മഞ്ജു വാര്യര്‍ വീണ്ടും മുഖ്യമന്ത്രി പിണറായി വിജയനെ കാണുന്നു. ഇന്നുച്ചയ്ക്ക് 2.45നാണ് മുഖ്യമന്ത്രിയെ കാണാന്‍ മഞ്ജു വാര്യര്‍ അനുമതി ചേദിച്ചിട്ടുള്ളത്. എന്തായാലും സിനിമാ ലോകവും മാധ്യമ പ്രവര്‍ത്തകരും മഞ്ജുവിന്റെ വരവിനെ വളരെ ആകാംക്ഷയോടെയാണ് കാണുന്നത്. ദിലീപ് പുറത്തിറങ്ങി ദിവസങ്ങള്‍ കഴിഞ്ഞ ഉടനെയുള്ള ഈ സന്ദര്‍ശനം വെറുതെയല്ലെന്നാണ് മഞ്ജുവുമായി അടുപ്പമുള്ളവര്‍ പറയുന്നത്.

കൊച്ചിയില്‍ സഹ പ്രവര്‍ത്തക ആക്രമിച്ച ശേഷം മാസങ്ങള്‍ കഴിഞ്ഞിട്ടും പള്‍സര്‍ സുനിയെ അല്ലാതെ ആരേയും പിടിയ്ക്കാതെ പോലീസ് ഇരുട്ടില്‍ തപ്പുന്ന സമയത്താണ് മഞ്ജു വാര്യര്‍ മുഖ്യമന്ത്രിയെ ആദ്യമായി കണ്ടത്. മേയ് 18 നായിരുന്നു സിനിമയിലെ വനിതാ കൂട്ടയാമയായ വിമണ്‍ ഇന്‍ കളക്ടീവ് അംഗങ്ങള്‍ മഞ്ജു വാര്യരുടെ നേതൃത്വത്തില്‍ മുഖ്യമന്ത്രിയെ കണ്ടത്.

വുമണ്‍ കളക്ടീവ് ഇന്‍ സിനിമ എന്ന പേരില്‍ മഞ്ജു വാര്യര്‍ മുന്‍കൈ എടുത്താണ് പുതിയ സംഘടന പിറവിയെടുത്തത്. ഇന്ത്യന്‍ സിനിമയില്‍ ആദ്യമായാണ് വനിതകള്‍ക്ക് മാത്രമായി ഒരു സംഘടന രൂപീകരിക്കുന്നത്. മഞ്ജു വാര്യര്‍, ബീനാ പോള്‍, വിധു വിന്‍സന്റ്, പാര്‍വതി, റിമ കല്ലിങ്കല്‍, സജിത മഠത്തില്‍ തുടങ്ങിയവരുടെ നേതൃത്വത്തിലാണ് പുതിയ സിനിമാ സംഘടനാ പിറന്നത്.

മഞ്ജു വാര്യര്‍ മുഖ്യമന്ത്രിയോട് പറഞ്ഞ ചില കാര്യങ്ങളാണ് അന്വേഷണം ശക്തിപ്പെടുത്താന്‍ മുഖ്യമന്ത്രി ഡിജിപിക്ക് നിര്‍ദേശം നല്‍കിയത്. മാത്രമല്ല സിനിമ മേഖലയിലെ പ്രശ്‌നങ്ങള്‍ പഠിക്കുന്നതിന് പ്രത്യേക സമിതി രൂപീകരിക്കുമെന്ന് അദ്ദേഹം ഉറപ്പ് നല്‍കി. ഷൂട്ടിംഗുമായി ബന്ധപ്പെടുന്നവര്‍ എത്തരക്കാരാണെന്നും അവരുടെ പൂര്‍വ ചരിത്രം എന്താണെന്നും പരിശോധിക്കണമെന്ന് മുഖ്യമന്ത്രി പറഞ്ഞു. അതിന് പോലീസ് സഹായവും അദ്ദേഹം നല്‍കി. 

ഷൂട്ടിംഗ് നടക്കുന്ന സെറ്റുകള്‍ കൂടി ലൈംഗിക പീഡന നിരോധന നിയമത്തിന്റെ പരിധിയില്‍ കൊണ്ടുവരണം. സെറ്റുകളില്‍ ലൈംഗിക പീഡന പരാതി പരിഹാര സെല്‍ രൂപീകരിക്കണമെന്നും സംഘം മുഖ്യമന്ത്രിയോട് ആവശ്യപ്പെട്ടു. ചലച്ചിത്ര മേഖലയില്‍ അടിസ്ഥാന മനുഷ്യാവകാശങ്ങള്‍ പോലും സ്ത്രീകള്‍ക്ക് നിഷേധിക്കപ്പെടുകയാണെന്ന് താരങ്ങള്‍ പറഞ്ഞു. 

ഈയൊരു ബാഹ്യ പശ്ചാത്തലത്തിലാണ് മഞ്ജു വാര്യര്‍ രണ്ടാമതും മുഖ്യമന്ത്രിയെ കാണുന്നത്. ഇത്തവണ മഞ്ജു ഒറ്റയ്ക്കാണ് മുഖ്യമന്ത്രിയെ കാണുന്നത്. അതിനാല്‍ തന്നെ ദിലീപിനെതിരെ കൂടുതല്‍ തെളിവുകള്‍ നിരത്തും. മാത്രമല്ല തന്നേയും പരസ്യ സംവിധായകനായ ശ്രീകുമാര്‍ മേനോനെപ്പറ്റി ദിലീപ് അനുകൂലികള്‍ പരത്തുന്ന കിവദന്തികളുടെ സത്യാവസ്ഥയും മുഖ്യമന്ത്രിയെ ബോധ്യപ്പെടുത്തും. അന്വേഷണ സംഘം കുറ്റപത്രം സമര്‍പ്പിക്കും മുമ്പ് മഞ്ജുവിന്റെ ഈ സന്ദര്‍ശനം വളരെയേറെ പ്രത്യാഘാതം സൃഷ്ടിക്കും. ഇതാണ് ദിലീപിനേയും ഭക്തരേയും ആശങ്കയിലാഴ്ത്തുന്നത്. 

അന്ന് മഞ്ജുവിന്റെ ആ സന്ദര്‍ശനമാണ് ദിലീപിലേക്ക് കാര്യങ്ങള്‍ നീങ്ങിയത്. നിഷ്‌കളങ്കനായി നടന്ന ദിലീപിനെ അകത്താക്കിയത് മഞ്ജുവും ശ്രീകുമാര്‍ മേനോനും എഡിജിപി സന്ധ്യയുമാണെന്ന് ദിലീപ് കോടതിയില്‍ പോലും പറഞ്ഞിരുന്നു.

അതേസമയം മഞ്ജു മുഖ്യമന്ത്രിയേയും കുടുംബത്തേയും തന്റെ സിനിമയായ ഉദാഹരണം ശ്യാമള കാണാന്‍ ക്ഷണിക്കുകയും ചെയ്യും. ജീവിക്കാന്‍ പാടുപെടുന്ന ഒരു സാധാരണ സ്ത്രീയുടെ കഥപറയുന്ന ഉദാഹരണം സുജാത മുഖ്യമന്ത്രിയെ കൊണ്ട് കാണിക്കാനും പദ്ധതിയുണ്ട്. ഇതിലൂടെ ഒരു മധുര പ്രതികാരം കൂടി മഞ്ജു നേടിയെടുക്കും. അവനൊപ്പമല്ല അവള്‍ക്കൊപ്പമാണ് മുഖ്യമന്ത്രിയെന്ന ലേബലും ഉണ്ടാക്കും. എന്തായാലും പിളര്‍പ്പിന്റെ വക്കില്‍ അമ്മ നില്‍ക്കുന്ന സമയത്തുള്ള മഞ്ജുവിന്റെ ഈ വരവ് ഒരു ഒന്നൊന്നര വരവായിരിക്കും തീര്‍ച്ച.