ഓസ്‌കാറിലേയ്ക്ക് നടന്നടുക്കുന്ന ഗീതു മോഹന്‍ദാസിന്റെ മനസ്സില്‍ അമര്‍ഷം നിറയുന്നു. താന്‍ പിച്ചവച്ചു നടന്ന മലയാളം തന്നെ അപമാനിച്ചതിലാണ് ഗീതുവിനു സങ്കടം. മലയാളത്തിന്റെ മകള്‍ ഓസ്‌കാര്‍ നോമിനേഷന് മുമ്പില്‍ നില്‍ക്കുന്നത് അഭിമാന പുരസരമാണ്. 
ഒന്നുമുതല്‍ പൂജ്യം വരെ എന്ന ചിത്രത്തില്‍ ദീപയായി അഭിനയിച്ച ബാലതാരമാണ് ഇപ്പോള്‍ ഇന്ത്യയില്‍ തന്നെ അഭിമാന നേട്ടം കൈവരിച്ചിരിക്കുന്നത്. 35 ഓളം സിനിമകളില്‍ ഗീതു നായികയായി അഭിനയിച്ചു. സംവിധായികയുടെ കുപ്പായമണിയുന്നത് കേള്‍ക്കുന്നുണ്ടോ എന്ന ഹ്രസ്വ ചിത്രത്തിലൂടെയായിരുന്നു. എന്നാല്‍ ഗീതുവിന്റെ ശ്രമം കേരളം വേണ്ടത്ര കേട്ടില്ല. ഗീതുവിന്റെ ആദ്യ ഫീച്ചര്‍ ചിത്രമായ ലയേഴ്‌സ് സൈബണ്‍ ആണ് ഇന്ത്യയില്‍ നിന്നുള്ള ഏക ഓസ്‌കാര്‍ എന്‍ട്രി ആയിരിക്കുന്നത്. 
ഓസ്‌കാറിലേക്കുളള തന്റെ യാത്ര തീര്‍ത്തും അപ്രതീക്ഷിതമാണെന്ന് ഗീതു പറയുന്നു. സാധാരണ ചലച്ചിത്ര മേളകളിലേയ്ക്ക് ചിത്രം അയക്കുന്നതു പോലെ ഇതും അയച്ചു. പുരസ്‌കാരങ്ങള്‍ ലക്ഷ്യമാക്കിയല്ല താന്‍ സിനിമ എടുക്കുന്നതെന്ന് ഗീതു മോഹന്‍ദാസ് പറയുന്നു. 
കേരളത്തില്‍ വേണ്ടത്ര അംഗീകാരം കിട്ടാത്തതെന്തു കൊണ്ടാണെന്ന ചോദ്യത്തിന് താന്‍ വിവാദങ്ങള്‍ക്കില്ലെന്നാണ് ഗീതുവിന്റെ മറുപടി. വിവാദമുണ്ടാക്കാനൊന്നും തനിക്ക് താത്പര്യമില്ല.
മലയാളത്തില്‍ ഗീതുവിന്റെ ആദ്യചിത്രം വരാനിരിക്കുകയാണ്. ചിത്രത്തിന്റെ കഥ എന്താണെന്നു മാത്രം ഗീതു പറയില്ല. അതു പറഞ്ഞാല്‍ രസം പോകുമെന്നാണ് ഗീതുവിന്റെ അഭിപ്രായം. ഇന്തോ-ടിബറ്റ് അതിര്‍ത്തിയില്‍ അലയുന്ന ഒരമ്മയുടെയും മകളുടെയും കഥയാണ് ഓസ്‌കാര്‍ നോമിനേഷന്‍ നേടിയ കഥയായി മാറിയത്. സിനിമയില്‍ ആണ്‍-പെണ്‍ ഭേദമില്ലെന്നും ഗീതുമോഹന്‍ ദാസ് പറയുന്നു. 
ഓസ്‌കാര്‍ ലഭിക്കുമെന്ന് ഗീതു വിശ്വസിക്കിന്നില്ല. എങ്കിലും ഓസ്‌കാറിലേക്കുള്ള യാത്ര പോലും ഓസ്‌കാറിനെ പോലെ രസകരമാണെന്ന് ഗീതു പറയുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha