മുട്ടിന് താഴെയുള്ള മുടിയുടെ പകുതിയോളം നടി ഓവിയ മുറിച്ചു. പലരും ഞെട്ടലോടെയാണ് ഈ വാര്‍ത്ത കേട്ടത്. താരം സോഷ്യല്‍മീഡിയയിലൂടെ ഇക്കാര്യം പങ്കുവച്ചിരുന്നു. ക്യാന്‍സര്‍ രോഗികള്‍ക്കായാണ് താരം മുടി മുറിച്ചത്. ഇത് പലരും ചോദ്യം ചെയ്തപ്പോള്‍ താരത്തിന്റെ കണ്ണുകള്‍ നിറഞ്ഞു. ഓവിയയുടെ അമ്മ അര്‍ബുദരോഗം വന്നാണ് മരിച്ചത്. അതിനാലാണ് തന്റെ മുടി ക്യാന്‍സര്‍ രോഗികള്‍ക്ക് ദാനം ചെയ്തതെന്ന് താരം പറഞ്ഞു. അല്ലാതെ പലരും പറയുന്നത് പോലെ കേശാലങ്കാരത്തിനായല്ല മുടി മുറിച്ചതെന്നും താരം പ്രതികരിച്ചു. തൃശൂര്‍ സ്വദേശിയായ ഹെലന്‍ നെല്‍സണ്‍ എന്ന ഓവിയ കങ്കാരു എന്ന മലയാളം സിനിമയിലൂടെയാണ് അഭിനയരംഗത്തെത്തിയത്.

പക്ഷെ, തമിഴ് സിനിമകളിലൂടെയാണ് താരം ശ്രദ്ധേയയായത്. പിന്നീട് ബിഗ് ബോസ് ഷോയുടെ തമിഴ് പതിപ്പിലും താരം തിളങ്ങി. ഷോയ്ക്കിടെ ആത്മഹത്യാശ്രമം നടത്തിയതിന് താരത്തിനെതിരെ ചെന്നൈ പൊലീസ് കേസെടുത്തിരുന്നു. അത് വലിയ വിവാദമായിരുന്നു. നടന്‍ കമല്‍ഹാസന്‍ നിര്‍മിച്ച പരിപാടി വിജയ് ടി.വിയാണ് സംപ്രേക്ഷണം ചെയ്തിരുന്നത്. അതേസമയം ആരോപണം ഓവിയ നിഷേധിച്ചിരുന്നു. എന്നാല്‍ ചില മാനസിക പ്രശ്‌നങ്ങളെ തുടര്‍ന്ന് താരം ബിഗ് ബോസ് ഷോയില്‍ നിന്ന് പിന്‍വാങ്ങുകയായിരുന്നു. ഷോയില്‍ നിന്ന് വലിയ ആരാധക വൃന്ദത്തെ താരം സൃഷ്ടിച്ചിട്ടുണ്ട്. ഓവിയാസ് ആര്‍മി എന്നാണ് ഇവര്‍ അറിയപ്പെടുന്നത്. 

കമല്‍ഹാസന്‍ രാഷ്ട്രീയത്തിലിറങ്ങുന്നതിനെ ഓവിയ കഴിഞ്ഞ ദിവസം സ്വാഗതം ചെയ്തിരുന്നു. ജനങ്ങളെ സഹായിക്കാന്‍ പറ്റിയ ഏറ്റവും നല്ല മാര്‍ഗമാണ് രാഷ്ട്രീയമെന്നും എന്നാല്‍ പല ആളുകളും പണത്തിനും പദവിക്കും വേണ്ടി ഇതിനെ ദുരുപയോഗം ചെയ്യുകയാണെന്നും അതിനാല്‍ കമല്‍ഹാസനെ പോലുള്ളവരുടെ സാനിധ്യം രാഷ്ട്രീയത്തിലുണ്ടാവുന്നത് ഗുണകരമാണെന്നും താരം വ്യക്തമാക്കിയിരുന്നു. എന്നാല്‍ കമല്‍ഹാസന്റെ രാഷ്ട്രീയ പാര്‍ട്ടിയെ താന്‍ പിന്തുണയ്ക്കില്ലെന്നും വ്യക്തിപരമായി അദ്ദേഹത്തിന് എല്ലാ പിന്തുണയും ഉണ്ടാകുമെന്നും ഓവിയ പറഞ്ഞിരുന്നു.