കാൻസറിനോടുള്ള ദീർഘനാളത്തെ പോരാട്ടത്തിനൊടുവിൽ പുഞ്ചിരിയോടെ വിടപറഞ്ഞ സോഷ്യൽ മീഡിയ ഇൻഫ്ലുവൻസറും ചലച്ചിത്ര പ്രവർത്തകയുമായ ലേഖ അംബുജാക്ഷന്റെ വേർപാട് മലയാളി മനസ്സിനെ ഒന്നടങ്കം സങ്കടത്തിലാഴ്ത്തിയിരിക്കുകയാണ്. രോഗാവസ്ഥയുടെ കഠിനമായ ഘട്ടങ്ങളിലും പ്രത്യാശ കൈവിടാതെ മുന്നോട്ടുപോയ ലേഖയുടെ വിയോഗം തങ്ങൾക്ക് താങ്ങാൻ കഴിയുന്നതിലും അപ്പുറമാണെന്ന് വ്യക്തമാക്കുകയാണ് ഭർത്താവ് അംബുജാക്ഷൻ. 'എന്റെ മോളില്ലാതെ എനിക്ക് ഉറങ്ങാൻ പറ്റുന്നില്ല' എന്ന് നെഞ്ചുപൊട്ടി അദ്ദേഹം പറയുമ്പോൾ അത് കേൾക്കുന്ന ഏവരുടെയും കണ്ണുകളെ ഈറനണിയിക്കുകയാണ്. ഒരു ആയുസ്സിന്റെ പകുതിയും കൂടെയുണ്ടായിരുന്ന പങ്കാളി പെട്ടെന്ന് ഇല്ലാതാകുമ്പോഴുണ്ടാകുന്ന ശൂന്യത മുഴുവൻ നിഴലിക്കുന്നതാണ് അദ്ദേഹം സോഷ്യൽ മീഡിയയിൽ പങ്കുവെച്ച ആ വൈകാരിക വീഡിയോ.