എസ്.ഐ.ആര് കരട് വോട്ടര്‍ പട്ടികയില്‍ പേരില്ലാത്ത മുന്‍ വോട്ടര്‍മാര്‍ക്കും ഫോം 6 സമര്‍പ്പിക്കാം: വ്യക്തത വരുത്തി തിരഞ്ഞെടുപ്പ് കമ്മീഷന്‍
പ്രത്യേക തീവ്ര വോട്ടര്‍ പട്ടിക പുതുക്കല്‍ (എസ്.ഐ.ആര്) നടപടികളുടെ ഭാഗമായി പ്രസിദ്ധീകരിക്കുന്ന കരട് വോട്ടര്‍ പട്ടികയില്‍ പേരില്ലാത്ത മുന്‍ വോട്ടര്‍മാര്‍ക്കും അന്തിമ വോട്ടര്‍ പട്ടികയില്‍ പേര് ഉള്‍പ്പെടുത്തുന്നതിനായി ഫോം 6 സമര്‍പ്പിക്കാമെന്ന് ഇന്ത്യന്‍ തിരഞ്ഞെടുപ്പ് കമ്മീഷന്‍ വ്യക്തമാക്കി. മുമ്പ് വോട്ടര്‍ പട്ടികയില്‍ പേരുണ്ടായിരുന്നവരുടെ പേര് നിലവിലെ എസ്.ഐ.ആര് കരട് പട്ടികയില്‍ ഉള്‍പ്പെട്ടിട്ടില്ലെങ്കില്‍, ഫോം 6 സമര്‍പ്പിക്കുമ്പോള്‍ ആദ്യമായി വോട്ടര്‍ പട്ടികയില്‍ പേര് ചേര്‍ക്കുന്നതിനുള്ള അപേക്ഷയാണെന്ന വിവരം നല്‍കേണ്ടി വരുന്നത് തെറ്റായ പ്രഖ്യാപനമാകുമോ എന്ന ആശങ്ക ചില വോട്ടര്‍മാര്‍ക്കുണ്ടായിരുന്നു. ഇതിനെ തുടര്‍ന്നാണ് കമ്മീഷന്‍ ഇക്കാര്യത്തില്‍ വ്യക്തത വരുത്തിയത്.
കരട് വോട്ടര്‍ പട്ടികയില്‍ പേരില്ലാത്തവര്‍ക്ക് മുമ്പ് വോട്ടര്‍ പട്ടികയില്‍ പേരുണ്ടായിരുന്നുവെന്ന കാരണത്താല്‍ മാത്രം ഫോം 6 സമര്‍പ്പിക്കുന്നതിന് തടസമില്ല. എസ്.ഐ.ആര് നടപടികള്‍ക്കിടയിലോ അതിനുശേഷമോ അന്തിമ വോട്ടര്‍ പട്ടികയില്‍ പേര് ഉള്‍പ്പെടുത്തുന്നതിന് നിശ്ചിത നടപടിക്രമങ്ങള്‍ പാലിച്ച് പുതിയ അപേക്ഷ സമര്‍പ്പിക്കാവുന്നതാണ്.
മുമ്പ് വോട്ടര്‍ പട്ടികയില്‍ പേരുണ്ടായിരുന്നുവെന്ന കാരണത്താല്‍ മാത്രം ഫോം 6 സമര്‍പ്പിച്ചതിന്‍റെ പേരില്‍ ജനപ്രാതിനിധ്യ നിയമം 1950 ലെ വകുപ്പ് 31 പ്രകാരം ഇലക്ടറല്‍ രജിസ്ട്രേഷന്‍ ഓഫീസര്‍ക്ക് (ഇആര്‍ഒ) നടപടികള്‍ സ്വീകരിക്കാനാവില്ലെന്നും കമ്മീഷന്‍ വ്യക്തമാക്കിയിട്ടുണ്ട്.
അതേസമയം, ബന്ധപ്പെട്ട പാര്‍ലമെന്‍റ് അല്ലെങ്കില്‍ നിയമസഭാ മണ്ഡലത്തിന് പുറത്തുള്ള മറ്റൊരു മണ്ഡലത്തിലെ വോട്ടര്‍ പട്ടികയില്‍ അപേക്ഷകന്‍റെ പേര് നിലവില്‍ ഉള്‍പ്പെട്ടിട്ടില്ലെന്നും അപേക്ഷയില്‍ നല്‍കുന്ന പ്രഖ്യാപനം നിയമാനുസൃതമാണെന്നും ഉറപ്പുവരുത്തണം.
ഈ വിശദീകരണത്തിന്‍റെ അടിസ്ഥാനത്തില്‍ എസ്.ഐ.ആര് കരട് വോട്ടര്‍ പട്ടികയില്‍ പേരില്ലാത്ത മുന്‍ വോട്ടര്‍മാര്‍ ആവശ്യമായ നടപടികള്‍ സ്വീകരിച്ച് ഫോം 6 സമര്‍പ്പിക്കണമെന്ന് കമ്മീഷന്‍ വ്യക്തമാക്കി.
https://www.facebook.com/Malayalivartha
