സാമ്പത്തിക പ്രതിസന്ധിയുടെ മറവില്‍ സര്‍ക്കാരിനെ അട്ടിമറിക്കാന്‍ ഒരുസംഘം ഉദ്യോഗസ്ഥരുടെ ശ്രമം
ഉമ്മന്‍ചാണ്ടി സര്‍ക്കാര്‍ സാമ്പത്തിക പ്രതിസന്ധിയിലായതോടെ ഇടതുപക്ഷ സഹയാത്രികരായ ഒരു സംഘം സര്‍ക്കാര്‍ ഉദ്യോഗസ്ഥര്‍ ജനങ്ങളെ എതിരാക്കി സര്‍ക്കാരിനെ മറിച്ചിടാനുള്ള നീക്കം സജീവമാക്കി. കഴിഞ്ഞ ദിവസം വാഹന പരിശോധനയുടെ പേരില്‍ തിരുവനന്തപുരം കാഞ്ഞിരംകുളത്ത്‌ ഒരു ഓട്ടോറിക്ഷാ ഡ്രൈവര്‍ മരിക്കാനിടയായ സംഭവം സിപിഎമ്മിന്റെ തന്ത്രത്തിന്റെ ഭാഗമായി സംഭവിച്ചതാണെന്ന പ്രചരണം അതിശക്തമാണ്‌.
സര്‍ക്കാര്‍ ജീവനക്കാരില്‍ ഒരു നല്ല ശതമാനം സിപിഎം വിശ്വാസികളാണ്‌. യുഡിഎഫ്‌ സര്‍ക്കാര്‍ അധികാരത്തില്‍ വന്നിട്ടും ഇവരെ തല്‍സ്ഥാനങ്ങളില്‍ തുടരാന്‍ അനുവദിക്കുകയായിരുന്നു. തന്ത്ര പ്രധാന സ്ഥാനങ്ങളില്‍ ഇടതുസഹയാത്രികര്‍ തുടര്‍ന്നപ്പോള്‍ സര്‍ക്കാര്‍ പ്രതിസന്ധിയിലായി. മന്ത്രിസഭാ തീരുമാനങ്ങള്‍ പോലും സമയബന്ധിതമായി നടപ്പിലാക്കാന്‍ സര്ക്കാരിന് കഴിയുന്നില്ല. മന്ത്രിസഭ തീരുമാനമെടുത്ത്‌ 24 മണിക്കൂറിനകം സര്‍ക്കാര്‍ ഉത്തരവ്‌ പുറത്തിറക്കണമെന്നാണ്‌ നിയമമെങ്കിലും ഒരു മാസം കഴിഞ്ഞാലും ഉത്തരവ്‌ ഇറങ്ങാത്ത അവസ്ഥയാണുള്ളത്‌.
മുഖ്യമന്ത്രിയുടെ നിര്‍ദ്ദേശങ്ങള്‍ പോലും സര്‍ക്കാര്‍ ഉദ്യോഗസ്ഥര്‍ അവഗണിക്കുന്നത്‌ നിത്യസംഭവമാണ്‌. ജനസമ്പര്‍ക്ക പരിപാടിയില്‍ ലഭിക്കുന്ന പരാതികള്‍ കൃത്യമായി പരിഹരിക്കാറില്ല. പല അപേക്ഷകളും അകാരണമായി നിരസിക്കുന്നു. തങ്ങള്‍ മുഖ്യമന്ത്രിക്ക്‌ നല്‍കിയ അപേക്ഷ നിരസിക്കപ്പെടുമ്പോള്‍ അപേക്ഷകര്‍ക്ക്‌ ആരോടും പരാതി പറയാന്‍ കഴിയാതെ വരുന്നു. ഇക്കാര്യം മുഖ്യമന്ത്രി അറിയുന്നില്ല.
പോലീസുകാരാണ്‌ ഇപ്പോള്‍ നിയമം കൈയിലെടുക്കുന്നത്‌. സംസ്ഥാനം കടുത്ത സാമ്പത്തിക പ്രതിസന്ധിയിലാണെന്നും ഇതിന്‌ ഉത്തരവാദി ഉമ്മന്‍ചാണ്ടിയാണെന്നുമുള്ള പ്രചരണമാണ്‌ നടക്കുന്നത്‌. സര്‍ക്കാരാകട്ടെ ഇത്തരം പ്രചരണങ്ങള്‍ക്ക്‌ കുട പിടിക്കുന്ന തരത്തിലാണ്‌ പെരുമാറുന്നത്‌. സര്ക്കാരിന് മുമ്പില്‍ പൊതുജനങ്ങളാണ്‌ ഇപ്പോള്‍ ശത്രുക്കള്‍. മദ്യനയം രൂപം നല്‍കിയത്‌ ജനങ്ങളാണെന്ന മട്ടിലാണ്‌ സംസ്ഥാന സര്‍ക്കാര്‍ പെരുമാറുന്നത്‌.
സര്‍ക്കാരിനെ ജനങ്ങള്‍ക്ക്‌ എതിരാക്കാന്‍ ഇതിലും മികച്ചൊരു അവസരമില്ലെന്ന മട്ടിലാണ്‌ ഇടതുപക്ഷ ജീവനക്കാര്‍ പെരുമാറുന്നത്‌. സിപിഎം സംസ്ഥാന നേതൃത്വം തന്നെ സര്‍ക്കാരിനെതിരെ നീങ്ങാന്‍ ഉദ്യോഗസ്ഥര്‍ക്ക്‌ നിര്‍ദ്ദേശം നല്‍കിയിട്ടുണ്ട്‌. സിപിഎമ്മിന്റെ ഉന്നത നേതാക്കള്‍ സെക്രട്ടറിയേറ്റ്‌ ഫ്രാക്ഷനിലുളള ജീവനക്കാരുടെ യോഗം വിളിച്ച്‌ സര്‍ക്കാര്‍ വിരുദ്ധ നടപടികള്‍ കൈകൊള്ളാന്‍ നിര്‍ദ്ദേഷിച്ചതായാണ്‌ വിവരം.
ഏതായാലും സര്‍ക്കാര്‍ പ്രതിസന്ധിയിലായിരിക്കുകയാണ്‌. സര്‍ക്കാരിനാകട്ടെ കൈവിട്ട മട്ടാണ്‌. ഒന്നിലും ദിശാബോധമില്ലാത്ത തരത്തിലാണ്‌ മന്ത്രിമാര്‍ പോലും പ്രതികരിക്കുന്നത്‌. സര്‍ക്കാര്‍ പ്രതിസന്ധിയിലാണെന്ന രീതിയില്‍ തന്നെയാണ്‌ മാധ്യമ പ്രചരണങ്ങളും നടക്കുന്നത്‌. കേന്ദ്ര സര്‍ക്കാര്‍ സഹായിക്കാതിരുന്നാല്‍ സര്‍ക്കാര്‍ ജീവനക്കാരുടെ ശമ്പളം പോലും നല്‍കാന്‍ കഴിയാത്ത വിധത്തില്‍ ഉമ്മന്‍ചാണ്ടി ആശങ്കയിലാകുമെന്ന പ്രചരണവും ശക്തമാണ്‌. ഏതായാലും പാകിസ്ഥാനില്‍ സര്‍ക്കാരിനെ പട്ടാളം മറിക്കുന്നതുപോലെ കേരളത്തില്‍ ഉദ്യോഗസ്ഥര്‍ സര്‍ക്കാരിനെ മറിക്കുന്ന കാഴ്‌ച കാണാന്‍ കാത്തിരിക്കാം.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
