ഫാറ്റിലിവറും അനുബന്ധ പ്രശ്നങ്ങളും
കരളിലെ കോശങ്ങളില് അധികമായി കൊഴുപ്പ് അടിഞ്ഞുകൂടുന്നതുമൂലമാണ് ഫാറ്റി ലിവര് ഉണ്ടാകുന്നത്. ഭക്ഷണത്തില് കൂടി ശരീരത്തിന് അനുവദനീയമായ അളവില് കൂടുതല് കൊഴുപ്പ് ലഭിക്കുമ്പോള് അധിക കൊഴുപ്പ് കരളില് അടിഞ്ഞുകൂടാന് ഇടയാകുന്നു. സാധാരണനിലയിലുള്ള ഫാറ്റി ലിവര് തികച്ചും നിരുപദ്രവകാരിയും കരളിന് എന്തെങ്കിലും തകരാറുണ്ടാക്കുന്നതോ അല്ല. പക്ഷേ, കൂടുതല് കൊഴുപ്പ് അടിഞ്ഞുകൂടിക്കൊണ്ടിരുന്നാല് അത് കരള്വീക്കത്തിലേക്കും ദ്രവിക്കലിലേക്കും നയിക്കും.
സാധാരണയായി ഫാറ്റി ലിവറിന് പ്രകടമായ രോഗലക്ഷണങ്ങള് ഒന്നും തന്നെ കാണപ്പെടാറില്ല . എങ്കിലും, ക്രമാതീതമായ ക്ഷീണം, വയറിനുമുകളില് വലതുഭാഗത്ത് അനുഭവപ്പെടുന്ന വേദന ,ഓക്കാനം മുതലായവയെ ഇതിന്റെ ലക്ഷണങ്ങളായി കാണാം.
പക്ഷേ, രോഗം മൂര്ച്ഛിക്കുമ്പോള് കരളിന്റെ പ്രവര്ത്തനം തടസപ്പെടുന്നു. കണ്ണില് മഞ്ഞനിറം, കാലില് നീര്, രക്തം ഛര്ദ്ദിക്കുക എന്നീ ഗുരുതരമായ രോഗലക്ഷണങ്ങള് പ്രത്യക്ഷപ്പെടുന്നു.
അമിതവണ്ണമുള്ളവരില് 75 ശതമാനം ആളുകളിലും ഫാറ്റി ലിവർ കാണാറുണ്ട്. എന്നാല്, ഇവരില്ത്തന്നെ 25 ശതമാനം പേര്ക്ക് മാത്രമേ ഗുരുതരമായ കരള് രോഗം പിടിപെടാറുള്ളു. അതുതന്നെ പലപ്പോഴും അനേകവര്ഷങ്ങള് കഴിഞ്ഞു മാത്രമേ രോഗലക്ഷണങ്ങള് പ്രകടമാകാറുള്ളു.
മദ്യപാനം മൂലമല്ലാത്ത ഫാറ്റി ലിവര് രോഗത്തിന്റെ അപകടം കുറയ്ക്കാന്
ധാന്യങ്ങളും പഴവര്ഗങ്ങളും അപകടകാരികളല്ലാത്ത കൊഴുപ്പും അടങ്ങിയ ഭക്ഷണങ്ങള് കഴിക്കുക.ഭക്ഷണത്തിലൂടെയും വ്യായാമത്തിലൂടെയും ഭാരം കൂടാതെ നോക്കുക എന്നിവ ഫലപ്രദമാണ്. മദ്യപാനം മൂലമുള്ള ഫാറ്റി ലിവര് നിയന്ത്രിക്കാന് മദ്യ ഉപഭോഗം പൂര്ണമായും അവസാനിപ്പിക്കണം
രക്തത്തിന്റെ കൗണ്ട്,എസ്ജിപിടി (SGPT),എസ്ജിഒടി (SGOT) എന്നിവയാണ് നിര്ദേശിക്കപ്പെടുന്ന പരിശോധനകള്.ജനറല് ഫിസിഷ്യനെയോ ഇന്റേണല് മെഡിസിന് ഡോക്ടറെയോ വേണം കാണേണ്ടത്.
https://www.facebook.com/Malayalivartha
