ലോറിയിടിച്ച് എട്ടുവയസുകാരന് ദാരുണാന്ത്യം
ക്ഷേത്രത്തില് ദര്ശനം നടത്തി മടങ്ങുന്നതിനിടെ അമിതവേഗതയിലെത്തിയ ലോറിയിടിച്ച് എട്ടുവയസുകാരന് ദാരുണാന്ത്യം. മഹാരാഷ്ട്രയിലെ ജല്ഗാവിലാണ് സംഭവം. കന്വര് യാത്രയുടെ ഭാഗമായി ക്ഷേത്രത്തില് ദര്ശനം നടത്തി മടങ്ങുന്നതിനിടെയാണ് കുട്ടിയെ നിയന്ത്രണം നഷ്ടപ്പെട്ട ലോറി ഇടിച്ചുതെറിപ്പിച്ചത്. സംഭവത്തെ തുടര്ന്ന് പ്രദേശത്ത് സംഘര്ഷാവസ്ഥ ഉടലെടുത്തു. പ്രതിഷേധവുമായി രംഗത്തെത്തിയ ജനക്കൂട്ടം ലോറി കത്തിച്ചു.
ജല്ഗാവിലെ മമുറാബാദ് റോഡില് പ്രജാനഗറിന് സമീപമാണ് അപകടമുണ്ടായത്. കന്വര് യാത്രയുടെ ഭാഗമായി നിരവധി പേര് എത്തുന്ന ക്ഷേത്രത്തില് ദര്ശനം നടത്തിയ ശേഷം പുറത്തേക്ക് ഇറങ്ങിയപ്പോഴാണ് കുട്ടിയെ അമിതവേഗത്തിലെത്തിയ ലോറി ഇടിച്ചത്. ഗുരുതരമായി പരിക്കേറ്റ കുട്ടി സംഭവസ്ഥലത്തുതന്നെ മരിച്ചു.
അപകടത്തിന് പിന്നാലെ റോഡില് വന് പ്രതിഷേധമാണ് അരങ്ങേറിയത്. രോഷാകുലരായ നാട്ടുകാര് കുട്ടിയുടെ മൃതദേഹം റോഡില് വച്ച് പ്രതിഷേധിക്കുകയും ലോറിയ്ക്ക് തീയിടുകയും ചെയ്തു. വിവരമറിഞ്ഞ് വന് പൊലീസ് സന്നാഹം സ്ഥലത്തെത്തി. തീ നിയന്ത്രണവിധേയമാക്കാന് അഗ്നിരക്ഷാസേനയും എത്തി. അപകടത്തില് ലോറി ഡ്രൈവര്ക്കും നിസാര പരിക്കേറ്റു. സംഘര്ഷാവസ്ഥ കണക്കിലെടുത്ത് ചികിത്സയ്ക്കായി ഇയാളെ ആശുപത്രിയില് പ്രവേശിപ്പിച്ചു.
എന്നാല് ഡ്രൈവറെ ആശുപത്രിയില് നിന്ന് ഉടന് സ്ഥലത്തെത്തിച്ച് തങ്ങള്ക്ക് കൈമാറണമെന്ന് ആവശ്യപ്പെട്ട് പ്രതിഷേധക്കാര് രംഗത്തെത്തി. സ്ഥിതിഗതികള് രൂക്ഷമായതോടെ ലോറി കത്തിക്കൊണ്ടിരിക്കെ തീ അണയ്ക്കാന് ശ്രമിച്ച അഗ്നിരക്ഷാസേനയെയും പൊലീസിനെയും ജനക്കൂട്ടം തടഞ്ഞതായാണ് വിവരം. തുടര്ന്ന് കൂടുതല് പൊലീസ് സേനയെ പ്രദേശത്ത് വിന്യസിച്ചു. സംഭവത്തെ തുടര്ന്നുണ്ടായ പ്രതിഷേധവും സംഘര്ഷവും കാരണം മമുറാബാദ് റോഡിലെ ഗതാഗതവും തടസപ്പെട്ടു. സ്ഥിതിഗതികള് നിയന്ത്രണവിധേയമാക്കാനുള്ള ശ്രമങ്ങള് പൊലീസ് തുടരുകയാണ്.
https://www.facebook.com/Malayalivartha
