തിളക്കത്തോടെയുള്ള കണ്ണുകള്‍ ആരോഗ്യത്തെ സൂചിപ്പിക്കുന്നു. ഒരു വ്യക്തിയുടെ കണ്ണില്‍ അയാളുടെ ആരോഗ്യം പ്രതിഫലിക്കുമെന്നാണ് പറയുന്നത്. പഞ്ചേന്ദ്രിയങ്ങളില്‍ വച്ച്‌ ഏറ്റവും മനോഹരമായ അവയവമാണ്‌ കണ്ണുകള്‍. ഒരു വ്യക്‌തിയുടെ മനസ്‌ അയാളുടെ കണ്ണുകളില്‍ വായിച്ചറിയാം.

കണ്ണിന്‍റെ ആരോഗ്യത്തിന് പ്രധാനമായും വേണ്ടത് വൈറ്റമിന്‍ എ, വൈറ്റമിന്‍ ഡി എന്നിവയാണ്. അതുകൊണ്ടുതന്നെ ഇലക്കറികള്‍ പച്ചക്കറികള്‍, മത്സ്യം തുടങ്ങിയവ ധാരാളമായി ഭക്ഷണത്തില്‍ ഉള്‍പ്പെടുത്തണം.

ഇതില്‍ ഏറ്റവും പ്രധാനം ഉറക്കമാണ്. ആവശ്യത്തിന് ഉറക്കം ലഭിച്ചില്ലെങ്കില്‍ അത് കണ്ണുകളുടെ ആരോഗ്യത്തെ ബാധിക്കും. കണ്ണുകള്‍ക്ക് ചുറ്റും കറുപ്പ് നിറം വരുന്നതിനും ഇത് കാരണമാകും.

ചീരയുള്‍പ്പെടെയുളള ഇലക്കറികളില്‍ ധാരാളം ആന്‍റി ഒക്സിഡന്‍റുകളും വൈറ്റമിന്‍ സിയും ബീറ്റാ കരോട്ടിനും അടങ്ങിയിട്ടുണ്ട്. ഇവ തിമിരമുള്‍പ്പെടെയുളള നേത്ര രോഗങ്ങളെ തടയുമെന്ന് മാത്രമല്ല അള്‍ട്രാ വയലയറ്റ് രശ്മികളില്‍ നിന്ന് കണ്ണുകളെ സംരക്ഷിക്കുകയും ചെയ്യുന്നു.

കണ്ണിന് ചുറ്റും കറുത്ത നിറം ഉണ്ടെങ്കില്‍ ബദാം എണ്ണയും നാരങ്ങാനീരുമോ, തക്കാളി നീരും നാരങ്ങാനീരുമോ, ഗ്ലീസറിനും തേനുമോ അല്ലെങ്കില്‍ പാലും നാരങ്ങാനീരുമോ യോജിപ്പിച്ചു പുരട്ടാം .

മൂന്ന്‌ അല്ലെങ്കില്‍ നാല്‌ നന്ത്യാര്‍വട്ടപ്പൂക്കള്‍ ശുദ്ധജലത്തിലിട്ട്‌ രാത്രി മുഴുവന്‍ വയ്‌ക്കുക. പിറ്റേന്ന്‌ പൂവ്‌ മാറ്റിയ ശേഷം ഈ വെള്ളം കൊണ്ട്‌ കണ്ണ്‌ കഴുകുക. നേത്രരോഗങ്ങള്‍ തടയാനും കണ്ണിന്റെ തിളക്കവും ആരോഗ്യവും നിലനിര്‍ത്താനും സാധിക്കും.

പാദങ്ങളിലെ ചില നാഡികള്‍ കണ്ണുകളുമായി ബന്ധപ്പെട്ടിരിക്കുന്നു. അതിനാല്‍ കുളിക്കുന്നതിനു മുമ്പായി കാലിനടിയില്‍ എണ്ണ പുരട്ടി മൃദുവായി മസാജ്‌ ചെയ്യുന്നത്‌ കണ്ണിന്റെ ആരോഗ്യത്തിന്‌ നല്ലതാണ്‌. കാലുകള്‍ കഴുകി വൃത്തിയായി സൂക്ഷിക്കുക. പാദങ്ങള്‍ക്ക്‌ ആഘാതം ഏല്‍ക്കാതെ ശ്രദ്ധിക്കുക.

കാരറ്റ്‌ നീര്‌ തേന്‍ ചേര്‍ത്ത്‌ പതിവായി കണ്ണിനടിയില്‍ പുരട്ടി പത്ത്‌ മിനിറ്റിനു ശേഷം കഴുകിക്കളയുക.

പഞ്ഞി തണുത്ത കട്ടന്‍ചായയിലോ പനിനീരിലോ മുക്കി മുക്കി കണ്‍പോളകളില്‍ കുറച്ച്‌ നേരം വെച്ചാല്‍ കണ്ണുകളുടെ ക്ഷീണം മാറും. ഉരുളക്കിഴങ്ങ് ചെറുതായരിഞ്ഞതും വെള്ളരിക്ക വട്ടത്തില്‍ മുറിച്ചതും ഇത് പോലെ കണ്ണിന് മുകളില്‍ വെയ്ക്കാം.

വൈറ്റമിന്‍ സി ധാരാളം അടങ്ങിയ ഓറഞ്ച്, മാതള നാരങ്ങ തുടങ്ങിയവയും കണ്ണിന്‍റെ ആരോഗ്യത്തിന് നല്ലതാണ്. നേത്ര കോശങ്ങള്‍ക്ക് സംരക്ഷണം നല്‍കാനും ഈ പഴങ്ങള്‍ കഴിക്കുന്നതിലൂടെ സാധ്യമാകുന്നു.

നിത്യവും കണ്ണെഴുതുക. നേത്രത്തില്‍ അടിഞ്ഞുകൂടി ക്രമേണ നേത്രരോഗത്തിന്‌ കാരണമായേക്കാവുന്ന അഴുക്കുകളെ ഫലപ്രദമായി പുറത്തുകളഞ്ഞ്‌ കണ്ണ്‌ ശുദ്ധമാക്കുന്നു.