മുന്‍മന്ത്രി ആര്‍ ബാലകൃഷ്ണപിള്ള നല്‍കിയ പരാതിയില്‍ അനൂപ് ജേക്കബിനെതിരെ വിജിലന്‍സ് അന്വേഷണം പ്രഖ്യാപിക്കാനുള്ള രമേശ് ചെന്നിത്തലയുടെ തീരുമാനത്തിനു പിന്നിലുള്ളത് ഉമ്മന്‍ചാണ്ടിക്കുള്ള കുരുക്ക്.
ജില്ലാ ഉപഭോക്തൃ കമ്മീഷനിലേക്കുള്ള അംഗങ്ങളുടെ നിയമനത്തില്‍ നടന്ന അഴിമതിയാണ് അനൂപിനെതിരെ അന്വേഷണം നടത്താന്‍ കാരണമായത്. ഇതില്‍ പ്രധാനം തിരുവനന്തപുരം ജില്ലാ ഉപഭോക്തൃ കമ്മീഷനിലേക്ക് നടന്ന നിയമനമായിരുന്നു. ഷൊര്‍ണൂരില്‍ നിന്നുള്ള സിപിഐ നേതാവിനെയാണ് തിരുവനന്തപുരം കമ്മീഷനിലേക്ക് നിയമിച്ചത്. നിയമനം നടത്തിയതാകട്ടെ മുഖ്യമന്ത്രിയും. മാണി മറു കണ്ടം ചാടുമെന്ന് കരുതി സിപിഐയെ ഒപ്പം നിര്‍ത്താനുള്ള ശ്രമത്തിന്റെ ഭാഗമായിരുന്നു അത്.
സിപിഐ നേതാവിനെ യുഡിഎഫ് സര്‍ക്കാര്‍ നിയമിച്ചതില്‍ കൗതുകം കാണുന്നവരാണ് പലരും. കോണ്‍ഗ്രസ് നേതാക്കള്‍ക്ക് ഇതില്‍ അമര്‍ഷവുമുണ്ട്. കെ പി സി സി അധ്യക്ഷന്‍ ഒരു സന്ദര്‍ഭത്തില്‍ നിയമനത്തിനെതിരെ രംഗത്തു വന്നിരുന്നു. എന്നിട്ടും ഫലമുണ്ടായില്ല.
അന്വേഷണം മുറുകുമ്പോള്‍ വിജിലന്‍സ് അനൂപിനെ പിടിക്കും. ജില്ലാ അധ്യക്ഷനെ നിയമിച്ചത് മുഖ്യമന്ത്രിയാണെന്ന് അനൂപ് തുറന്നു പറയും. ഇതു തന്നെയാണ് രമേശിനു വേണ്ടത്. മാധ്യമങ്ങളൊക്കെ ഇക്കാര്യം അറിയുകയും ചെയ്യും.
ഉമ്മന്‍ചാണ്ടിക്ക് ഇക്കാര്യം അറിയാമെങ്കിലും ഒന്നും ചെയ്യാനാവാത്ത അവസ്ഥയാണ്. കെ എം മാണിക്കും കെ ബാബുവിനുമെതിരെ അന്വേഷണം പുരോഗമിക്കുന്നു. സര്‍ക്കാരില്‍ മുഴുവന്‍ അഴിമതിയാണെന്നാണ് പൊതു ജനങ്ങളുടെ വിശ്വാസം. മാധ്യമങ്ങളൊക്കെ സര്‍വസന്നാഹവുമായി സര്‍ക്കാരിനെതിരെ പടയൊരുക്കം നടത്തുന്നു. എന്നിട്ടും സര്‍ക്കാരിലുള്ളവര്‍ തന്നെ സര്‍ക്കാരിനെതിരെ പ്രവര്‍ത്തിക്കുന്നു. തനിക്കൊന്നും ചെയ്യാനാവുന്നില്ലെന്ന സങ്കടം മാത്രമാണ് ഉമ്മന്‍ചാണ്ടിക്കുള്ളത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha