സിനിമയില്‍ മാത്രമല്ല ജീവിതത്തിലും മോഹന്‍ലാല്‍ നല്ല ഫൈറ്ററാണെന്ന് സുഹൃത്തും നടനുമായ മണിയന്‍പിള്ള രാജു. ഒന്നാണ് നമ്മള്‍ എന്ന സിനിമയുടെ ഷൂട്ടിംഗ് വര്‍ക്കലയില്‍ നടന്നപ്പോഴുണ്ടായ ഒരു സംഭവം മറക്കാന്‍ കഴിയില്ലെന്നും അദ്ദേഹം പറഞ്ഞു. ഞാനും ലാലും ലൊക്കേഷനില്‍ ചെല്ലുമ്പോള്‍ അവിടെ പൊരിഞ്ഞ അടി നടക്കുകയാണ്. പ്രൊഡക്ഷനിലുള്ള ഒരുത്തന്‍ പ്രദേശത്തുള്ള ഒന്‍പത് വയസുള്ള ഊമ പെണ്‍കുട്ടിയെ ഉപദ്രവിച്ചു. ആ കുട്ടി ശബരിമലയില്‍ പോകാന്‍ മാലയിട്ടിരിക്കുകയാണ്.  പത്തുപതിനഞ്ചു നാട്ടുകാര്‍ വടിയും തടിയും കൊണ്ട് പ്രൊഡക്ഷന്‍ ബോയിയെ അവനെ അടിച്ചു നിരപ്പാക്കി.  കുട്ടി മെസ്സില്‍ എന്തോ ചോദിച്ചു ചെന്നപ്പോള്‍  അവളെ ഉപദ്രവിക്കുകയായിരുന്നു. അപ്പോള്‍ ആളുകള്‍ അടിച്ച് ശരിയാക്കിയതില്‍ തെറ്റില്ല.

എന്നാല്‍ അടി പരിധിവിട്ട് കഴിഞ്ഞപ്പോള്‍ ലാല്‍ എതിര്‍ത്തു. അവന്‍ ചത്ത് പോകുമെന്ന് ലാല്‍ പറഞ്ഞു. എന്നിട്ടും ആളുകള്‍ നിര്‍ത്തുന്നില്ല. എനിക്ക് എന്ത് വേണമെന്ന് മനസ്സിലായില്ല. ഇത് വൃത്തി കെട്ട കേസാണ്. ഒരു മാതിരി ആളുകള്‍ അതില്‍ ഇടപെടുകയില്ല. ചിലപ്പോള്‍ നമുക്കും അടി കിട്ടും. 'നിന്റെ മോളാണ് ഈ സ്ഥാനത്ത് എങ്കില്‍' എന്ന് ആളുകള്‍ ചോദിച്ചാല്‍ എന്തുണ്ട് മറുപടി? ഞാന്‍ പോലീസിനു ഫോണ്‍ ചെയ്തു. മോഹന്‍ലാല്‍ പറഞ്ഞു 'നിങ്ങള്‍ ഇയാളെ തള്ളിക്കൊല്ലുകയൊന്നും വേണ്ട. അയാള്‍ ചെയ്തത് വൃത്തി കേടാണ്. പക്ഷേ അതിനിവിടെ പൊലീസും നിയമവും ഒക്കെയുണ്ട്' അപ്പോള്‍ നാട്ടുകാരില്‍ ചിലര്‍ 'നീ ആരാട ചോദിക്കാന്‍' എന്ന് ചോദിച്ച് ലാലിനെ തല്ലാന്‍ മുന്നോട്ടാഞ്ഞു. ആ സമയത്താണ് പലരെയും അടിച്ചെടുത്ത് ദൂരെ കളയുന്ന മോഹന്‍ലാലിന്റെ ധൈര്യം ഞാന്‍ കണ്ടത്. 

മൂന്നാലു പേര്‍ ഒരുമിച്ചു അടിക്കാന്‍ വന്നപ്പോഴാണ് ലാലിന്റെ ആയോധന കല ഞാന്‍ മനസ്സിലാകുന്നത്. ലാല്‍ അവിടെ കിടന്ന ഒരു തടിയെടുത്ത് കയ്യില്‍ പിടിച്ചു.  'പോലീസ് വരുന്നത് വരെ ആരും ഇവനെ തോട്ടു പോകരുത്. അവന്‍ ചത്ത് പോകാന്‍ സാധ്യതയുണ്ട്'. അതോടെ എല്ലാവരും അകന്നു മാറിനിന്നു.

ഏതായാലും പോലീസ് വന്നു. കേസായി. അവസാനം അതെങ്ങനെ പരിണമിച്ചു എന്നെനിക്കറിയില്ല. പക്ഷേ അവന്‍ ചത്ത് പോകുമെന്ന് തോന്നിയപ്പോള്‍ രക്ഷിക്കാന്‍ ലാല്‍ ഇടപെട്ടത് എനിക്കു മറക്കാന്‍ കഴിയുകയില്ല. വേണമെങ്കില്‍ സ്വന്തം കാര്യം നോക്കി മാറി നില്‍ക്കാമായിരുന്നു, പക്ഷേ ലാല്‍ അത് ചെയ്തില്ല, ഇടപെട്ടു. പണ്ട് മോഹന്‍ലാല്‍ യൂണിവേഴ്‌സിറ്റി റസ്ലിംഗ് ചാമ്പ്യന്‍ ആയിരുന്നു. മൂന്നാലു പേര്‍ ലാലിന്റെ നേരെ വന്നിട്ടും ലാലിനെ ഒരു പുണ്ണാക്കും ചെയ്യാന്‍ കഴിഞ്ഞില്ല. ലാല്‍ അവരെ ഒരു ടെന്നീസ് ബോള്‍ ഇട്ടു തല്ലും പോലെയാണ് തല്ലിയത്. 

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha