ഇവ ഗര്ഭാശയാര്ബുദ സാധ്യത കൂട്ടും
ഭക്ഷണത്തില് കൂണ്, കക്കയിറച്ചി എന്നിവ പതിവായി ഉള്പെടുത്താറുണ്ടെങ്കില് സൂക്ഷിക്കുക. ഇവ ഗര്ഭാശയാര്ബുദ സാധ്യത കൂട്ടുമെന്നാണ് പഠനം. ചില പ്രത്യേക ഭക്ഷണങ്ങള് ഗര്ഭാശയാര്ബുദം വരാനുള്ള സാധ്യത വര്ധിപ്പിക്കുമെന്ന് മിസൗറി സര്വകലാശാല ഗവേഷകര് നടത്തിയ പഠനത്തില് തെളിഞ്ഞു. കരള്, കക്കയിറച്ചി, കൂണ് ഇവയാണ് രോഗസാധ്യത കൂട്ടുന്ന ഭക്ഷണങ്ങള്. കൂടാതെ പുകയിലയും രോഗകാരണമാകും. ഇവയില് അടങ്ങിയ കാഡ്മിയം ലോഹം ആണ് രോഗസാധ്യത വര്ധിപ്പിക്കുന്നത്. സ്ത്രീകള്, കാഡ്മിയം, കൂടുതലടങ്ങിയ ഭക്ഷണങ്ങളുടെ ഉപയോഗം കുറയ്ക്കണമെന്ന് ഗവേഷകര് നിര്ദേശിക്കുന്നു. ഗര്ഭപാത്രത്തിന്റെ ആവരണമായ എന്ഡോമെട്രിയത്തെ ബാധിക്കുന്ന അര്ബുദമാണ് ഗര്ഭാശയ അര്ബുദം അഥവാ എന്ഡോമെട്രിയല് കാന്സര്.
ഓരോ വര്ഷവും ഒമ്പതിനായിരത്തില്പ്പരം പേര്ക്കാണ് ഗര്ഭാശയാര്ബുദം ബാധിക്കുന്നത്. സ്ത്രീകളില് കണ്ടു വരുന്ന അര്ബുദങ്ങളില് നാലാം സ്ഥാനമാണ് ഇതിനുള്ളത്. കാഡ്മിയം, ഈസ്ട്രജന് ഹോര്മോണിനെപ്പോലെ പ്രവര്ത്തിക്കുകയും ശരീരത്തില് ഇതിന്റെ ഫലങ്ങളുണ്ടാകുകയും ചെയ്യുമെന്ന് പഠനത്തിനു നേതൃത്വം നല്കിയ ജയ്ന്മാക് എന്റോയ് പറയുന്നു. കാഡ്മിയം ഈസ്ട്രജനെ അനുകരിക്കുക വഴി ഗര്ഭപാത്രത്തിന്റെ ആവരണമായ എന്ടോമെട്രിയത്തിന്റെ വളര്ച്ച കൂടുകയും അങ്ങനെ ഗര്ഭാശയാര്ബുദത്തിനു കാരണമാകുകയും ചെയ്യും. ഗര്ഭാശയാര്ബുദം ബാധിച്ച 631 സ്ത്രീകളിലും രോഗം ബാധിക്കാത്ത 879 സ്ത്രീകളിലും അഞ്ചു വര്ഷം നീണ്ട പഠനം നടത്തി. കണ്ട്രോള് ഗ്രൂപ്പിലുള്ളവരിലും അര്ബുദം ബാധിച്ചവരിലും കാഡ്മിയത്തിന്റെ അളവ് പരിശോധിച്ചപ്പോള് കാഡ്മിയത്തിന്റെ അളവും അര്ബുദവുമായി ബന്ധമുണ്ടെന്നു കണ്ടു.
കാഡ്മിയം നില ഉയര്ന്നവരില് ഗര്ഭാശയാര്ബുദത്തിനുള്ള സാധ്യത 22 ശതമാനം കൂടുതലാണെന്നു കണ്ടു. നമ്മുടെ വൃക്കകളിലും കരളിലും കാഡ്മിയം ഉണ്ട്. എന്നാല് പുകവലി കാഡ്മിയത്തിന്റെ അളവ് ഇരട്ടിയാക്കും. ഭക്ഷണത്തില് ശ്രദ്ധിച്ചാല് രോഗം വരാതെ നോക്കാം എന്നും കക്കായിറച്ചി, കൂണ് മുതലായ ഭക്ഷണങ്ങള് കുറയ്ക്കുന്നത് നല്ലതായിരിക്കുമെന്നും ഗവേഷകര് അഭിപ്രായപ്പെടുന്നു. ഗര്ഭാശയ അര്ബുദത്തിന്റെ കുടുംബ ചരിത്രം ഉള്ളവരും പ്രമേഹം, പൊണ്ണത്തടി ഇവയുള്ളവരും പ്രത്യേകം ശ്രദ്ധിക്കണമെന്നും പ്ലസ്വണ് ജേണലില് പ്രസിദ്ധീകരിച്ച ഈ പഠനം പറയുന്നു.
https://www.facebook.com/Malayalivartha
