നോട്ടീസ് കൊടുക്കാതെ ബാറുകള് പൂട്ടാനുള്ള തീരുമാനം പൊളിച്ചത് സുധീരന്
നോട്ടീസ് പോലും കൊടുക്കാതെ ബാറുകള് പൂട്ടി പ്രസ്തുത നടപടി കോടതിയില് നിന്നും റദ്ദാക്കി ബാര് ഉടമകളെ സഹായിക്കാനുള്ള സര്ക്കാര് നീക്കം പൊളിച്ചത് വി.എം. സുധീരന്. ബാര് ഉടമകളുടെ ഭാഗം കേള്ക്കാതെ അവരുടെ സ്ഥാപനങ്ങള് ഏകാധിപത്യപരമായി പൂട്ടാനുള്ള തീരുമാനം പുറത്തുവന്നപ്പോള് തന്നെ വി.എം. സുധീരന് അപകടം മണത്തിരുന്നു. ബാര് ഉടമകളെ സഹായിക്കാനുള്ള തീരുമാനം ഉണ്ടായത് സര്ക്കാരിന്റെ ഉന്നത തലങ്ങളില് നിന്നു തന്നെയാണ്. എക്സൈസ് മന്ത്രി കൊ.ബാബുവിന്റെ പിന്തുണ തീരുമാനത്തിനുണ്ടായിരുന്നു.
ബാറുകള് പൂട്ടുകയാണെങ്കില് 15 ദിവസത്തെ നോട്ടീസ് സമയം നല്കണമെന്നാണ് അബ്കാരി നിയമത്തിന്റെ വിദേശമദ്യചട്ടം 36 അനുശാസിക്കുന്നത്. എന്നാല് ആരെയും കേള്ക്കാതെ ബാര് പൂട്ടാനാണ് സര്ക്കാര് തീരുമാനിച്ചത്. അങ്ങനെ വന്നാല് ബാര് ഉടമകള്ക്ക് കേടതിയെ സമീപിച്ച് തീരുമാനം റദ്ദാക്കാം. നോട്ടീസ് കൊടുക്കാതെ ബാര് പൂട്ടാനുള്ള തീരുമാനം പുറത്തുവന്നപ്പോള് തന്നെ കെ.സി.ബി.സി രംഗത്ത് വന്നിരുന്നു. പൂട്ടികിടക്കുന്ന 418 ബാറുകള് മാത്രം തുറക്കേണ്ടതില്ലെന്നു മാത്രമാണ് യുഡിഎഫ് തീരുമാനിച്ചത്. എന്നാല് തുറന്നു കിടക്കുന്ന ബാറുകള് കൂടി പൂട്ടാനുള്ള തീരുമാനം മുഖ്യമന്ത്രിയാണ് പ്രഖ്യാപിച്ചത്. യുഡിഎഫ് സര്ക്കാരിലെ ചില പ്രമുഖരുടെ ബന്ധുക്കളെ ലക്ഷ്യമിട്ടാണ് ഇത്തരമൊരു തീരുമാനം മുഖ്യമന്ത്രി എടുത്തത്. ഇവരില് ചിലര് ബാര് വിഷയത്തില് മുഖ്യമന്ത്രിക്കെതിരെ നിലകൊണ്ടിരുന്നു. തുറന്നു പ്രവര്ത്തിക്കുന്ന ബാറുകളില് കൂടുതലും ക്രൈസ്തവ മതവിശ്വാസികളുടേതാണ്. ബാര് തുറക്കാന് പാടില്ലെന്ന കര്ശന നിലപാട് സ്വീകരിച്ചത് മെത്രാന്മാരാണ്. തുറന്നു പ്രവര്ത്തിക്കുന്ന ബാറുകള് പൂട്ടുന്നതിലൂടെ ക്രൈസ്തവ മതമേലധ്യക്ഷന്മാരെ പ്രതിസന്ധിയിലാക്കാനും മുഖ്യമന്ത്രിക്ക് കഴിഞ്ഞു.
നോട്ടീസ് കൊടുക്കാതെ ബാര് പൂട്ടുന്ന നടപടിയെ ബാര് ഉടമകള് രഹസ്യമായി സ്വാഗതം ചെയ്തിരുന്നു. അങ്ങനെ സംഭവിക്കുകയാണെങ്കില് നിഷ്പ്രയാസം ബാറുകള് തുറക്കാമെന്നായിരുന്നു ഉടമകളുടെ കണക്കുകൂട്ടല്. ഇതിനുവേണ്ടി ചില ശ്രമങ്ങള് ബാര് ഉടമകള് തന്നെ നടത്തിയിരുന്നു. വി.എം.സുധീരന് ഇതിനു പാരവയ്ക്കാതിരിന്നെങ്കില് ബാറുകള് എക്കാലവും തുറന്നു പ്രവര്ത്തിക്കുമായിരുന്നു.
എ.ജിയുടെ ഓഫീസ് ഉള്പ്പെടെയും നിര്ണ്ണായസ്ഥലങ്ങലില് സുധീരന് ചാരന്മാരുണ്ട്. മന്ത്രിമാരുടെ ഓഫീസിലും അദ്ദേഹത്തിന് ആളുകളുണ്ട്. ഇവരാണ് വിവരങ്ങള് ചോര്ത്തി നല്കിയതെന്ന് അറിയുന്നു. ബാര് ഉടമകളുമായി ചേര്ന്ന് സര്ക്കാരിലെ ഉന്നതര് എടുത്ത രഹസ്യതീരുമാനം സുധീരന് ചോര്ത്തി നല്കിയത് മന്ത്രിമാരുടെ ഓഫിസുകളിലെ ചാരന്മാരാണ്.
സുധീരന് മുഖ്യമന്ത്രിയെ ഫോണില് വിളിച്ച് തന്റെ ആശങ്ക പങ്കുവച്ചതോടെയാണ് നോട്ടീസ് കൊടുക്കാന് തീരുമാനിച്ചത്. എ.ജിയും ഇതുതന്നെ ഉപദേശിച്ചു. ഇതിനിടെ ഓണക്കാലത്ത് തങ്ങള്ക്ക് പ്രവര്ത്തനാനുമതി നല്കണമെന്ന ആവശ്യം സര്ക്കാര് അംഗീകരിച്ചേക്കും. ബാര് പൂട്ടുന്നതിന് 15 ദിവസം മുമ്പ് നോട്ടീസ് നല്കണമെന്നാണ് എ.ജി. സര്ക്കാരിനു നല്കിയിരിക്കുന്ന ഉപദേശം. ഇതിനിടയില് ബാര് ഉടമകള്ക്ക് കേടതിയെ സമീപിച്ച് സ്റ്റേ കരസ്ഥമാക്കാമെന്നതാണ് മറ്റൊരുവഴി. ബാര് പൂട്ടിയ ശേഷം നിയമ നടപടിക്ക് നീങ്ങുന്നത് ബാര് ഉടമകള് അവസാനിപ്പിച്ചു കഴിഞ്ഞു. പഞ്ചനക്ഷത്ര ബാറുകളെ പ്രവര്ത്തിക്കാന് അനുവദിക്കുകയും മറ്റ് ബാറുകള് പൂട്ടുകയും ചെയ്യുന്നത് വിവേചനപരമാണെന്ന് ബാര് ഉടമകള് കോടതിയില് വാദിക്കും. ഭരണഘടനാ പരമായി നോക്കുമ്പോള് വിവേചനം കോടതി അനുവദിക്കുകയില്ല. അങ്ങനെ വരുമ്പോള് ബാര്കേസില് ബാര് ഉടമകള് ജയിക്കാനാണ് സാധ്യത. മുഖ്യമന്ത്രിക്കും എക്സൈസ് മന്ത്രിക്കും സുധീരന് എതിരായതിനാല് ബാര് ഉടമകള്ക്ക് അവരുടെ പിന്തുണയുണ്ടാവും.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
