നടി ശ്രീദേവി മദ്യപാനി ആയിരുന്നില്ലെന്ന് സമാജ്‌വാദി പാര്‍ട്ടി മുന്‍ നേതാവ് അമര്‍ സിങ്. പൊതുജീവിതത്തില്‍ നില്‍ക്കുന്ന എന്നെപ്പോലെയുള്ളവര്‍ വല്ലപ്പോഴും വൈന്‍ കഴിക്കാറുണ്ട്. അത്രമാത്രമേ ശ്രീദേവിയും കഴിക്കാറുള്ളൂ. അല്ലാതെ അവരെ മദ്യപാനിയായി ചിത്രീകരിക്കരുതെന്ന് അമര്‍ സിങ് കൂട്ടിച്ചേര്‍ത്തു.

ശ്രീദേവിയുടെ ശരീരത്തില്‍ മദ്യത്തിന്റെ സാന്നിധ്യം കണ്ടെത്തിയതായി പോസ്റ്റ്‌മോര്‍ട്ടം പരിശോധനയില്‍ വ്യക്തമായിരുന്നു. ഈ വാര്‍ത്തയുടെ പശ്ചാത്തലത്തിലാണ് അമര്‍ സിങ്ങിന്റെ വെളിപ്പെടുത്തല്‍. അതേ സമയം ശ്രീദേവിയുടെ മരണവാര്‍ത്തയെക്കുറിച്ച് അറിഞ്ഞപ്പോള്‍ കൊച്ചുകുഞ്ഞിനെപ്പോലെ ബോണികപൂര്‍ പൊട്ടിക്കരയുകയായിരുന്നുവെന്ന് അദ്ദേഹത്തിനൊപ്പമുണ്ടായിരുന്ന അദ്‌നാന്‍ സിദ്ദിഖി പറയുന്നു.

ആരാധകര്‍ക്കും സിനിമാലോകത്തിനും മാത്രമല്ല കുടുംബത്തിനും വലിയൊരു വേദന നല്‍കിയാണ് ശ്രീദേവി യാത്രയായത്. ദുബായിലെ വിവാഹ ചടങ്ങുകള്‍ക്ക് ശേഷം ഖുഷിയോടൊപ്പം തിരിച്ച് മുംബൈയിലേക്കെത്തിയ ബോണി കപൂര്‍ വീണ്ടും ദുബായിലേക്ക് പോയിരുന്നു. ഇക്കാര്യത്തെക്കുറിച്ച് അദ്ദേഹം ശ്രീദേവിയെ അറിയിച്ചിരുന്നില്ല. സര്‍പ്രൈസ് നല്‍കാനായി ഓടിയെത്തിയ അദ്ദേഹം കണ്ടത് പ്രിയതമയുടെ ജീവനറ്റ ശരീരമാണ്.

അദ്‌നാന്‍ സിദ്ദിഖി ബോണി കപൂറിനൊപ്പം ദുബായിലാണ് ഉള്ളത്. ശ്രീദേവിയുടെ അപ്രതീക്ഷിത വിയോഗത്തിന്റെ നടുക്കത്തില്‍ നിന്നും അദ്ദേഹം ഇതുവരെ മോചിതനായിട്ടില്ലെന്നും അദ്ദേഹം പറയുന്നു. മോഹിതിന്റെ വിവാഹ ചടങ്ങില്‍ അതീവ സുന്ദരിയായി എത്തിയ ശ്രീദേവി ഇനിയില്ലെന്ന് വിശ്വസിക്കാന്‍ കഴിയുന്നില്ലെന്നും അദ്‌നാന്‍ പറയുന്നു.

വിവാഹ ചടങ്ങില്‍ പങ്കെടുക്കുന്നതിനായി താന്‍ വൈകിയാണ് എത്തിയത്. തന്റെ ഫ്‌ളൈറ്റ് ലേറ്റായിരുന്നു. സുഹൃത്തുക്കള്‍ക്കും കുടുംബാംഗങ്ങള്‍ക്കും തന്നെ പരിചയപ്പെടുത്തുമ്പോള്‍ നിങ്ങള്‍ വല്ലാതെ വൈകിയെന്നായിരുന്നു ശ്രീദേവി പറഞ്ഞത്. ഇപ്പോഴും ആ വാക്കുകള്‍ കാതില്‍ മുഴങ്ങുന്നുണ്ടെന്നും അദ്‌നാന്‍ പറയുന്നു...