ഖുശ്ബു, വിജയശാന്തി, റോജ എന്നിവരെ പിന്തുടർന്ന് ഒരു തെന്നിന്ത്യൻ താര സുന്ദരി കൂടി രാഷ്ട്രീയത്തിൽ ചുവടുവയ്ക്കാൻ ഒരുങ്ങുന്നു. അങ്ങാടിത്തെരുവിലൂടെ പ്രേക്ഷകർക്ക് പ്രിയങ്കരിയായ അഞ്ജലിയാണ് രാഷ്ട്രീയത്തിലേക്ക് ചുവടുവയ്ക്കാൻ ഒരുങ്ങുന്നത്.

ജമ്മു കശ്മീരിൽ വച്ചാണ് താരം ഇത്തരമൊരു ആഗ്രഹം മാധ്യമങ്ങളുമായി പങ്കുവച്ചത്. അവിടത്തെ വൈഷ്ണവ ദേവോ ക്ഷേത്രത്തിൽ തീർത്ഥാടനത്തിനായി എത്തിയതായിരുന്നു അഞ്ജലി. തുടർന്ന് കൊത്തപ്പള്ളി ഗീത എം.പിയുടെ നിർബന്ധത്തെ തുടർന്ന് പാർലമെന്റും കണ്ടു. ഇതിനു ശേഷമാണ് രാഷ്ട്രീയത്തിലേക്ക് ഇറങ്ങാൻ അതിയായി ആഗ്രഹമുണ്ടെന്ന് അറിയിച്ചത്.

ഏതു പാർട്ടിയാണെന്നും മറ്റുമുള്ള കാര്യങ്ങളെക്കാൾ ആർക്കൊപ്പം നിലകൊണ്ടാൽ പൊതുജനങ്ങൾക്ക് ഉപകാരപ്രദമായ കാര്യങ്ങൾ ചെയ്യാൻ കഴിയുമെന്നാണ് ചിന്തിക്കുന്നത്. അതുസംബന്ധിച്ച വ്യക്തമായ ധാരണ ഉടൻ ഉണ്ടാകുമെന്നും താരം പറയുന്നു. നിലവിൽ അഞ്ജലി നായികയായ ബലൂൺ റിലീസിംഗിനു ഒരുങ്ങുകയാണ്. കാൺപതു പൊയ്, പേരൻപ് എന്നീ ചിത്രങ്ങളാണ് താരത്തിന്റേതായി അണിയറയിൽ ഒരുങ്ങുന്നത്.