ചെവി വേദനയും നാട്ടുവൈദ്യവും
ചെവിയ്ക്കുണ്ടാകുന്ന ചെറിയ പലപ്രശ്നങ്ങള്ക്കും ആയുര്വേദത്തില് ചികില്സയുണ്ട്. വീട്ടിലിരുന്ന് തന്നെ ഇവയില് പല ചികില്സകളും നമുക്ക് ചെയ്യുകയും ചെയ്യാം.എന്നാല് തലചുറ്റല് , കേള്വിക്കുറവ്, ചെവിമൂളല് പോലുള്ളവ ഒരുമിച്ചുണ്ടാവുന്നത് കൂടുതല് ഗൗരവമര്ഹിക്കുന്നതാണ്. അത്തരം സന്ദര്ഭങ്ങളില് സ്വയം ചികില്സ ചെയ്യാതെ വൈദ്യസഹായം തേടുക. ശിശുക്കളില് ഉണ്ടാകുന്ന ചെറിയ പ്രശ്നങ്ങള് പോലും പിന്നീട് ഗുരുതരമായ കേള്വിക്കുറവിനും മറ്റും കാരണമായേക്കാം. അതിനാല് ശിശുക്കള്ക്കുണ്ടാകുന്ന കര്ണരോഗങ്ങള് സ്വയം ചികില്സ ഒഴിവാക്കുന്നതാണ് നല്ലത്.
രോഗാവസ്ഥയല്ല ചെവിക്കായം ഒരു രോഗാവസ്ഥയാണെന്ന തെറ്റിദ്ധാരണ നിലനില്ക്കുന്നുണ്ട്. ചെവിയുടെ അകത്തുള്ള ഗ്രന്ഥികള് ഉത്പാദിപ്പിക്കുന്ന സ്രവമാണിത്. ഇത് കര്ണപുടത്തെ പൊടിപടലങ്ങള്, പ്രാണികള്, മാലിന്യങ്ങള് എന്നിവയില് നിന്ന് സംരക്ഷിക്കുന്നു. ചെവിക്കായം വാസ്തവത്തില് ചെവിയുടെ സംരക്ഷകനാണ് എന്നര്ത്ഥം
ചെവിക്കുണ്ടാകുന്ന നീര്ക്കെട്ടാണ് കൂടുതലായി കണ്ടുവരുന്ന രോഗം. ഇത് മുതിര്ന്നവരെയും കുട്ടികളെയും ഒരുപോലെ ബാധിക്കാവുന്ന രോഗമാണ്. പ്രത്യേക ഔഷധ എണ്ണകളാണ് ഇതിന് പരിഹാരമായി ആയുര്വേദം നിര്ദേശിക്കുന്നത്. ഇവ പുരട്ടുന്നതിലൂടെ നീര്ക്കെട്ടിനുള്ള സാധ്യതതന്നെ ഇല്ലാതാക്കാം. വൈദ്യന്റെ നിര്ദേശപ്രകാരം വേണം ഇത്തരം എണ്ണകള് പുരട്ടാന്. രോഗിയുടെ പ്രകൃതത്തിന് ഇണങ്ങാത്ത തരത്തിലുള്ള എണ്ണ ഉപയോഗിക്കുന്നത് വിപരീതഫലം ചെയ്യും.
ചെവിയ്ക്കകത്ത് കുരു ഉണ്ടാകുന്നത് പലപ്പോഴും വേദനയും അസ്വസ്ഥതകളും സൃഷ്ടിക്കും. എരുക്കിന് ഇലയില് എണ്ണ പുരട്ടി വാട്ടി പിഴിഞ്ഞ നീര് ചെവിക്കുള്ളില് ഒഴിക്കുന്നത് വളരെ നല്ലതാണ്. എരുക്കില നീരും ഉള്ളിയും മഞ്ഞളിന്നീരും കൂട്ടി ചൂടോടെ വീഴ്ത്തിയാലും കുരുവും അതിന്റെ വേദനയും ശമിക്കും. കൂവളത്തില നീരില് കൂവളത്തിന് വേര് അരച്ച് പാലും ചേര്ത്ത് എണ്ണ കാച്ചി തേച്ചാല് മിക്ക കേള്വിക്കുറവും ശമിക്കും. ചെവി അടഞ്ഞാല് ചെറുനാരങ്ങയില് ഇന്ദുപ്പ് നിറച്ച് ചുട്ട് എടുത്ത് പിഴിഞ്ഞ നീര് ചെവിയില് ഒഴിക്കുക. ഇത് ചെവിവേദനയ്ക്കും ചെവി പഴുപ്പിനും വളരെ നല്ലതാണ്.
https://www.facebook.com/Malayalivartha