ആരാധകരും സഹപ്രവര്‍ത്തകരും കാമുകനും നല്‍കിയ പിറന്നാള്‍ ആഘോഷത്തിന്റെ തിമിര്‍പ്പിലാണ് നയന്‍സ്
രണ്ട് വ്യാഴവട്ടക്കാലമായി സിനിമയില്‍ തിളങ്ങുന്ന തെന്നിന്ത്യന്‍ ലേഡി സൂപ്പര്‍സ്റ്റാര്‍ നയന്‍താരയ്ക്ക് ഇന്ന് പിറന്നാള്‍. താരത്തിന് പൊറന്തനാള്‍ വാഴ്ത്തുകളുമായി ആരാധകരും സഹപ്രവര്‍ത്തകരും. ചെന്നൈയിലാണ് ആഘോഷപരിപാടികള്‍ നടക്കുന്നത്. അറം ഹിറ്റായതിന്റെ സന്തോഷവും താരം മറച്ചുവയ്ക്കുന്നില്ല. ശരത്കുമാറിന്റെ അയ്യായിലൂടെയാണ് നയന്‍സ് സിനിമയിലെത്തിയതെങ്കിലും രജനികാന്തിന്റെ ചന്ദ്രമുഖിയില്‍ നായികയായതോടെയാണ് ജാതകം മാറിയത്. പിന്നീട് തിരിഞ്ഞ് നോക്കേണ്ടിവന്നിട്ടില്ല. ജീവിതത്തിലും സിനിമയിലും തിരിച്ചടികള്‍ ഉണ്ടായിട്ടുണ്ടെങ്കിലും അതിനെയെല്ലാം അതിജീവിച്ച് നമ്പര്‍ വണ്‍ നായികയായി മുന്നേറുകയാണ്. ഇത്തവണ കാമുകനും സംവിധായകനുമായ വിഘ്‌നേഷിനൊപ്പമാണ് പിറന്നാള്‍ ആഘോഷം.
ചിമ്പുവുമായുള്ള പ്രണയവും കലഹവുമാണ് നയന്‍സിനെ മാധ്യമശ്രദ്ധാകേന്ദ്രമാക്കിയത്. ഇരുവരും ഇടപഴകുന്ന വീഡിയോയും ഫോട്ടോസും ചിമ്പു പുറത്ത് വിട്ടു. എങ്കിലും തളരാതെ താരം മുന്നോട്ട് പോയി. 2007ല്‍ അജിത്തിന്റെ ജില്ലയിലൂടെ വീണ്ടും തിളങ്ങി. തൊട്ടടുത്ത വര്‍ഷം ധനുഷിന്റെ യാരടി നീ മോഹിനിയിലെ കാമുകി വേഷം പ്രേക്ഷകരെ കരയിച്ചു. പിന്നീടാണ് കോറിയേഗ്രാഫര്‍ പ്രഭുദേവയുമായി പ്രണയത്തിലായത്. തന്റെ പ്രണയം പരസ്യമാക്കാന്‍ താരത്തിന് മടിയുണ്ടായിരുന്നില്ല. പ്രഭു എന്ന് തോളില്‍ പച്ചകുത്തി താരം പൊതു സദസുകളിലെത്തി. ഇതിനിടെ 2011ല്‍ സീതയായി അഭിനയിക്കുന്നതിന് നയന്‍സിനെതിരെ വിമര്‍ശനം ഉയര്‍ന്നു. മറ്റൊരാളുടെ ഭര്‍ത്താവുമൊത്ത് ജീവിക്കുന്ന താരം സീതയായി അഭിനയിക്കരുതെന്നായിരുന്നു ഹിന്ദു സംഘടനകളുടെ ആവശ്യം. പക്ഷെ, സിനിമ റിലീസായി.
പ്രഭുദേവയുമായുള്ള ബന്ധം അവസാനിച്ചപ്പോള്‍ നയന്‍സിന്റെ കരിയര്‍ അവസാനിച്ചെന്ന് കോടമ്പാക്കത്തെ പലരും വിധിയെഴുതി. എന്നാല്‍ ആറ്റ്‌ലിയുടെ രാജറാണി എന്ന ചിത്രത്തിലൂടെ താരം തിരികെ വന്നു. അതുവരെ നയന്‍സ് ചെയ്തതില്‍ നിന്നും വേറിട്ട് നിന്ന വേഷമായിരുന്നു. ഇതിനിടെ മമ്മൂട്ടിയുടെ നായികയായി പുതിയമുഖത്തിലും ഭാസ്‌ക്കര്‍ ദ റസ്‌ക്കലിലും അഭിനയിച്ചു. മായ, ഡോറ, അറം തുടങ്ങി നായിക കേന്ദ്രീകൃത സിനിമകളിലും അഭിനയിച്ചു. തനി ഒരുവന്‍, നാനും റൗഡിതാന്‍ എന്നീ സൂപ്പര്‍ഹിറ്റി സിനിമകളിലും നായികയായി. തിരുവല്ലാക്കാരി ഡയാനാ മറിയം കുര്യന്‍ എന്ന നയന്‍സിനെ മറികടന്ന് നമ്പര്‍ വണ്ണാകാന്‍ തൃഷയും അനുഷ്‌കയും തമന്നയും കാജല്‍ അഗര്‍വാളും ഒക്കെ ശ്രമിക്കുന്നുണ്ടെങ്കിലും ഫലിക്കുന്നില്ല.
https://www.facebook.com/Malayalivartha
