ബ്രൊക്കോളി ചര്മാര്ബുദത്തെ തടയും
ബ്രൊക്കോളി, കോളിഫ്ലവര് എന്നിവ ചര്മാര്ബുദത്തെ തടയുമെന്നാണ് പഠനങ്ങള് തെളിയിക്കുന്നത്. ഇവയിലടങ്ങിരിക്കുന്ന ഒരു സംയുക്തം ചര്മാര്ബുദമായ മെലനോമ ബാധിച്ച കോശങ്ങളെ നശിപ്പിക്കുമെന്നാണ് പഠനങ്ങള് പറയുന്നത്. രോഗം ബാധിച്ച കോശങ്ങളുടെ വളര്ച്ച 69 ശതമാനം തടയാന് ഈ സംയുക്തത്തിനാകുമെന്ന് എലികളില് നടത്തിയ പഠനത്തില് തെളിഞ്ഞു. സമീപത്തെ ആരോഗ്യമുള്ള കോശങ്ങള്ക്കു കേടുപാടു വരുത്താതെതന്നെ അര്ബുദ കോശങ്ങളെ നശിപ്പിക്കുന്ന ഒരു പുതിയ മരുന്നിന്റെ കണ്ടെത്തലിലേക്ക് ഈ പഠനഫലം നയിക്കുമെന്നാണ് ഗവേഷകരുടെ പ്രതീക്ഷ.
ചര്മത്തിലുണ്ടാകുന്ന അര്ബുദത്തില് വളരെ സാധാരണവും ഗുരുതരവുമാണ് അള്ട്രാവയലറ്റ് കിരണങ്ങള് ഏല്ക്കുന്നതു മൂലമുണ്ടാകുന്ന മെലനോമ. നേരത്തേ കണ്ടെത്തിയാല് ശസ്ത്രക്രിയയിലൂടെ ഭേദമാക്കാവുന്ന ഒന്നാണിത്. എന്നാല് ക്രമേണ അത് ശരീരത്തിന്റെ എല്ലാ ഭാഗങ്ങളിലേക്കും വ്യാപിക്കുകയും ചികിത്സിച്ചു ഭേദമാക്കാന് പറ്റാത്ത ഘട്ടം എത്തുകയും ചെയ്യും. മെലനോമയുടെ അവസാന ഘട്ടത്തില് കീമോതെറപ്പിയോ മറ്റു മരുന്നുകളോ ഫലപ്രദമാകില്ല. ചര്മത്തിലെ അര്ബുദം മൂലമുള്ള നാലില് മൂന്നു മരണത്തിനും മെലനോമ കാരണമാകുന്നു.
കാബേജ് കുടുംബത്തില്പ്പെട്ട പച്ചക്കറികളായ ബ്രൊക്കോളി, കോളിഫ്ലവര്, കെയ്ല്, ടര്ണിപ്, കൊളാര്ഡ്, റാഡിഷ് എന്നീ പച്ചക്കറികളില് അര്ബുദ നാശകാരിയായ സംയുക്തം അടങ്ങിയിട്ടുണ്ട്. പ്രകൃത്യാ കാണപ്പെടുന്ന, ഐസോസയനേറ്റുകളില്നിന്നു വേര്തിരിക്കുന്ന ഈ സംയുക്തമാണ് അര്ബുദത്തെ തടയുന്നതെന്ന് പെന് സ്റ്റേറ്റ് കോളജ് ഓഫ് മെഡിസിനിലെ ഗവേഷകര് നടത്തിയ പഠനത്തില് വ്യക്തമായി. അര്ബുദ മുഴകളെ വളരാന് അനുവദിക്കുന്ന മാംസ്യത്തെ ഇതു തടയുന്നു. ഫലപ്രാപ്തി വര്ധിപ്പിക്കാനായി ഗവേഷകര് മരുന്നിനു ചില മാറ്റങ്ങള് വരുത്തി. സള്ഫറിനു പകരം അവര് സെലേനിയം ഉപയോഗിച്ചു. യൂറോപ്യന് ജേണല് ഓഫ് മെഡിസിനല് കെമിസ്ട്രിയില് ഈ പഠനഫലം പ്രസിദ്ധീകരിച്ചിട്ടുണ്ട്.
https://www.facebook.com/Malayalivartha
