സായുധസംഘത്തിന്റെ സംരക്ഷണം എന്തിന്? തണ്ടര് ഫോഴ്സിന്റെ കാടിളക്കിയുള്ള സംരക്ഷണത്തിനുള്ള മറുപടി ഇന്ന് പോലീസിന് നല്കുന്നു
നടിയെ ആക്രമിച്ച കേസില് ജാമ്യത്തിലിറങ്ങിയ നടന് ദിലീപിനു സ്വകാര്യ സുരക്ഷാ ഏജന്സിയായ തണ്ടര് ഫോഴ്സിന്റെ സംരക്ഷണമൊരുക്കിയതിനെതിരേ പോലീസ് നല്കിയ നോട്ടീസില് ദിലീപ് ഇന്ന് മറുപടി പറയും. സായുധ സംഘത്തിന്റെ സംരക്ഷണം എന്തിനെന്നു വ്യക്തമാക്കണമെന്നാവശ്യപ്പെട്ട് പോലീസ് ദിലീപിനു നോട്ടീസ് നല്കിയിരുന്നു. ഇന്നലെ ഉച്ചയോടെ സിവില് പോലീസ് ഓഫീസര് നേരിട്ട് ചെന്നു ദിലീപിനു നോട്ടീസ് നല്കുകയായിരുന്നു. ഇന്നു രാവിലെ പത്തിനും പന്ത്രണ്ടിനും ഇടയില് മറുപടി നല്കണമെന്നാണു നിര്ദേശം.
ഗോവ ആസ്ഥാനമായി പ്രവര്ത്തിക്കുന്ന തണ്ടര്ഫോഴ്സ് എന്ന സുരക്ഷാ ഏജന്സിയുടെ വിശദാംശങ്ങളും ആലുവ എസ്.ഐ. നല്കിയ നോട്ടീസില് ആവശ്യപ്പെട്ടിട്ടുണ്ട്. സുരക്ഷാ പ്രശ്നമുള്ളതായി ദിലീപ് അറിയിച്ചിട്ടില്ലാത്ത സാഹചര്യത്തില് എന്തിനു സായുധ സുരക്ഷ ഏര്പ്പെടുത്തിയെന്നു വ്യക്തമാക്കണം. ദിലീപിനെ അനുഗമിച്ച സുരക്ഷാ സേനാംഗങ്ങളുടെ തിരിച്ചറിയല് കാര്ഡുകള്, ഏജന്സിയുടെ ലൈസന്സ് രേഖകള്, സുരക്ഷയുടെ ഭാഗമായി സേനാംഗങ്ങള് ഉപയോഗിക്കുന്ന ആയുധങ്ങളുടെ ലൈസന്സ്, സുരക്ഷാ ഏജന്സിക്കു നല്കിയ കരാറിന്റെ പകര്പ്പ് തുടങ്ങിയവയും ഹാജരാക്കണമെന്നു നോട്ടീസില് ആവശ്യപ്പെട്ടിട്ടുണ്ട്.
ജനമധ്യത്തില് ദിലീപിനുനേരേ ആക്രമണമുണ്ടാകാന് സാധ്യതയുണ്ടെന്ന സൂചനയെത്തുടര്ന്നാണ് സുരക്ഷയ്ക്കായി സ്വകാര്യ ഏജന്സിയെ നിയോഗിച്ചതെന്നാണ് ദിലീപിന്റെ അടുത്ത വൃത്തങ്ങള് നല്കുന്ന വിവരം. എന്നാല് പോലീസിനെയോ അന്വേഷണ സംഘത്തെയോ അറിയിച്ചു കൊണ്ടല്ല ഈ നീക്കം എന്നായിരുന്നു റിപ്പോര്ട്ടുകള്. പുതിയ സംഭവത്തോടെ ജാമ്യവ്യവസ്ഥകളില്നിന്നു വ്യതിചലിച്ചതായും അന്വേഷണസംഘം വിലയിരുത്തുന്നുണ്ട്.
കഴിഞ്ഞ ദിവസം മുതലാണ് ഗോവ ആസ്ഥാനമായ തണ്ടര്ഫോഴ്സിന്റെ മൂന്നു സായുധ കമാന്ഡോകളെ ദിലീപ് സുരക്ഷയ്ക്കായി നിയോഗിച്ചത്. വ്യക്തികള്ക്കു സ്വകാര്യ സുരക്ഷ ഏര്പ്പാടാക്കുന്നതില് തെറ്റില്ല. എന്നാല്, ക്രിമിനല് ഗൂഢാലോചനക്കേസില് ജയിലില് കിടന്നയാള് ജാമ്യത്തിലിറങ്ങിയതിനു പിന്നാലെ സുരക്ഷ ഏര്പ്പാടാക്കിയതിനു മറുപടി ലഭിക്കണമെന്നാണു പോലീസ് ആവശ്യപ്പെടുന്നത്.
https://www.facebook.com/Malayalivartha
