ആട് 2വിന്റെ വിജയത്തിളക്കത്തിൽ പ്രമുഖ മാഗസിന് ജയസൂര്യ നൽകിയ അഭിമുഖം വൈറലാകുന്നു. താരപദവിയുടെ ജാഡകള്‍ ഇല്ലാതെ സിംപിളായി നടക്കുന്നതിന് പിന്നിലെ രഹസ്യമെന്തെന്നായിരുന്നു സൗഭാഗ്യ വെങ്കിടേഷിന്റെ ചോദ്യം. അതിന് ജയസൂര്യ നല്‍കിയ മറുപടി ഇങ്ങനെ...

‘സ്റ്റാര്‍ഡം എന്റെ തലയ്ക്ക് പിടിച്ചിട്ടില്ല. അതിന്റെ കാരണം എനിക്കറിയില്ല. അങ്ങനെ താരപദവി, അല്ലെങ്കില്‍ സെലിബ്രിറ്റി ജാഡ തലയ്ക്ക് പിടിച്ചാല്‍ നമുക്ക് നഷ്ടപ്പെടുന്നത് സ്വാതന്ത്ര്യമാണ്. ഞാനെന്റെ മക്കളെയും കൊണ്ട് പുറത്ത് പോകാറുണ്ട്. വൈകുന്നേരങ്ങളില്‍ ഭക്ഷണം കഴിക്കാന്‍ തട്ടുകടയില്‍ പോകാറുണ്ട്. അവിടെ വരുന്ന ആളുകളോട് സംസാരിക്കാറുണ്ട്. അവര്‍ക്കൊപ്പം ഫോട്ടോ എടുക്കാറുണ്ട്. അതെല്ലാം ഞാന്‍ ഒരുപാട് ആസ്വദിക്കുന്നു. അതൊരു ശല്യമായി കാണുമ്പോഴല്ലേ ബുദ്ധിമുട്ട് തോന്നേണ്ടതുള്ളൂ.

ഞാനൊരു വലിയ താരമാണെന്ന ചിന്ത ഉണ്ടായാല്‍ എനിക്ക് മനസ്സിന് സന്തോഷം തരുന്ന കാര്യങ്ങളൊന്നും ചെയ്യാന്‍ കഴിയില്ല. ജീവിതത്തിലെ ഏറ്റവും വലിയ ആഘോഷങ്ങളിലൊന്നാണ് തൃപ്പൂണിത്തുറ അമ്പലത്തിലെ ഉല്‍സവം. ഉല്‍സവത്തിന്റെ എട്ട് ദിവസവും ഞാന്‍ ബാക്കി ജോലികളെല്ലാം മാറ്റിവച്ച്, അവിടെയുണ്ടാകും. ലക്ഷക്കണക്കിനാളുകള്‍ വരുന്ന സ്ഥലമാണ്. ദിവസവും രണ്ടായിരം പേരെങ്കിലും കൂടെ നിന്ന് ഫോട്ടോ എടുക്കാറുണ്ട്. ഉല്‍സവപ്പറമ്പിലെ തിരക്കിനിടയില്‍ സെല്‍ഫിക്ക് പോസ് ചെയ്ത് കഷ്ടപ്പെടുമല്ലോ എന്ന് കൂട്ടുകാരൊക്കെ ചോദിക്കാറുണ്ട്.

പക്ഷേ, ഉള്ളിന്റെയുള്ളില്‍ ഞാനതെല്ലാം ആസ്വദിക്കുന്നു. താരമാണെന്ന് വിചാരിച്ച് മസിലു പിടിച്ചിരുന്നാല്‍ ഈ സന്തോഷമൊക്കെ എങ്ങനെ അനുഭവിക്കും?