മലയാള സിനിമയില്‍ വളര്‍ന്നുവരുന്നവരെ ഒതുക്കാന്‍ ഒരു കോക്കസ് പ്രവര്‍ത്തിക്കുന്നുണ്ടെന്ന് മലയാളിയായ തെന്നിന്ത്യന്‍ നടി ഇനിയ. അവരുടെ സപ്പോര്‍ട്ട് ഉണ്ടെങ്കില്‍ മാത്രമേ മലയാളസിനിമയില്‍ കാര്യങ്ങള്‍ നടക്കൂ. കോക്കസുകളുടെ നാലഞ്ചു ഗ്രൂപ്പ് ഇവിടെയുണ്ട്. ആ ഗ്രൂപ്പില്‍ അംഗമായാല്‍ മാത്രമേ നമുക്കു മുന്നോട്ടു പോകാനാകൂ. ഒരു ഡയറക്ടര്‍, പ്രൊഡ്യൂസര്‍, കാമറാമാന്‍, മ്യൂസിക് ഡയറക്ടര്‍ എന്നിവരൊക്കെയടങ്ങിയതാണ് ഈ ഗ്രൂപ്പുകള്‍. ഞാന്‍ വളരെ സ്‌ട്രെയിറ്റ് ഫോര്‍വേഡായി ചിന്തിക്കുന്ന ആളാണ്. ഫ്രീയായി വര്‍ക്ക് ചെയ്യണമെന്നും ആഗ്രഹിക്കുന്നു.

ഇവരുടെ ഈ സ്‌റ്റൈല്‍ എനിക്കിഷ്ടമല്ല. എനിക്കിഷ്ടമായ പ്രൊജക്ടുകള്‍ മാത്രമേ ഞാന്‍ സ്വീകരിക്കൂ. എനിക്കു കിട്ടുന്ന അവസരങ്ങളില്‍ ഞാന്‍ സംതൃപ്തയാണെന്നും ഇനിയ പറഞ്ഞു. രാഷ്ട്ര ദീപികയ്ക്ക് നല്‍കിയ അഭിമുഖത്തിലാണ് ഇനിയയുടെ വെളിപ്പെടുത്തല്‍.
കഴിവുള്ള പല മലയാളി നടിമാരെയും മലയാളത്തിലെ സംവിധായകര്‍ തഴയുകയാണ്. വിദേശത്തു നിന്നും കേരളത്തിനു പുറത്തുനിന്നുമുള്ളവരെയാണ് പല സംവിധായകരും നായികമാരാക്കുന്നത്. നല്ല കഥാപാത്രമായിരിക്കും അവര്‍ക്കു നല്‍കുന്നത്. പക്ഷേ അതു ചെയ്യാന്‍ പറ്റിയ കഴിവുള്ളവരെ ആയിരിക്കില്ല ഇവര്‍ സെലക്ട് ചെയ്യുക.

തുറന്നുപറയുകയാണ് ഞാന്‍ വലിയ കഴിവുള്ള നടിയാണെന്നൊന്നും പറയുന്നില്ല. പക്ഷേ കഴിവില്ലാത്ത നടിമാരെ കൊണ്ടുവരുന്നവര്‍ ഒന്നു ചിന്തിക്കണം, ഇവിടെ എത്രയോ കഴിവുള്ള നടിമാര്‍ ഉണ്ടെന്നുള്ള കാര്യം. മുറ്റത്തെ മുല്ലയ്ക്കു മണമില്ല എന്നു പറയുന്നതുപോലെ.
ഒരു സെലിബ്രിറ്റി ഫോട്ടോഗ്രാഫര്‍ നേരത്തെ എന്റെ ചിത്രങ്ങളെടുത്തിരുന്നു.

അതു ഞങ്ങള്‍ റഫായി ഷൂട്ട് ചെയ്തതാണ്. എഡിറ്റ് ചെയ്യുന്നതിനു മുമ്ബു തന്നെ ആ ചിത്രങ്ങള്‍ പുറത്തുവിടേണ്ടെന്നു ഞാന്‍ പറഞ്ഞിരുന്നു. മുമ്ബു വേണ്ടായെന്നു പറഞ്ഞ ചിത്രങ്ങള്‍ മൂന്നു വര്‍ഷത്തിനു ശേഷം പ്രമുഖ മാഗസിനു കൊടുക്കുകയായിരുന്നു. വ്യക്തതയൊന്നുമില്ലാത്ത ചിത്രമായിരുന്നു അത്. അതു പുറത്തു വന്നപ്പോള്‍ എനിക്കതു ഷോക്കായി. അപ്പോള്‍ ഞാനതെക്കുറിച്ചു ചോദിച്ചു. ചെയ്യരുത്, വേണ്ട എന്നു പരസ്പരധാരണയിലെത്തിയ ഫോട്ടോ എങ്ങനെ പുറത്തുവന്നു എന്നു ഞാന്‍ ചോദിച്ചു. അതേത്തുടര്‍ന്നു ചില തര്‍ക്കങ്ങളുമുണ്ടായി.

വടിവൊത്ത ശരീരവും അതു കാണികള്‍ക്ക് ആസ്വാദ്യകരവുമെങ്കില്‍ ഗ്ലാമര്‍വേഷം ചെയ്യാന്‍ എന്തിനു മടി കാണിക്കണം. ഓരോ നടിയുടെയും കംഫര്‍ട്ടബിള്‍ ലെവലാണ് എത്രത്തോളം ഗ്ലാമര്‍ ചെയ്യണമെന്നത്. തമന്ന, നയന്‍താര എന്നീ നടിമാരുടെ ഗ്ലാമര്‍ കാണാന്‍ തന്നെയാണ് പ്രേക്ഷകര്‍ തിയ്യെറ്ററുകളിലെത്തുന്നത്. അഭിനയം കാണാനൊന്നുമല്ല, അവരുടെ സൗന്ദര്യം കാണാന്‍ തന്നെയാണെത്തുന്നത്.

അതുപോലെ വടിവൊത്ത ശരീരവും അതു കാണികള്‍ക്ക് ആസ്വാദ്യകരവുമെങ്കില്‍ ഗ്ലാമര്‍വേഷം ചെയ്യുന്നതില്‍ തെറ്റില്ലെന്നാണ് എന്റെ അഭിപ്രായം. എന്നുവച്ച് ഓവറാകാന്‍ ഞാനില്ല. മോഡേണ്‍ വേഷങ്ങള്‍ ധരിക്കുന്ന കുട്ടിയാണ് ഞാന്‍. അങ്ങനെ എനിക്കു കംഫര്‍ട്ടബിളായ വേഷങ്ങള്‍ അണിഞ്ഞു സിനിമയിലെത്തുന്നതിലും വിരോധമില്ലെന്നും താരം വ്യക്തമാക്കുന്നു.