മോഹന്‍ലാലിന്റെ വെളിപാടിന്റെ പുസ്തകം വളരെയധികം വ്യത്യസ്തമാണ്. മോഹന്‍ലാല്‍ നായകനായ വെളിപാടിന്റെ പുസ്തകം എന്ന ചിത്രത്തിലെ എന്റമ്മേടെ ജിമ്മിക്കി കമ്മല്‍ എന്ന സൂപ്പര്‍ഹിറ്റ് ഗാനം കേരളക്കരയിൽ പ്രസിദ്ധി നേടിയത് വളരെ പെട്ടെന്നായിരുന്നു.

എന്നാലിപ്പോൾ കേരളക്കരയുടെ അതിർത്തികൾ താണ്ടി അങ്ങ് ഓസ്കാറിലും ജിമ്മിക്കി കമ്മൽ തരംഗം സൃഷ്ടിക്കുന്നു. പ്രശസ്ത അമേരിക്കന്‍ ടെലിവിഷന്‍ അവതാരകനും ഓസ്‌കര്‍ അവാര്‍ഡ് നിശയുടെ അവതാരകനുമായ ജിമ്മി കിമ്മെല്‍ തന്നെ പാട്ടിന്‍റെ ആരാധകനാണ് താനെന്ന് ട്വിറ്ററില്‍ പോസ്റ്റ് ചെയ്തിരിക്കുന്നു.

ജിമ്മി കിമ്മെലും ജിമ്മി കമ്മലും .കേള്‍ക്കുമ്പോള്‍ തന്നെ ഒരു സാമ്യമുണ്ടല്ലോ. ഇതാവാം ജിമ്മി കെമ്മലിനെ പാട്ടിന്‍റെ ആരാധകനാക്കിയതെന്നാണ് ഇപ്പോള്‍ സോഷ്യല്‍ മീഡിയയിലെ സംസാരം. ഒരു ട്വിറ്റര്‍ ഹാന്‍ഡില്‍ ശ്രദ്ധയില്‍പ്പെടുത്തിയതിനെ തുടര്‍ന്നാണ് അദ്ദേഹം പാട്ട് കണ്ടത്.

കോളജ് വിദ്യാര്‍ത്ഥികള്‍ ജിമ്മിക്കി കമ്മല്‍ പാട്ടിന് ഡാന്‍സ് ചെയ്യുന്നതിന്റെ വീഡിയോയാണ് അദ്ദേഹം ട്വീറ്റ് ചെയ്തത്. ജിമ്മിക്കി കമ്മൽ എന്ന പാട്ട് പുറത്തുവന്നതിനു പിന്നാലെ പാട്ടിന്റെ നിരവധി കവർ വേർഷനുകളും ഡാന്‍സ് വിഡിയോകളുമാണ് യുട്യൂബിലെത്തുന്നത്. അവയെല്ലാം നമുക്ക് പ്രിയപ്പെട്ടതാകുകയും ചെയ്തു. എന്നാൽ അക്കൂട്ടത്തിൽ ഏറെ ശ്രദ്ധ നേടുകയാണ് ഈ വിഡിയോ. ഇന്ത്യൻ സ്കൂൾ ഓഫ് കൊമേഴ്സിലെ കുട്ടികളും പ്രവർത്തകരുമാണ് കളിച്ചു തകർത്തത്. യുട്യൂബിൽ ഒരാഴ്ച കൊണ്ട് 19 ലക്ഷത്തോളം പ്രാവശ്യമാണ് ഈ വിഡിയോ കണ്ടത്. ഓണാഘോഷത്തിന്റെ ഭാഗമായാണ് നൃത്തം ചവിട്ടിയത്. കേരള തനിമയുള്ള വസ്ത്രങ്ങളണിഞ്ഞുള്ള ഡാൻസ് പെട്ടെന്നാണ് സോഷ്യൽ മീഡിയയിലും വൈറലായത്.