നടുവേദന - സ്വയം ചികിത്സ അരുത്
വളരെ സാധാരണയായി കാണപ്പെടുന്ന ഒരാരോഗ്യപ്രശ്‌നമാണ് നടുവേദന. 80 ശതമാനത്തിലധികം ആളുകളും ജീവിതത്തിലൊരിക്കലെങ്കിലും നടുവേദന അനുഭവിച്ചിട്ടുണ്ടാവും.സ്ത്രീകള്‍ക്കും പുരുഷന്മാര്‍ക്കും നടുവേദന വരാനുള്ള സാധ്യത ഒരുപോലെയാണെങ്കിലും ആര്‍ത്തവവിരാമത്തിനുശേഷം സ്ത്രീകള്‍ക്ക് നടുവേദനയുണ്ടാവാനുള്ള സാധ്യത കൂടുതലാണ്
നട്ടെല്ലിന്റെ പ്രധാന ധർമ്മം ശരീരഭാരം താങ്ങുകയും നാഡീവ്യവസ്ഥയെ സംരക്ഷിക്കുകയും ചെയ്യുക എന്നതാണെന്ന് അറിയാമല്ലോ? വാര്‍ധക്യാവസ്ഥയില്‍ എല്ലിന്റെ തേയ്മാനം, സന്ധിവാതം, സ്‌പോണ്‍ഡിലോസിസ് തുടങ്ങിയവ നടുവേദനക്ക് കാരണമാകാറുണ്ട്. ഇത്തരം പ്രശ്‌നങ്ങള്‍ കൊണ്ട് നടുവേദനയുള്ളവര്‍ കുനിഞ്ഞു ജോലി ചെയ്യുമ്പോള്‍ വേദന കൂടുകയും വിശ്രമിക്കുമ്പോള്‍ വേദന കുറയുന്നതായും കാണാം.
നടുവേദനയോടൊപ്പമുള്ള പനി, ശരീരത്തിന്റെ തൂക്കം കുറയല്‍, രാത്രിയിലുള്ള നടുവേദന, മൂത്രസംബന്ധമായ പ്രശ്‌നങ്ങള്‍, വീഴ്ചമൂലം എല്ലുകള്‍ക്കേറ്റ ക്ഷതം, സ്റ്റിറോയ്ഡ് പോലുള്ള ഗുളികളുടെ ഉപയോഗം, നാഡീസംബന്ധമായ പ്രശ്‌നങ്ങള്‍ എന്നിവയെല്ലാം നടുവേദന സങ്കീര്‍ണമാക്കും.
തെറ്റായ ഭക്ഷണരീതികൊണ്ട് അമിതവണ്ണം ഉണ്ടായാല്‍ നടുവേദന വരാനിടയുണ്ട്.വേണ്ടത്ര വെള്ളം കുടിക്കാതിരിക്കുമ്പോള്‍ മലബന്ധമോ മൂത്രാശയത്തില്‍ പഴുപ്പോ വരാന്‍ സാധ്യതയുണ്ട്. അതുമൂലവും നടുവേദനയുണ്ടാവാം.
പെട്ടെന്നുള്ള കഠിനമായ നടുവേദന, ക്രമേണ ശക്തിയേറുന്ന നടുവേദന, കുനിഞ്ഞുനിവരാന്‍ പ്രയാസം, നില്‍ക്കാനും നടക്കാനും ഇരിക്കാനും സാധനങ്ങളെടുക്കാനും വിഷമം, ചുമയ്ക്കുമ്പോഴും തുമ്മുമ്പോഴും കൂടുന്ന നടുവേദന എന്നിങ്ങനെയുള്ള ലക്ഷണങ്ങള്‍ സൂചിപ്പിക്കുന്നത് ഡിസ്‌ക് പ്രൊലാപ്‌സ് ആകുന്നു എന്നതാണ് .
അധികനേരം ഒരേനിലയിലിരിക്കേണ്ടിവരുന്നവര്‍ക്കും ഭാരം എടുക്കുന്നവര്‍ക്കും ഡിസ്‌കിന് തേയ്മാനം വന്ന് ക്രമേണ സ്ഥാനഭ്രംശം വരാന്‍ സാധ്യതയുണ്ട്.
വിവിധതരം സന്ധിവാതരോഗങ്ങള്‍, അണുബാധ, അസ്ഥികള്‍ക്കുണ്ടാവുന്ന ക്ഷതം, ഡിസ്‌ക് സംബന്ധമായ പ്രശ്‌നങ്ങള്‍, തുടങ്ങി കാന്‍സർ രോഗ ലക്ഷണമായി വരെ നടുവേദന ഉണ്ടാകാറുണ്ട്.
ഉല്‍കണ്ഠ, വിഷാദം തുടങ്ങിയ മാനസികപ്രശ്‌നങ്ങലുള്ളവരിലും നടുവേദന കാണാറുണ്ട്.
ആവശ്യമായ പരിശോധനകള്‍ക്കു ശേഷം മാത്രമേ നടുവേദനയുടെ കാരണം കൃത്യമായി പറയാന്‍ കഴിയൂ എന്നതിനാല്‍ കഴിവതും എത്രയും വേഗം വിദഗ്ധനായ ഡോക്ടറുടെ സഹായം തേടേണ്ടതാണ്.
https://www.facebook.com/Malayalivartha
