പൂപ്പല്‍ പോലെ നാവില്‍ കാണുന്ന വെള്ളനിറം സാധാരണഗതിയിൽ അപകടം ചെയ്യില്ലെങ്കിലും മാനസികമായി ബുദ്ധിമുട്ടുകൾ ഇതുമൂലം ഉണ്ടാകാറുണ്ട്. മാത്രമല്ല വായ്ക്ക് അരുചി, വായ്നാറ്റം എന്നിവക്കും ഇത് കാരണമായേക്കാം.

ആരോഗ്യമുള്ള നാക്കിന്റെ കളര്‍ പിങ്ക് ആണ്. നാവില്‍ പാപിലെ എന്ന പേരുള്ള ചെറിയ അറകള്‍ ഉണ്ട്. എന്നാല്‍ കൃത്യമായി വൃത്തിയാക്കാതെ അഴുക്കും ബാക്ടീരിയയും അടിഞ്ഞുകൂടിയാല്‍ നാവിനു വെള്ള നിറമാകും. നിര്‍ജലീകരണം, നാക്കില്‍ അവശിഷ്ടങ്ങള്‍ അടിഞ്ഞുകൂടുന്നതിന് സഹായിക്കുന്ന ചില ഭക്ഷണങ്ങള്‍ എന്നിവയും നിറമാറ്റത്തിന് കാരണമാകാം. ഈ നിറം മാറ്റം തല്‍ക്കാലത്തേയ്ക്ക് ഉള്ള പ്രശ്നമാണ്.എന്നാല്‍ ശ്രദ്ധിയ്ക്കാതെ ഇരുന്നാല്‍ അപകടം ആവാനും സാധ്യതയുണ്ട്.

ഇനി പറയുന്ന ലളിതമായ വീട്ടു ചികിത്സകള്‍ നാക്കിന്റെ വെള്ള നിറം മാറ്റുന്നതിന് സഹായകമാവും

ഉപ്പ് (Salt): നാക്കില്‍ നിന്ന് മൃതകോശങ്ങളെയും ഭക്ഷണാവശിഷ്ടങ്ങളെയും ഉരച്ചു കളയുന്നതിന് ഉപ്പു സഹായിക്കും. ബാക്ടീരിയകള്‍ക്കെതിരെ പ്രവര്‍ത്തിക്കുമെന്നതും ഉപ്പിന്റെ പ്രത്യേകതയാണ്. നാക്കിന് വെളുത്ത നിറമാണെങ്കില്‍, അല്‍പ്പം ഉപ്പ് നാക്കില്‍ വിതറിയ ശേഷം, ടൂത്ത് ബ്രഷ് ഉപയോഗിച്ച്‌ ഒരു മിനിറ്റ് നേരം നാക്ക് പതിയെ ഉരയ്ക്കുക. ഇനി, ഇളം ചൂടുവെള്ളത്തില്‍ വായ കഴുകുക. ഇത് രണ്ട് തവണ ആവര്‍ത്തിക്കുന്നത് നന്നായിരിക്കും.

ബേക്കിംഗ് സോഡ (Baking Soda): അല്‍പ്പം ബേക്കിംഗ് സോഡയും നാരങ്ങനീരും ചേര്‍ത്ത് കുഴമ്പ് പരുവത്തില്‍ ആക്കി മൃദുവായ ബ്രിസില്‍സ് ഉള്ള ടൂത്ത് ബ്രഷ് ഉപയോഗിച്ച് നാക്ക് ഉരച്ച്‌ വൃത്തിയാക്കാം. പ്രകടമായ ഫലം ലഭിക്കുന്നതു വരെ, ദിവസം ഒരു തവണ വീതം ഇത് ആവര്‍ത്തിക്കുക.

കറ്റാര്‍വാഴ (Aloe Vera): കറ്റാര്‍വാഴയ്ക്ക് ബാക്ടീരിയയ്ക്ക് എതിരെ പ്രവര്‍ത്തിക്കാനുള്ള കഴിവ്ഉണ്ട്. ഒരു ടീ സ്പൂണ്‍ കറ്റാര്‍ വാഴ ജ്യൂസ് ഒരു മിനിറ്റ് നേരം വായയില്‍കൊണ്ടശേഷം കുലുക്കുഴിഞ്ഞ് തുപ്പിക്കളയുക. ഇതിനു ശേഷം ഒരു ടീ സ്പൂണ്‍ കറ്റാര്‍വാഴ ജ്യൂസ് കുടിക്കുക. ഏതാനും ആഴ്ച ഇത് തുടരുക.
വെജിറ്റബിള്‍ ഗ്ളിസറിന്‍ (Vegetable Glycerin): വായ വരള്‍ച്ച മൂലമാണ് നാക്കിനു വെളുപ്പു നിറമെങ്കില്‍, വെജിറ്റബിള്‍ ഗ്ളിസറിന്‍ പ്രയോജനപ്പെടും. ഇത് വായ്നാറ്റത്തില്‍ നിന്നും സംരക്ഷണം നല്‍കും. നാക്കില്‍ ഒന്നോ രണ്ടോ തുള്ളി വെജിറ്റബിള്‍ ഗ്ളിസറിന്‍ ഒഴിച്ച ശേഷം മൃദുവായ ടൂത്ത് ബ്രഷ് ഉപയോഗിച്ച്‌ ഉരയ്ക്കുക. ബ്രഷുചെയ്ത ശേഷം ഇളം ചൂടുവെള്ളത്തില്‍ വായ കഴുകണം. നാവിന് സ്വാഭാവിക നിറം ലഭിക്കുന്നതു വരെ ദിവസം രണ്ട് നേരം ഇത് തുടരുക.

ഓയില്‍ പുള്ളിംഗ് (Oil Pulling): ഫംഗസ് അണുബാധ മൂലമാണ് നാക്കിന് വെളുത്ത നിറമെങ്കില്‍ ഈ നടപടി പ്രയോജനപ്പെടും. യീസ്റ്റ് അണുബാധ ഇല്ലാതാക്കുന്നതിന് ഓയില്‍ പുള്ളിംഗ് സഹായകമാണ്. രാവിലെ ബ്രഷു ചെയ്യുന്നതിനുമുൻപ്ഒരു ടീ സ്പൂണ്‍ വെളിച്ചെണ്ണ (പച്ചത്തേങ്ങയില്‍ നിന്നുള്ളതാണ് ഉത്തമം) വായില്‍ക്കൊണ്ട് നല്ലവണ്ണം കുലുക്കുഴിയുക. ഇതിനു ശേഷം വായ ഇളം ചൂടുള്ള വെള്ളത്തില്‍ കഴുകുക.

പ്രോബയോട്ടിക്കുകള്‍ (Probiotics): പ്രോബയോട്ടിക്കുകള്‍ (ലാക്റ്റോബാസില്ലസ് അസിഡോഫൈലസ്) വായയിലെ ബാക്ടീരിയ വളര്‍ച്ചയെ നിയന്ത്രിക്കുന്നു. ഒരു പ്രോബയോട്ടിക് ക്യാപ്സ്യൂള്‍ വെള്ളത്തില്‍ കലര്‍ത്തുക. സാധാരണ രീതിയില്‍ ബ്രഷ് ചെയ്യുകയും വായ കഴുകി വൃത്തിയാക്കുകയും ചെയ്യുക. അതിനു ശേഷം ഈ ലായനി ഉപയോഗിച്ച്‌ വായ കുലുക്കുഴിഞ്ഞ് കുടിക്കുക. ഇനി ഒരു ഗ്ളാസ് വെള്ളം കൂടി കുടിക്കാം. ഒരാഴ്ചക്കാലം ദിവസം ഒരു തവണ വീതം ഇത് തുടരുക.