സംസ്ഥാന ടൂറിസം വകുപ്പിന്റെ ഓണാഘോഷ വാരാഘോഷത്തിന്റെ ഉദ്ഘാടന വേദിയില്‍ മുഖ്യാതിഥിയായി പങ്കെടുത്ത് നടന്‍ കുഞ്ചാക്കോ ബോബന്‍. മാവേലി ഭരിച്ചിരുന്ന കാലഘട്ടത്തിലെ സമത്വവും സമൃദ്ധിയും തിരികെ കൊണ്ടുവരികയും ആ ഭരണമാതൃകയോടു താരതമ്യപ്പെടുകയുമാണ് മാറിമാറി വരുന്ന സര്‍ക്കാരുകള്‍ക്കും ഭരണാധികാരികള്‍ക്കുമുള്ള ഏറ്റവും വലിയ കടമ്പയെന്നു നടന്‍ കുഞ്ചാക്കോ ബോബന്‍ പറഞ്ഞു.

കേരളത്തിന്റെ ടൂറിസം മേഖല ആഗോളതലത്തില്‍ കൈവരിച്ച നേട്ടങ്ങളെ അദ്ദേഹം പ്രകീര്‍ത്തിച്ചു. ''എന്റെ ജന്മനാടായ ആലപ്പുഴയെ കിഴക്കിന്റെ വെനീസ് എന്നാണു വിളിക്കാറുള്ളത്. എന്നാല്‍ വെനീസില്‍ പോയപ്പോള്‍ തോന്നിയത്, വെനീസിനെ 'പടിഞ്ഞാറിന്റെ ആലപ്പുഴ' എന്ന് വിളിക്കേണ്ട ഘട്ടത്തിലേക്ക് കേരള ടൂറിസം വളര്‍ന്നു കഴിഞ്ഞെന്നാണ്. അത് ഏതൊരു മലയാളിക്കും ഏറെ അഭിമാനകരമാണ്'' – കുഞ്ചാക്കോ ബോബന്‍ പറഞ്ഞു.

ടൂറിസം വളര്‍ച്ചയ്‌ക്കൊപ്പം യുവതലമുറയിലേക്കു ലഹരിയുടെ സ്വാധീനം എത്താതിരിക്കാന്‍ ജാഗ്രത പാലിക്കണമെന്ന് അദ്ദേഹം മുന്നറിയിപ്പ് നല്‍കി. സംസ്ഥാന സര്‍ക്കാര്‍ ലഹരിക്കെതിരെ നടപ്പിലാക്കുന്ന 'തൂഫാന്‍' പദ്ധതി യുവതലമുറയെ സംരക്ഷിക്കാനുള്ള ശക്തമായ ആയുധമാണെന്ന് അദ്ദേഹം വ്യക്തമാക്കി. അന്യസംസ്ഥാന തൊഴിലാളികള്‍ക്കിടയില്‍ പോലും 'തൂഫാന്‍' ഉണ്ടാക്കിയ സ്വാധീനം തന്റെ ഒരു ഷൂട്ടിങ് അനുഭവത്തിലൂടെ അദ്ദേഹം വേദിയില്‍ പങ്കുവച്ചു.

നൂറ്റാണ്ടുകള്‍ നീണ്ട സ്വാതന്ത്ര്യസമര ചരിത്രത്തെ ഓര്‍മിപ്പിച്ച കുഞ്ചാക്കോ ബോബന്‍, വിഘടിച്ചു നിന്നതുകൊണ്ടാണു പണ്ടു കുറച്ചു ബ്രിട്ടിഷുകാര്‍ക്കു നമ്മളെ ഭരിക്കാന്‍ സാധിച്ചതെന്നും പിന്നീട് നമ്മള്‍ ഒന്നിച്ചപ്പോഴാണു സ്വാതന്ത്ര്യം നേടാനായതെന്നും ഓര്‍മിപ്പിച്ചു. ജാതിമതരാഷ്ട്രീയ വ്യത്യാസങ്ങള്‍ മാറ്റിവച്ച് മലയാളികള്‍ ഒന്നിച്ചു ആഘോഷിക്കുന്ന ഓണം 'നാനാത്വത്തില്‍ ഏകത്വം' എന്ന ഭാരതീയ സങ്കല്പത്തിന്റെ മികച്ച ഉദാഹരണമാണെന്നും എല്ലാവര്‍ക്കും ഓണാശംസകള്‍ നേര്‍ന്നുകൊണ്ട് അദ്ദേഹം പറഞ്ഞു.