മക്കളെ സ്വാശ്രയ എന്ജിനിയറിങ് കോളജില് അയ്ക്കരുത് പ്ലീസ്!
മക്കളെ എന്ജിനിയറിങിന് അയക്കുന്നവര് ശ്രദ്ധിക്കുക, സര്ക്കാര് കോളെജില് അഡ്മിഷന് കിട്ടിയില്ലെങ്കില് സ്വാശ്രയ കോളെജില് അയയ്ക്കരുത്. പത്താംക്ലാസുകാരന്റെ ബുദ്ധിപോലും ഇല്ലാത്തവരാണ് നമ്മുടെ എന്ജിനിയറിങ് കോളെജ് അധ്യാപകര്. പറയുന്നത് മറ്റാരുമല്ല കേരള സ്വാശ്രയ കോളെജുകളുടെ രാജാധിരാജന് ജി.പി.സി.നായര്.
സ്വാശ്രയ കോളെജുകളുടെ ദേശീയ പ്രസിഡന്റായ ജി.പി.സി.നായര് പറയുന്നതിങ്ങനെ, മറ്റൊരു ജോലിയും കിട്ടാത്തവരാണ് കേരളത്തിലെ സ്വാശ്രയ കോളെജുകളില് അധ്യാപകരായെത്തുന്നത്. ജീവിതകാലം മുഴുവന് അധ്യാപകരായിരിക്കാം എന്ന് ഇവര് കരുതുന്നില്ല. മറ്റേതെങ്കിലും ജോലി കിട്ടുമ്പോള് രക്ഷപെടാമെന്നാണ് ചിന്ത. അതുവരെ മാസം 25,000രൂപ കിട്ടുന്ന ഒരു തൊഴില് വേണം. അതാണ് സ്വാശ്രയ കോളെജിലെ ഉദ്യോഗം.
സര്ക്കാര് തലത്തിലും ഇതു തന്നെയാണ് അവസ്ഥയെങ്കിലും ജോലി കിട്ടണമെങ്കില് പരീക്ഷ പാസാവണം. ഇപ്പോള് സര്ക്കാര് എന്ജിനിയറിങ് കോളെജില് അധ്യാപകനാകാനുള്ള മിനിമം യോഗ്യത ബിടെക്ക് ആണ്. ഇത് എംടെക്ക് ആക്കുന്ന കാര്യം പി എസ് സി യുടെ പരിഗണനയില് ഉണ്ടെങ്കിലും നടപ്പാക്കിയിട്ടില്ല. സ്വാശ്രയകോളെജിലെ അധ്യാപകരുടെ പരിചയക്കുറവ് ഒരു പ്രശ്നം തന്നെ ആണെന്ന് സാങ്കേതിക വിദ്യാഭ്യാസ ഡയറക്റ്ററും സമ്മതിക്കുന്നുണ്ട്. എന്നാല് ഇതിനൊരു പരിഹാരമില്ല. സ്വാശ്രയ കോളെജുകളുടെ കാര്യത്തില് സര്ക്കാരിന് ഇടപെടാന് തടസങ്ങളുണ്ടെന്നാണ് വിദ്യാഭ്യാസമന്ത്രിയും പറയുന്നത്.
പലപ്പോഴും സ്വാശ്രയ കോളെജില് നിന്ന് പഠച്ചിറങ്ങുന്നവര് തന്നെയാണ് അവിടെ അധ്യാപകരാകുന്നത്. ആദ്യം മറ്റേതെങ്കിലും ജോലിക്ക് ശ്രമിക്കും കിട്ടിയില്ലെങ്കില് സ്വന്തം കോളെജില് ചേരും. സര്ക്കാര് കോളെജിലെ അധ്യാപകര്ക്ക് സര്ക്കാര് തന്നെ പരിശീലനവും മറ്റും നല്കുന്നുണ്ട്. എന്നാല് സ്വാശ്രയ കോളെജില് അതില്ല. ചില കോളെജുകളില് 75 വയസിനു മുകളിലുള്ള അധ്യാപകരമുണ്ട്. ഇവരില് ചിലര്ക്ക് ചെവിയും കേള്ക്കില്ല കണ്ണും കാണില്ല.
എന്ജിനിയറിങ് ബിരുദധാരികളില് മികച്ച റെക്കോര്ഡുള്ളവരെ വിവിധ കമ്പനികള് ജോലിക്കെടുക്കും. വ്യവസായ മേഖല നിരസിക്കപ്പെടുന്നവര് മാത്രമാണ് അധ്യാപക ജോലിക്കെത്തുക എന്ന് കൊച്ചി സര്വകലാശാലാ മുന് വൈസ് ചാന്സിലര് ഡോ.അബ്ദുള് അീസീസ് പറയുന്നു.
ഇക്കൊല്ലം മാത്രം 25,000 സീറ്റുകള് സ്വാശ്രയ കോളെജുകളില് ഒഴിഞ്ഞുകിടക്കുകയാണ്. എന്ജിനിയറിങ് അധ്യാപനം എന്നാല് ഒരിടത്താവളം മാത്രമാണ് പലര്ക്കും. സ്വാശ്രയ കോളെജില് പഠിക്കാനെത്തുന്നവരില് എത്തുന്നവരില് പലരും മിടുക്കരുമല്ല. ബിടെക് മോഹത്തിനുവേണ്ടി ലക്ഷങ്ങള് ചെലവിടുമ്പോള് കോളെജില് നടക്കുന്നതെന്താണെന്ന് ഓരോ രക്ഷകര്ത്താവും മനസിലാക്കിയിരിക്കണം. ഇല്ലെങ്കില് മക്കള്ക്ക് വരുന്ന ദുരിതമോര്ത്ത് ഭാവിയില് ദുഖിക്കേണ്ടിവരും.
https://www.facebook.com/Malayalivartha
