ഗ്യാസ്ട്രബിള്‍ ഒരു രോഗമല്ല. രോഗലക്ഷണമാണ്.....വയറു സംബന്ധമായ പല രോഗങ്ങളുടെയും ലക്ഷണമായി ഇത് പ്രത്യക്ഷപ്പെടാം
ജീവിതത്തിൽ പലപ്പോഴും ഗ്യാസിന്റെ അസ്വസ്ഥതകൾ അനുഭവപ്പെടാറുണ്ട്. കുടലിന്റെ പ്രവര്‍ത്തനത്തില്‍ ഉണ്ടാകുന്ന തകരാറുകള്‍, നാം കഴിക്കുന്ന ആഹാരം, മാനസികസമ്മര്‍ദ്ദം എന്നിവയെല്ലാം ഗ്യാസിനു കാരണമാവാം..
പലരും കരുതുന്നതുപോലെ ഗ്യാസ്ട്രബിള്‍ ഒരു രോഗമല്ല. രോഗലക്ഷണമാണ്. വയറു സംബന്ധമായ പല രോഗങ്ങളുടെയും ലക്ഷണമായി ഇത് പ്രത്യക്ഷപ്പെടാം.
കുടലിന്റെ പ്രവര്‍ത്തനത്തില്‍ ഉണ്ടാകുന്ന തകരാറുകള്‍,ഹൃദ്രോഗം, ആമാശയത്തിലെ അണുബാധ, പെപ്റ്റിക് അള്‍സര്‍, ദഹനക്കേട്്, മരുന്നുകള്‍ കഴിക്കുന്നതുമൂലം ഉണ്ടാകുന്ന മാറ്റം തുടങ്ങി ഭക്ഷണത്തിലെ അപാകതകൾ വരെ ഗ്യാസിന് കാരണമാകാറുണ്ട്.
എണ്ണമയമുള്ള ആഹാരം, ഫ്രൂട്ട് ജൂസ്, കാപ്പി എന്നിവയും ദഹനപ്രക്രിയയെ ബാധിക്കാമെന്നതിനാല്‍ ഗ്യാസ്ട്രബിളിനുള്ള സാധ്യത കൂടുതലാണ്. ശാരീരിക പ്രത്യേകത അനുസരിച്ച് പലർക്കും കിഴങ്ങ് വർഗ്ഗങ്ങൾ കഴിക്കുന്നത് ഗ്യാസിന് കാരണമാകാറുണ്ട് .
ആസ്പിരിൻ, ∙ സ്റ്റീറോയ്ഡുകൾ, ∙ എരിത്രോമൈസിൻ തുടങ്ങിയ മരുന്നുകളും ഗ്യാസ് ഉണ്ടാകാൻ കാരണമായേക്കാം
ഗ്യാസ് ഉണ്ടാകുന്നത് എങ്ങനെ?
ശരീരത്തിലെ ദഹനപ്രക്രിയപൂർണതയിൽ എത്താത്തതാണ് ഗ്യാസ്ട്രബിളിന് കാരണമാകുന്നത് . നാം കഴിക്കുന്ന ആഹാരം ചവച്ചരച്ച് വായിലെ ഉമിനീരുമായി ചേര്‍ന്ന് അന്നനാളത്തിലൂടെ ആമാശയത്തില്‍ എത്തുന്നു. ആമാശയത്തില്‍വച്ച് എന്‍സൈമുകളുടെയും ദഹനരസങ്ങളുടെയും പ്രവര്‍ത്തന ഫലമായി ഇത് കുഴമ്പു രൂപത്തിലാകുന്നു.
തുടര്‍ന്ന് ഇത് ചെറുകുടലില്‍ എത്തുന്നു. ഇവിടെവച്ച് ആഹാരത്തിലെ പോഷകങ്ങളെ ചെറു കുടലിന്റെ ഭിത്തികള്‍ വലിച്ചെടുക്കുകയും ദഹനപ്രക്രിയ അവസാനിക്കുകയും ചെയ്യുന്നു. എന്നാല്‍ ചിലരില്‍ പല കാരണങ്ങള്‍കൊണ്ടും ദഹനപ്രക്രിയ പൂര്‍ത്തിയാകണമെന്നില്ല..ഇങ്ങനെ ദഹിക്കപ്പെടാതെ കിടക്കുന്ന ഭക്ഷണാവശിഷ്ടങ്ങള്‍ വന്‍കുടലില്‍ എത്തിപ്പെടുന്നു.
തുടര്‍ന്ന് ബാക്ടീരിയയുടെ പ്രവര്‍ത്തന ഫലമായി കാര്‍ബണ്‍ഡയോക്‌സൈഡ്, മീഥേന്‍, ഹൈഡ്രജന്‍ തുടങ്ങിയ വാതകങ്ങള്‍ ഉല്പാദിപ്പിക്കപ്പെടുന്നു.
ചില ഭക്ഷണപദാര്‍ഥങ്ങള്‍ കഴിക്കുമ്പോള്‍ (ഉദാഹരണം: കിഴങ്ങുവര്‍ഗങ്ങള്‍, പയര്‍, പരിപ്പ്, കടല, പാല്‍) അത് പൂര്‍ണമായി ആഗിരണം ചെയ്യപ്പെടാതിരിക്കുന്നതാണ് ഗ്യാസ്ട്രബിളിനു കാരണമായിത്തീരുന്നത്. പാലില്‍ അടങ്ങിയിരിക്കുന്ന ലാക്‌ടോസ് എന്ന ഘടകം ചെറുകുടലില്‍ പൂര്‍ണമായി ആഗീകരണം ചെയ്യപ്പെടാതിരിക്കാം.
ആഗീരണം ചെയ്യപ്പെടാത്ത ലാക്‌ടോസ് വന്‍കുടലിലെത്തുമ്പോള്‍ ബാക്ടീരിയയുടെ പ്രവര്‍ത്തനത്തിലൂടെ ഹൈഡ്രജനായി മാറുന്നു. ഇങ്ങനെ ആന്തരിക പ്രവര്‍ത്തനങ്ങളുടെ ഫലമായി ഗ്യാസ് ഉണ്ടാകാം.
ലക്ഷണങ്ങൾ
അമിതമായ അധോവായു
∙ ഏമ്പക്കം
∙ പുളിച്ചുതികട്ടൽ
∙ വയറുവീർത്തിരിക്കുക
∙ നെഞ്ചെരിച്ചിൽ
ചിലരിൽ നെഞ്ചുവേദനയായും പുറം വേദനയായും അനുഭവപ്പെടാം
വയറിന്റെ പലഭാഗങ്ങളിലായുള്ള വേദന
ഗ്യാസ് മൂലമുള്ള ബുദ്ധിമുട്ട് അധികമായി തോന്നുന്നവർ ഒഴിവാക്കേണ്ട കാര്യങ്ങൾ ഇനി പറയാം
ചൂടും എരിവും കൂടുതലുള്ള ഭക്ഷണപദാർത്ഥങ്ങൾ
∙ മദ്യപാനം
∙ പുകവലി
∙ രാത്രി വൈകിയുള്ള ഭക്ഷണം
∙ വയറു നിറച്ചുള്ള ഭക്ഷണം
∙ പയറു വർഗ്ഗങ്ങൾ
∙ കിഴങ്ങുവർഗങ്ങൾ
∙ പാൽ
∙ മധുരപലഹാരങ്ങൾ, ബേക്കറി പലഹാരങ്ങൾ
∙ ഉള്ളി, തക്കാളി, ചോക്ലേറ്റ് എന്നിവ നിയന്ത്രിക്കുക
ഭക്ഷണം കഴിഞ്ഞതിനു ശേഷം ഏറെ നേരം ദേഹമനാകാതെ ഇരിക്കുന്നതും ഗ്യാസ്ട്രബിളിന് കാരണമാകാറുണ്ട്. ശരിയായ വ്യായാമം ഗ്യാസ്ട്രബിൾ കുറയ്ക്കും . മാനസിക സമ്മർദ്ദവും ഗ്യാസിന് കാരണമാകാറുണ്ട്
രണ്ട് ആഴ്ച കഴിഞ്ഞിട്ടും മാറാത്ത ഗ്യാസ്ട്രബിൾ, ∙ ഭക്ഷണം ഇറക്കാൻ ബുദ്ധിമുട്ട്, ∙ തൂക്കകുറവ്, അമിതക്ഷീണം, ∙ വിശപ്പില്ലായ്മ എന്നിവയുണ്ടെങ്കിൽ വിദഗ്ധ ചികിത്സ ആവശ്യമാണ്.
വയറ്റിൽ ഗ്യാസ് നിറഞ്ഞതുപോലെ തോന്നുക, ഏമ്പക്കം, ഓക്കാനം, തുടങ്ങിയ പ്രശ്നങ്ങൾ ഹൃദയാഘാതം മൂലമുണ്ടാകാം. ഇത്തരം പ്രശ്നങ്ങൾ വരുമ്പോൾ ഗ്യാസ്ട്രബിൾ ആണെന്ന് കരുതി ലഘുവായി എടുക്കാതെ വൈദ്യസഹായം തേടുക.
https://www.facebook.com/Malayalivartha
