കരിഓയില്‍ ഒഴിച്ചവര്‍ വീടു മുഴുവനായി ഇതു ചെയ്തിരുന്നെങ്കില്‍....
നടിയെ ആക്രമിച്ച ഗൂഢാലോചനകേസില്‍ ദിലീപിന് അനുകൂലമായി പരാമര്‍ശിച്ചതിന്റെ പേരില്‍ തലശ്ശേരിയിലെ തന്റെ വീട്ടില്‍ കരിഓയില്‍ ഒഴിച്ചവര്‍ക്ക് മറുപടിയുമായി നടന്‍ ശ്രീനിവാസന്‍. ദിലീപിനെ പിന്തുണച്ചു എന്നതിന്റെ പേരിലാണോ വീട്ടില്‍ കരിഓയില്‍ ഒഴിച്ചതെന്ന് അറിയില്ലെന്നും അദ്ദേഹം പറഞ്ഞു. അങ്ങനെയാണെന്ന് വിശ്വസിക്കാന്‍ ആഗ്രഹിക്കുന്നില്ല. ഇതിലൊന്നും വലിയ കാര്യമില്ലെന്നതാണ് സത്യം. കരിഓയില്‍ ഒഴിച്ച കാര്യം നാട്ടില്‍നിന്ന് വിളിച്ചുപറഞ്ഞപ്പോള്‍ പൊലീസില്‍ പരാതിപ്പെടേണ്ട എന്നാണ് നിര്‍ദ്ദേശിച്ചത്.
വേറൊരു കാര്യം, കരിഓയില്‍ ഒഴിച്ചവര്‍ വീടു മുഴുവനായി ഇതു ചെയ്തിരുന്നെങ്കില്‍ പെയിന്റിങ്ങിന്റെ പണം ലാഭിക്കാമായിരുന്നു. ഇത്രയൊക്കെ പ്രാധാന്യമേ താന്‍ ഈ സംഭവത്തിനു നല്‍കുന്നുള്ളൂ എന്നും ശ്രീനിവാസന്‍ വ്യക്തമാക്കി.കരിഓയില്‍ ഒഴിച്ചവര്‍ ആരായാലും, ദിലീപിനു പിന്തുണ പ്രഖ്യാപിച്ച ഗണേഷ് കുമാര്‍ എംഎല്‍എയുടെ വീട്ടില്‍ക്കൂടി ഇത് ചെയ്യണമെന്ന് അദ്ദേഹം അഭ്യര്‍ഥിച്ചു. ദിലീപിനെ അനുകൂലിച്ചാല്‍ മാത്രമല്ല, എതിര്‍ത്താലും സാക്ഷികളെ സ്വാധീനിക്കുമെന്ന് എല്ലാവരും ഓര്‍ക്കുന്നത് നല്ലതാണെന്നും ശ്രീനിവാസന്‍ പറഞ്ഞു.
ദിലീപിന് അനുകൂലമായി ഗണേഷ് കുമാര്‍ സംസാരിച്ചാല്‍ അതു സാക്ഷികളെ സ്വാധീനിക്കുമെന്ന് പല സ്ഥലത്തുനിന്നും കേട്ടു. ഇതേക്കുറിച്ച് സംവിധായകന്‍ സത്യന്‍ അന്തിക്കാട് പറഞ്ഞതിങ്ങനെയാണ്. ദിലീപിനെ അനുകൂലിച്ച് സംസാരിച്ചാല്‍ സാക്ഷികളെ സ്വാധീനിക്കുമെങ്കില്‍, ദിലീപിനെ എതിര്‍ത്തു സംസാരിച്ചാലും അതു സാക്ഷികളെ സ്വാധീനിക്കല്‍ തന്നെയാണ്. ദിലീപിനെതിരായ കുറ്റം തെളിയിക്കപ്പെടാത്തിടത്തോളം കാലം, അദ്ദേഹത്തിന് എതിരായി സംസാരിച്ചാലും സാക്ഷികള്‍ സ്വാധീനിക്കപ്പെടുമെന്ന് ഓര്‍ക്കുന്നത് നല്ലതാണെന്ന് ശ്രീനിവാസന്‍ പറഞ്ഞു.
ദിലീപിന് അനുകൂലമായി താന്‍ പ്രത്യേകിച്ച് ഒന്നും പറഞ്ഞിട്ടില്ലെന്നും ശ്രീനിവാസന്‍ വിശദീകരിച്ചു. വര്‍ഷങ്ങളായി ദിലീപിനെ അറിയാവുന്ന ആളെന്ന നിലയില്‍ ഇത്തരമൊരു ഹീനകൃത്യം ദിലീപ് ചെയ്യുമെന്നു കരുതുന്നില്ലെന്നാണ് പറഞ്ഞത്. അല്ലാതെ പൊലീസിനെതിരായിട്ടൊന്നും പറഞ്ഞിട്ടില്ല. അതിന് താന്‍ ആളല്ലെന്നും ശ്രീനിവാസന്‍ വ്യക്തമാക്കി.
തന്റെ വീട്ടില്‍ കരിഓയില്‍ ഒഴിച്ചവര്‍ ഗണേഷിന്റെ വീട്ടിലും അപ്രകാരം ചെയ്യണമെന്ന് ശ്രീനിവാസന്‍ അഭ്യര്‍ഥിച്ചു. അതിനുശേഷം ദിലീപിനെ അനുകൂലിച്ച എല്ലാവരുടെയും വീട്ടില്‍ കൊണ്ടുപോയി കരിഓയില്‍ ഒഴിക്കണം. അതിന് ഇവിടെയുള്ള കരിഓയില്‍ തികഞ്ഞില്ലെങ്കില്‍ വിദേശത്തുനിന്ന് ഇറക്കുമതി ചെയ്യണം. ഈ ദിവസങ്ങളില്‍ കരിഓയിലിന് വലിയ ഡിമാന്‍ഡ് ഉണ്ടാകുമെന്നും ശ്രീനിവാസന്‍ പരിഹസിച്ചു.
പൊലീസ് സ്വമേധയാ കേസെടുത്തത് അവരുടെ കാര്യമാണെന്നും ശ്രീനിവാസന്‍ പറഞ്ഞു.
https://www.facebook.com/Malayalivartha
