ഏത് ആഘോഷം വന്നാലും നാട്ടില്‍ കോഴിക്ക് കിടക്കപ്പൊറുതി ഇല്ലെന്ന് പറയുന്നത് പോലെയാണ് കുടിയന്മാരുടെ കാര്യം. ആര് വേണോ ഭരിച്ചോട്ടെ അവര്‍ക്കെല്ലാവര്‍ക്കും ഒറ്റ കാര്യത്തിന്, അതായത് ഖജനാവ് നിറയ്ക്കാന്‍ കുടിയന്മാരെ വേണം. ആദര്‍ശങ്ങള്‍ മാറി മാറി പറയുമ്പോള്‍, ഈ കുടിയന്മാര്‍ ഒറ്റ ദിവസം കൊണ്ട് മാനസാന്തരം വന്ന് ഇനി കുടിക്കേണ്ട എന്നു തീരുമാനിച്ചാല്‍ സര്‍ക്കാര്‍ ഖജനാവ് കാലിയാകും. അത് കൊണ്ടാണ് സമ്പൂര്‍ണ മദ്യ നിരോധനം പറയുമ്പോഴും ഘട്ടം ഘട്ടം എന്നു നിറുത്തി നിറുത്തി പറയുന്നത്. ബിവറേജസ് എന്ന പൊന്‍മുട്ടയിടുന്ന താറാവിനെ ഒറ്റയടിക്ക് കൊല്ലാന്‍ പറ്റുമോ?

ഹര്‍ത്താല്‍ ഉള്‍പ്പെടെ ഏത് ആഘോഷം വന്നാലും ഈ കുടിയന്മാരാണ് സര്‍ക്കാരിനെ സമ്പന്നമാക്കുന്നത്. അവര്‍ മരിച്ച് കുടിക്കുന്ന പൈസ കൊണ്ടാണ് സാറുന്മാര്‍ക്ക് പോലും ശമ്പളം കൊടുക്കുന്നത്.
ഈ കുടിയന്മാരില്‍ തന്നെ പല വിഭാഗമുണ്ടല്ലോ. ബിയര്‍ കുടിയന്മാര്‍, കമ്പനി നല്‍കുന്ന കുടിയന്മാര്‍, ചടങ്ങ് കുടിയന്മാര്‍, ആഘോഷ കുടിയന്മാര്‍, പാര്‍ട്ടി കുടിയന്മാര്‍, ഒളിച്ചുകുടിയന്മാര്‍ എന്നു തുടങ്ങി മുഴുക്കുടിയന്മാര്‍ വരെയുണ്ട്. ഇവരില്‍ തന്നെ ദാരിദ്ര്യ രേഖക്ക് താഴെയുള്ള കുടിയന്മാര്‍ മുതല്‍ ഹൈ ടെക് കുടിയന്മാര്‍ വരെയുണ്ട്. സ്വഭാവത്തിന്റെ കാര്യത്തില്‍ കുടിച്ചു കഴിഞ്ഞാല്‍ ചിലപ്പോള്‍ ദാരിദ്യരേഖക്ക് താഴെയായിരിക്കും. കുടിച്ചു കഴിഞ്ഞാല്‍ തറയാകുന്നവരും ഡീസന്റാകുന്നവരും വിരളമല്ല. എങ്കിലും ബഹുഭൂരിപക്ഷരും മാന്യരും സംയമനം പാലിക്കാന്‍ ശ്രമിക്കുന്നവരുമാണ്. പറഞ്ഞിട്ട് കാര്യമില്ല. ഈ തറയാകുന്ന വളരെ ചെറിയ സമൂഹമാണ് കുടിയന്മാരുടെ പേര് ഇല്ലാതാക്കിയത്. ഒരു കുടിയന്‍ എന്നു കേട്ടാല്‍ എല്ലാവരുടേയും മനസില്‍ വരുന്ന ചിത്രവും അതാണ്.
വല്ലപ്പോഴും കുടിക്കുന്നവര്‍ മുതല്‍ മുഴുക്കുടിയന്‍മാര്‍ വരെ ഈ കുടിയന്മാരുടെ കണക്കെടുത്താല്‍ ഭരിക്കുന്ന സര്‍ക്കാരിനെ അധികാരത്തിലേറ്റിയ വോട്ടര്‍മാരില്‍ ഏതാണ്ട് നല്ലൊരു ശതമാനം വരും. കുടിയന്മാരുടെ ഇടയില്‍ ജാതിയോ മതമോ പ്രായമോ തൊട്ടുകൂടായ്മയോ ഒന്നുമില്ല. ഈ കുടിയന്മാര്‍ സംഘടിച്ചാല്‍ ഒരു പക്ഷേ അവരായിരിക്കും കേരളം ഭരിക്കുന്നത്. 
ആനയ്ക്ക് തന്റെ ബലം അറിയാത്തതു പോലെയാണ് കുടിയന്മാരുടെ കാര്യവും. തങ്ങള്‍ ജയിപ്പിച്ച സര്‍ക്കാരിന് കുടിയന്മാരുടെ കാര്യത്തില്‍ എന്ത് തീരുമാനം വേണമെങ്കിലും എടുക്കാം. ഒരു പരാതിയോ പരിഭവമോ ഇല്ല. ഭരിക്കുന്ന ഏത് സര്‍ക്കാരും വരുമാനം കൂട്ടാന്‍ ആദ്യം ചെയ്യുന്നത് മദ്യത്തിന്റെ നികുതി കൂട്ടുക എന്നതാണ്. ഇതിന് കാരണമായി സര്‍ക്കാര്‍ പറയുന്നത് വില കൂട്ടി കുടിയന്മാരുടെ എണ്ണം കുറയ്ക്കുക എന്നതാണ്. പക്ഷെ ഇതൊന്നുമല്ല ലക്ഷ്യം. എത്ര കൂട്ടിയാലും ഇവിടെ സമരം ചെയ്യാത്ത ഒരേ ഒരു വിഭാഗമാണ് കുടിയന്മാര്‍. ഓരോ തവണ മദ്യം വാങ്ങാന്‍ പോക്കറ്റ് തപ്പുമ്പോഴും സ്വയം ശപിക്കുമൊന്നു മാത്രം. അല്ലാതെ എന്തിന് ഒരു പ്രതിഷേധം പോലുമേ കാണിക്കില്ല.
ഭരിക്കുന്നവരും ഭരിപ്പിക്കുന്നവരും തമ്മിലുള്ള അടി കാരണം ചങ്കിലടിച്ചതും കുടിയന്മാര്‍ക്കാണ്. പറഞ്ഞുപറഞ്ഞ് സകല ബാറുകളും പൂട്ടും.
ഏത് സാധനത്തിനാണ് അതിന്റെ അതേ വിലയെക്കാള്‍ നികുതി നല്‍കേണ്ടി വരുന്നത്. അത് മദ്യത്തിനു മാത്രം. ഭരിക്കുന്ന സര്‍ക്കാരുകള്‍ കുടിയന്മാര്‍ കുടി ഉപേക്ഷിക്കാനെന്ന് പറഞ്ഞ് കൂട്ടിക്കൂട്ടി ഇപ്പോള്‍ ഒറ്റയടിക്ക് 20 ശതമാനം കൂട്ടി മൊത്തം 135 ശതമാനമാക്കി. എങ്കിലും ഇവിടെ കൊടിപിടിക്കാന്‍ പോയിട്ട് ഒരു കമന്റ് പറയാന്‍ പോലും ആരുമില്ല.
കുടിവെള്ളത്തിനും മദ്യത്തിനും ഒരുമിച്ചാണ് നികുതി കൂട്ടിയത്. വെള്ളത്തിന് കൂട്ടിയത് ആകട്ടെ തുശ്ചമായ 2 രൂപയാണ്. എന്നാല്‍ ഒരു ഫുള്‍ വാങ്ങണമെങ്കില്‍ ഇനി ഏകദേശം 80 രൂപ അധികം കൊടുക്കണം. വെള്ളത്തിന് കൂട്ടിയ തുശ്ചമായ തുകയ്ക്ക് എതിരെ പ്രതികരിക്കാന്‍ നാടു മൊത്തം ഇളകി കഴിഞ്ഞു. എന്നാല്‍ വെള്ളമടിക്കുള്ള വെള്ളത്തിന് 80 രൂപ കൂട്ടിയതിനെതിരെ പ്രതികരിക്കാന്‍ ഒരു കുടിയന്മാരും ഇല്ല എന്ന ധര്‍മ്മ സങ്കടത്തിലാണ് ഇപ്പോള്‍ ഈ കുടിയന്മാര്‍. 

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha