ഓര്‍ക്കാപ്പുറത്ത്‌ വേദനവരുകയും എത്രയും പെട്ടെന്ന്‌ വൈദ്യസഹായം തേടേണ്ടിവരുകയും ചെയ്യുന്ന ഒരു രോഗമാണ്‌ അപ്പന്റിസൈറ്റിസ്‌. പൊക്കിളിന്‌ താഴെ ചെറുകുടലും വന്‍കുടലുമായി സന്ധിക്കുന്ന ഭാഗത്തുള്ള ഒരു അവയവമാണ്‌ അപ്പന്റിക്‌‌സ്‌. മനുഷ്യ ശരീരത്തില്‍ ഈ അവയവത്തിന്‌ എന്തെങ്കിലും പ്രത്യേക ധര്‍മ്മമുള്ളതായി ഇതുവരെയുള്ള പഠനങ്ങളിലൊന്നും തെളിയിക്കപ്പെട്ടിട്ടില്ല. എന്നാല്‍ ഈ അവയവം ഉണ്ടാക്കുന്ന പൊല്ലാപ്പാണെങ്കില്‍ സഹിക്കാന്‍ വയ്യാത്തതുമാണ്‌.

പ്രത്യേകിച്ച് മനുഷ്യ ശരീരത്തിന് ഒരു ഗുണവും ഇല്ലെങ്കിലും പല പൊസിഷനില്‍ തിരിഞ്ഞും മറിഞ്ഞും ഒളിച്ചിരുന്നുമൊക്കെ രോഗലക്ഷണങ്ങൾ വ്യത്യസ്‌തമാക്കാൻ കെൽപുള്ള കൊടുംഭീകരനാണു അപ്പന്റിക്‌‌സ്‌. രൂപം കൊണ്ട്‌ ഒരു പുഴുവിനെ അനുസ്‌മരിപ്പിക്കുന്ന ഈ അവയവത്തിൽ ഭക്ഷണപദാർഥങ്ങളോ വിസർജ്യവസ്തുക്കളോ കെട്ടിക്കിടന്ന് ഉണ്ടാകുന്ന രോഗാണുസംക്രമണ വീക്കമാണ് അപ്പെൻഡിസൈറ്റിസ്. കുടലിൽനിന്നും യാദൃച്ഛികമായി അപ്പെൻഡിക്സിനുള്ളിൽ കടന്നുകൂടുന്ന ഭക്ഷണമോ ബാഹ്യവസ്തുക്കളോ തരംഗരൂപത്തിലുള്ള ചലനങ്ങളാൽ, ('പെരിസ്റ്റാൾടിക്' ചലനങ്ങൾ) പരിപൂർണമായി പുറത്തുപോകാതിരിക്കുന്നു. ഇങ്ങനെ ഇതിനുള്ളിൽ കടന്നുവരുന്ന സാധനങ്ങളെ പുറന്തള്ളാൻ ഉപകരിക്കാത്ത ഏതു ഘടകവും അപ്പെൻഡിസൈറ്റിസിന് വഴിതെളിക്കും.

പൊക്കിളിന്‌ ചുറ്റും തുടങ്ങുന്ന വേദന, വയറിന്റെ വലതു താഴേക്കോണിൽ വേദന, അപ്പന്റിക്‌സിന്റെ പൊസിഷൻ മാറുന്നത് അനുസരിച്ചുള്ള വ്യത്യസ്‌ത വേദനകൾ, ഭക്ഷണവിരക്‌തി, ഛർദ്ദി, പനി എന്നിവ രോഗിക്ക് അനുഭവപ്പെടാം .
സാധാരണ നിലയിൽ പ്രത്യേകിച്ച്‌ പണിയൊന്നുമില്ലാതെ കുടൽമാലയുടെ കൂട്ടത്തിൽ കഴിഞ്ഞു കൂടുന്ന വിരൽ വലിപ്പമുള്ള ഈ അവയവത്തിൽ ഏതെങ്കിലും വിധത്തിൽ അണുബാധ ഉണ്ടായാൽ മേൽ പറഞ്ഞ ലക്ഷണങ്ങളുണ്ടാകും. ഈ പഴുപ്പും അണുബാധയും ഒരു പരിധിയിലേറെ പുരോഗമിച്ച്‌ അപ്പന്റിക്‌സിൽ ദ്വാരമുണ്ടായാൽ, വയറിനകത്തുള്ള ഒട്ടുമിക്ക അവയവങ്ങളെയും പൊതിഞ്ഞു പിടിക്കുന്ന പെരിട്ടോണിയം എന്ന ആവരണത്തിൽ ഒന്നടങ്കം അണുബാധ, ദുസ്സഹനീയമായ വേദന എന്നിവയും തുടർന്ന്‌ മരണം പോലും സംഭവിക്കാം. ഇതുകൊണ്ടാണ്‌ 'പെട്ടെന്ന്‌ ഓപ്പറേഷൻ വേണം' എന്ന്‌ ചില കേസുകളിൽ നിർബന്ധം പറയുന്നത്‌. അപ്പന്റിസൈറ്റിസ്‌ നമ്മുടെ ശരീരത്തിനു യാതൊരു ഉപകാരവും ഇല്ലെങ്കിലും ചിലപ്പോൾ ഉപദ്രവകാരിയായ ഒരു കൊലയാളിയാവാം എന്നർത്ഥം .

ആദ്യകാലങ്ങളിലെല്ലാം കുഞ്ഞുങ്ങളിലും മറ്റും ഈ രോഗം അപൂര്‍വ്വമായേ വന്നിരുന്നുള്ളു. എന്നാല്‍ ജീവിതശൈലീ മാറ്റവും അതിന്റെ ഭാഗമായി ഭക്ഷണ രീതിയില്‍വന്ന മാറ്റങ്ങളും ആ രോഗത്തിന്‌ പ്രായഭേദമില്ലാതാക്കിയിരിക്കുന്നു. പത്തു വയസ്സിനും ഇരുപത്‌ വയസ്സിനും ഇടയിലുള്ളവരിലാണ്‌ രോഗംവരാന്‍ കൂടുതല്‍ സാധ്യത.

രോഗം വരാനുള്ള പ്രധാന കാരണങ്ങള്‍ നാരുള്ള ഭക്ഷണത്തിന്റെ കുറവ്‌, ഭക്ഷണത്തിലെ അന്നജത്തിന്റെ ആധിക്യം എന്നിവയാണ്. അന്നപഥത്തിലുള്ള കീടങ്ങളും മാലിന്യങ്ങളും ഇതിനുള്ളിലെത്തിയാല്‍ അപ്പന്റിസൈറ്റിസ്‌ വരാം .ചില വൈറസുകളും അപ്പന്റിക്‌സിന്‌ ഉള്ളില്‍ കടന്ന്‌ രോഗത്തിന്‌ വഴിവയ്‌ക്കും . മലം അപ്പന്റിക്‌സന്റെ ഉള്ളില്‍ കടന്ന്‌ ഇതിന്റെ വായ്‌ ഭാഗം അടഞ്ഞുപോയാലും രോഗം വരാം

രോഗം വന്നുകഴിഞ്ഞാല്‍ എത്രയും പെട്ടന്ന്‌ ശസ്‌ത്രക്രിയ നടത്തി അപ്പന്റിക്‌സ്‌ എടുത്തുകളയുന്നതാണ്‌ നല്ലത്‌. വച്ചു താമസിപ്പിക്കാതെ വൈദ്യസഹായം തേടുകയെന്നതാണ്‌ പ്രധാനമായും ചെയ്യേണ്ടത്‌. അവയവം വീര്‍ത്ത്‌ പൊട്ടിയാല്‍ അതിലെ മാലിന്യങ്ങള്‍ വയറ്റില്‍ കലരുകയും മരണം വരെ സംഭവിക്കാനിടവരുകയും ചെയ്യും

താക്കോൽദ്വാര ശസ്‌ത്രക്രിയ വഴി തന്നെ മിക്കവാറും അപ്പന്റിക്‌സ്‌ എടുത്തു കളയാനാകുമെങ്കിലും ചിലപ്പോൾ വയറു തുറന്നുള്ള ശസ്‌ത്രക്രിയയിലേക്ക്‌ മാറേണ്ടി വന്നേക്കാം.

അപ്പന്റിസൈറ്റിസ്‌ എന്നു കരുതുന്ന പലതും അങ്ങനെ ആവണം എന്നും ഇല്ല ചെറിയ കുട്ടികളിൽ വയറിനകത്തുള്ള കഴലകൾ വീങ്ങുന്നത്‌ (mesentric adenitis), കുടലിൽ കെട്ട്‌ (intussusception) , സ്‌ത്രീകളിൽ കെട്ടുപിണഞ്ഞു പോയ അണ്‌ഢാശയം (torsion ovary), അരക്കെട്ടിനുള്ളിലെ അണുബാധ ( pelvic inflammatory disease), വലതുഭാഗത്തെ ട്യൂബൽ പ്രഗ്‌നൻസി, മൂത്രാശയ അണുബാധ, പ്രായമായവരിൽ വൻകുടലിലെ കാൻസർ എന്നിവയെല്ലാം അപ്പന്റിസൈറ്റിസിന്റെ മുഖംമൂടി അണിഞ്ഞ്‌ എത്താറുണ്ട്. രക്തപരിശോധന, മൂത്രപരിശോധന, അള്‍ട്രാസൗണ്ട്‌ സ്‌കാനിങ്‌ എന്നിങ്ങനെയുള്ള രോഗപരിശോധനയിലൂടെ ഡോക്ടർക്ക് ചികിത്സ നിർദ്ദേശിക്കാനാകും