാവ് എന്നീ നിലകളിലും അദ്ദേഹം ശ്രദ്ധേയനായിരുന്നു.

ചെറുപ്പത്തിൽ തന്നെ നാടകങ്ങളിലും അഭിനയത്തിലും താത്പര്യം കാണിച്ചിരുന്ന അദ്ദേഹം 1973-ൽ 'ജഗമേ മായ' എന്ന ചിത്രത്തിലൂടെയാണ് സിനിമയിൽ അരങ്ങേറ്റം കുറിച്ചത്. തുടക്കത്തിൽ നായകവേഷങ്ങൾ ചെയ്ത അദ്ദേഹം പിന്നീട് വില്ലൻ വേഷങ്ങളിലൂടെയും സ്വഭാവവേഷങ്ങളിലൂടെയും ജനപ്രീതി നേടിയിരുന്നു.

അതേസമയം ഗിരിബാബുവിന്റെ മരണവാർത്ത ഞെട്ടലോടെയാണ് കേട്ടതെന്ന് നടൻ ചിരഞ്ജീവി എക്‌സിൽ കുറിച്ചു. 'വ്യത്യസ്തമായ അഭിനയത്തിലൂടെയും തനതായ ശൈലിയിലൂടെയും നടൻ, നിർമ്മാതാവ്, സംവിധായകൻ എന്നീ നിലകളിൽ നിരവധി ചിത്രങ്ങളിലൂടെ ഗിരിബാബു

തെലുങ്ക് ചലച്ചിത്ര മേഖലയ്ക്ക് നൽകിയ സംഭാവനകൾ എന്നെന്നും ഓർമ്മിക്കപ്പെടുകയും ചെയ്യും . അദ്ദേഹത്തിന്റെ വിയോഗം തെലുങ്ക് ചലച്ചിത്ര വ്യവസായത്തിന് നികത്താനാവാത്ത നഷ്ടമാണ്. അദ്ദേഹത്തിന്റെ ആത്മാവിന് നിത്യശാന്തി ലഭിക്കാൻ ദൈവത്തോട് പ്രാർത്ഥിക്കുന്നു. അദ്ദേഹത്തിന്റെ കുടുംബാംഗങ്ങളെയും ആരാധകരെയും എന്റെ അഗാധമായ അനുശോചനം അറിയിക്കുന്നു,' ചിരംഞ്ജീവി കുറിക്കുകയായിരുന്നു.