ഇടുക്കി അടിമാലിയിൽ വലിയ ചർച്ചയായ സെലീന വധക്കേസിൽ പ്രതിക്ക് ജീവപര്യന്തം തടവ് വിധിച്ച് തൊടുപുഴ പ്രിൻസിപ്പൽ ജില്ലാ കോടതി. പ്രതിയായ തൊടുപുഴ വണ്ടമറ്റം സ്വദേശി ഗിരോഷിനാണ് (ഹിരോഷ്) കോടതി കഠിനശിക്ഷയും 25,000 രൂപ പിഴയും വിധിച്ചത്. 2017 ഒക്ടോബറിലായിരുന്നു കേരളത്തെ നടുക്കിയ ഈ ക്രൂരക്കൊലപാതകം നടന്നത്. അടിമാലി ഇരുമ്പുപാലം സ്വദേശിനിയായ 38 വയസ്സുകാരി സെലീനയാണ് സ്വന്തം വീട്ടിൽ വെച്ച് അതിക്രൂരമായി കൊല്ലപ്പെട്ടത്. പ്രതിയായ ഗിരോഷും ഒരു ആദിവാസി പെൺകുട്ടിയുമായുള്ള പ്രണയത്തിൽ ഇടപെട്ട് ഇരുവരുടെയും വിവാഹം നടത്തിക്കൊടുത്തത് സെലീനയായിരുന്നു. ഇതിനുപുറമേ ഇവർ തമ്മിൽ വലിയ രീതിയിലുള്ള സാമ്പത്തിക ഇടപാടുകളും നിലനിന്നിരുന്നു.

ഗിരോഷ് നൽകിയ പണം സെലീന തിരികെ നൽകാത്തതിനെച്ചൊല്ലി ഇവർക്കിടയിൽ ശക്തമായ തർക്കങ്ങൾ നിലനിന്നിരുന്നു. തുടർന്ന് ഗിരോഷിന്റെ ഭാര്യയുടെ പ്രസവാവശ്യത്തിനായി പണം തിരികെ ചോദിച്ചിട്ടും നൽകാതെ വന്നതോടെയാണ് സെലീനയെ വകവരുത്താൻ പ്രതി തീരുമാനിക്കുന്നത്.സംഭവദിവസം ഉച്ചയോടെ ബൈക്കിലെത്തിയ പ്രതി, കൈയിൽ കരുതിയിരുന്ന കഠാര ഉപയോഗിച്ച് സെലീനയുടെ കഴുത്തിൽ പലതവണ കുത്തി കൊലപ്പെടുത്തുകയായിരുന്നു. കൊലപാതകത്തിന് ശേഷം അവിടെനിന്നും രക്ഷപ്പെട്ട ഗിരോഷ്, മൂന്ന് മണിയോടെ വീണ്ടും സംഭവസ്ഥലത്ത് തിരിച്ചെത്തുകയും ക്രൂരതയുടെ ആഴം കൂട്ടി സെലീനയുടെ ഇടത് മാറിടം മുറിച്ചെടുത്ത് ബാഗിലാക്കി സ്വന്തം വീട്ടിലേക്ക് കടന്നുകളയുകയുമായിരുന്നു. കേസ് കൃത്യമായി അന്വേഷിച്ച പോലീസ് സംഘം പ്രതിയെ നിയമത്തിന് മുന്നിലെത്തിച്ചു. പ്രതിക്കെതിരെ കൊലപാതകം ഉൾപ്പെടെ മൂന്ന് വകുപ്പുകൾ തെളിഞ്ഞതോടെയാണ് കോടതി ഇപ്പോൾ ജീവപര്യന്തം തടവുശിക്ഷ വിധിച്ചിരിക്കുന്നത്.